ވިލިމާލެ ފަޅުތެރޭގައި އޮތް ދޯންޏަކަށް އަރައި އެ ދޯނީގައި ތިބި ތިން ބިދޭސީއަކަށް ވަޅިން ހަމަލާދިން މައްސަލާގައި ދިވެއްސަކު ދެ އަހަރު ދުވަހަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.
ޖެނުއަރީ 3، 2019 ވަނަ ދުވަހު ހިނގައިދިޔަ އެ ކަންތައްތަކާ ގުޅިގެން އަނިޔާއެއް ދިނުމުގެ ދައުވާ އުފުލާފައިވަނީ ޏ. ފުވައްމުލައް، ކެލާގެ، އަހުމަދު ސޯލިހްގެ މައްޗަށެވެ.
ދައުލަތުން ކޮށްފައިވާ ދައުވާގައި ބުނާ ގޮތުން، އެ ދުވަހުގެ ފަތިސް ވަގުތެއްގައި އޭނާ އެ ދޯންޏަށް އަރައި ވަޅިން ބިރު ދައްކައި ފޭރުމަށް މަސައްކަތް ކޮށްފައިވެ އެވެ. އޭނާ އަތުގައި ކިވީ ބްރޭންޑްގެ ދެ ވަޅިއެއް އޮތް ކަމަށް ދައުވާގައި ބުނެފައިވެ އެވެ.
އެއިން އޮމަރު ފާރޫކް ނަމަކަށް ކިޔާ މީހެއްގެ ކަށި އިނގިލި އަދި ހަޒުރަތު އަލީ ނަމަކަށް ކިޔާ މީހެއްގެ ކަނާތު ބޮޑުވައި އިނގިލި ޒަހަމްކޮށްލާފައިވާ ކަމަށެވެ. އަދި މުހައްމަދު މޯލެބް ހުސައިން ނަމަކަށް ކިޔާ މީހެއްގެ ކަނާތު އަތްތިލައާއި ވާތުގެ ތިން އިނގިއްޔެއް ޒަހަމްކޮށްލާފައިވާ ކަމަށެވެ.
ޝަރީއަތުގައި އަހުމަދު ސޯލިހް ވަނީ ކުށަށް އިންކާރުކޮށްފަ އެވެ. އޭނާ ބުނެފައި ވަނީ ބިދޭސީން އޭނާ ހިފަހައްޓައި އަނިޔާ ކުރަން އުޅުނީ ކަމަށެވެ.
އޭނާގެ ފަރާތުން ދިފާއީ ހެކިންގެ ގޮތުގައި ނަންތަކެއް ބުނި ނަމަވެސް ތަފްސީލާއެކު ލިޔުމުން އެ ހެކިން ހުށަހަޅާފައި ނެތުމުން ދިފާއީ ހެކި ބަލައިނުގަތުމަށް ޝަރީއަތުން ނިންމި އެވެ.
އަހުމަދު ސޯލިހުގެ މައްޗަށް ކުށް ސާބިތު ކުރުމަށް ދައުލަތުން ވަނީ އަނިޔާ ލިބުނު ތިން ބިދޭސީންނާއި، ދޯންޏާ ހަވާލުވެފައިވާ މީހާއާއި، ސީންއަށް ދިޔަ ފުލުހުންނާއި، ޑީއެންއޭ ރިޕޯޓް ތައްޔާރުކުރި ފުލުސް އޮފިސަރުގެ އިތުރަށް ބައެއް ކިތާބީ ހެކި ހުށަހަޅައިފަ އެވެ.
އެ ހެކިންގެ ހެކިބަހުންނާއި ކިތާބީ ހެކިތަކާއި، ބިދޭސީންނަށް ލިބިފައިވާ އަނިޔާތަކަށް ރިއާޔަތްކޮށް އަހުމަދު ސޯލިހުގެ މައްޗަށް ކުށް ސާބިތުވާ ކަމަށް ޝަރީއަތުން ކަނޑައެޅުއްވި އެވެ.
މި ކުށުގެ އަސާސީ އަދަބަކީ އެއް އަހަރާއި ހަތް މަހާއި ހަ ދުވަހަށް ޖަލަށް ލުން ކަމަށް ވިޔަސް، އެ އަދަބު ދަރަޖައެއް މަތިކުރަން މައްސަލަ ބެއްލެވި ގާޒީ މުހައްމަދު މިސްބާހު ނިންމެވި އެވެ. އެއީ ދެ އަހަރު ދުވަހަށް ޖަލަށް ލުމަށް ހުކުމް ކުރުމަށެވެ.
ސަބަބެއްގެ ގޮތުގައި މިދިޔަ އަންގާރަ ދުވަހު ނެރުނު ހުކުމުގައި ވަނީ މީގެ ކުރިން ވެސް އޭނާގެ މައްޗަށް މަސްތުވާތަކެތީގެ މައްސަލައެއް ސާބިތުވެ ހުކުމް ތަންފީޒުކޮށްފައިވުމުންނާއި، އޭގެ ފަހުން އެންމެ ހަ އަހަރު ދުވަހުގެ ތެރޭގައި އެއަށް ވުރެ ނުރައްކާތެރި ކުށެއް ސާބިތުވުމުން ކަމަށެވެ.
މި ކުށުގެ ތުުހުމަތުގައި އޭނާ އޭރު ވެސް 21 ދުވަސް ޖަލުގައި ހޭދަކޮށްފައިވާތީ، ހުކުމުން ދެން ތަންފީޒު ކުރަން ޖެހޭނީ 1 އަހަރާއި 11 މަހާއި 9 ދުވަސް ކަމަށް ވެސް ހުކުމުގައި ފާހަގަކޮށްފައިވެ އެވެ.
