ކުނި މެނޭޖުކުރުމުގެ ހިދުމަތްދޭ ފަރާތްތަކުން ކުނި އެއްކޮށް ޖަމާކުރުމަށްފަހު މަގުމައްޗާއި ދުވާރުމަތީގައި ކުނިފުނިޖަހައި، ކަލެކްޝަން ޕޮއިންޓުގެ ގޮތުގައި ބޭނުން ނުކުރުމަށް އެންވާރަމަންޓް ޕްރޮޓެކްޝަން އެޖެންސީ (އީޕީއޭ) އިން އިލްތިމާސްކޮށްފި އެވެ.
އީޕީއޭއިން ބުނީ، މަގުމައްޗަށް ކުނި ނެރެގެން ކުނި މެނޭޖު ކުރުމުގެ ހިދުމަތް ދިނީ ކޮވިޑްގެ ހާލަތުގައި މާލެ ފުރަބަންދު ކުރުމާ ގުޅިގެން ކަމަށެވެ. އަދި މިހާރު އެ ހާލަތު ނެތިގޮސް، ކޮވިޑްގެ ކުރިއެކޭ އެއްފަދައިން ޑޯޓުޑޯ ކަލެކްޝަން ސާވިސް ދޭން ފަށާފައިވާކަން އެ އެޖެންސީން ވަނީ ފާހަގަކޮށްފަ އެވެ.
އީޕީއޭއިން ވަނީ ކުނި މެނޭޖު ކުރުމުގެ ހިދުމަތް ހޯދުމުގެ ގޮތުން އެއްވެސް ހާލަތެއްގައި ނުވަތަ އެއްވެސް ވަގުތެއްގައި މަގުމައްޗާއި، ދުވާރު މައްޗަށް ކުނި ނޭޅުމަށް އެދިފަ އެވެ.
"ކުނި މެނޭޖުކުރުމުގެ ހިދުމަތްދޭ ފަރާތްތަކުން ވެސް ކުނި އެއްކޮށް ޖަމާކުރުމަށްފަހު މަގުމައްޗާއި ދުވާރުމަތީގައި ކުނިފުނިޖަހައި ކަލެކްޝަން ޕޮއިންޓުގެ ގޮތުގައި ބޭނުންކުރަމުންދާކަން މި އެޖެންސީއަށް ވަނީ ފާހަގަކުރެވިފަ އެވެ." އީޕީއޭގެ ބަޔާނުގައި ވެއެވެ.
އެހެންކަމުން އެފަދަ ކުނީގެ ކަލެކްޝަން ޕޮއިންޓްތައް މަގުމަތީގައްޔާއި ދުވާރުމަތީގައި ހަދައި އެފަދަ ކަލެކްޝަން ޕޮއިންޓްތަކަށް ކުނި ޖަމާނުކުރުމަށް އީޕީއޭއިން ވަނީ އެދިފަ އެވެ.
ހަމައެއާއެކު، އާންމު ސިއްހަތު ރައްކާތެރިކުރުމުގެ ގޮތުން މަގުމައްޗާއި ދުވާރު ސާފުކޮށް ބޭއްވުމަށާއި، ކުނި މެނޭޖު ކުރުމުގެ ގަވައިދާ އެއްގޮތަށް އެ ހިދުމަތް ދިނުމަށް އީޕީއޭއިން ވަނީ އިލްތިމާސްކޮށްފަ އެވެ.
