ކަނޑުމަހުގެ މަސްވެރިކަމުގައި ވިޔަފާރީގެ އުސޫލުން ހަރަކާތްތެރިވާ އުޅަނދުފަހަރާއި ކަނޑުމަސް ޕްރޮސެސްކުރާ ފަރާތްތަކުން ލައިސަންސް ނަގަންޖެހޭ ގޮތަށް ގަވައިދު އެކުލަވާލައިފި އެވެ.
ކަނޑުމަހުގެ މަސްވެރިކަން ރާވައި، ހިންގައި، ބެލެހެއްޓުމާ ގުޅޭ ގަވާއިދުގައި ބުނެފައިވާ ގޮތުން ވިޔަފާރި އުސޫލުން މަސްވެރިކަމާއި ޕްރޮސެސްކުރުމުގައި ހަރަކާތްތެރިވާ ފަރާތްތަކުން ފިޝަރީޒް މިނިސްޓްރީން ދޫކުރާ ސައްހަ ލައިސެންސް އެއް އޮންނަންޖެހޭނެ އެވެ.
އެ ލައިސެންސް ދޫކުރަނީ، މަސްވެރިކަން ކުރާ ބާވަތަށާއި އުޅަނދުގެ ބޮޑު މިނަށް ބަލައިފަ އެވެ. އަދި ކަނޑުމަސް ޕްރޮސެސްކުރާ ފަރާތްތަކުން ލައިސެންސް ނަގަންޖެހެނީ އެތަނަކުން ދުވާލަކު ޕްރޮސެސް ކުރެވޭ މިންވަރެއްގެ މަތީންނެވެ.
މިގޮތުން، މަސްވެރިކަންކުރާ އުޅަނދުތަކުގެ ކުޑަ ބޮޑު މިނަށާއި ބާވަތަށް ބަލައި، އެއް އަހަރާއި ދެ އަހަރުގެ މުއްދަތަށް ލައިސެންސް ދޫކުރާއިރު، ފީގެ ގޮތުގައި 250ރ. އާއި 1،800ރ. ދެމެދުގެ އަދަދެއް ދައްކަންޖެހެ އެވެ.
މަސް ޕްރޮސެސްކުރާ ފަރާތްތަކުން، އެ ފެސިލިޓީ އެއްގައި ދުވާލަކު އެންމެ ގިނައިން ޕްރޮސެސްކުރެވޭ ރޯމަހުގެ ބަރުދަނަށް ބަލައި ގިނަވެގެން އެއް އަހަރު ދުވަހަށް ލައިސެންސް ދޫކުރަނީ 2،000ރ. އާއި 15،000ރ. އާދެމެދުގެ ފީއެއް ދެއްކުމުންނެވެ.
އެއާއެކު އުޅަނދުގައި ހިންގާ މަސްވެރިކަމުގެ އެންމެހައި ހަރަކާތްތައް ވާންވާނީ، އެ ލައިސަންސު ގައި ކަނޑައަޅައިފައިވާ ސަރަހައްދުތަކުގައި އެ ލައިސަންސަކުން ހުއްދަ ދީފައިވާ މަސްވެރިކަމެއް ކުރުމަށް ހިންގާ ހަރަކާތްތަކަށް ކަމަށް ގަވައިދުގައި ވަނީ ޝަރުތުކޮށްފަ އެވެ.
ބިދޭސީން މަސްވެރިކަމުގައި ގެންގުޅުން މަނާ
ވިޔަފާރި އުސޫލުން ކަނޑުމަހުގެ މަސްވެރިކަމުގައި ހަރަކާތްތެރިވާ ފަރާތްތަކުން އަމަލުކުރަންޖެހޭ އުސޫލުތަކާއި މިންގަނޑުތައް ވަރަށް ފުޅާކޮށް ބަޔާންކޮށްފައިވާ މި ގަވައިދުގައި، ސީދާ މަސްވެރިކަން ކުރުމުގައި ބިދޭސީން ހަރަކާތްތެރިވުން ވަނީ މަނާކޮށްފަ އެވެ.
ނަމަވެސް، ދޮށީގެ މަސްވެރިކަމާއި އަތުނަނުގެ ބޮޑުކަންނެލީގެ މަސްވެރިކަންކުރާ އުޅަނދުތަކުގެ ތެރެއިން ވަކި މިންގަނޑަކަށް ފެތޭ ބޮޑެތި އުޅަނދުތަކުގައި ސެކިއުރިޓީ ބެލެހެއްޓުމާއި، ފަޅުވެރިންނަށް ކެއްކުން ފަދަ މަސައްކަތްތައް ކުރުމަށް ޓަކައި، އުޅަނދެއްގައި ގިނަވެގެން ދެ ބިދޭސީން ގެންގުޅެވިދާނެ ކަމަށް ގަވައިދުގައި ބުނެފައިވެ އެވެ.
މީގެ އިތުރުން، ކަނޑުމަހުގެ މަސްވެރިކަން ކުރުމުގެ ސައްހަ ލައިސަންސެއް ނެތް އުޅަނދުތަކުން މަސްގަތުމާއި ލައިސަންސެއް ނެތް އުޅަނދަކުން ކިރުވައިފައިވާ މަސް ޕްރޮސެސްކުރުން ވެސް ވަނީ މަނާކޮށްފަ އެވެ.
އަދި މިނިސްޓްރީން ކަނޑައަޅައިފައިވާ އެންމެ ދަށް އަގާ ހިލާފަށް އެއަށް ވުރެ ދަށް އަގަކަށް މަސްގަތުން ނުވަތަ މަސް ގަތުމަށް ހުށަހެޅުން ވެސް ގަވައިދުގައި ބަޔާންކޮށްފައިވާ މަނާ ކަންތައްތަކުގެ ތެރޭގައި ހިމަނާފައިވެ އެވެ.
މި ގަވައިދުގައި ބަޔާންކޮށްފައިވާ އުސޫލުތަކާ ހިލާފަށް އަމަލުކުރާ ފަރާތްތަކަށް ކަނޑައަޅާފައިވާ ޖޫރިމަނާގެ އަދަބުގެ މިންގަނޑުތައް ވެސް ވަނީ ބަޔާންކޮށްފަ އެވެ.
މިގޮތުން، އެކަމެއްގެ ކުޑަ ބޮޑުމިނަށް ބަލައި، 500ރ. އިން ފެށިގެން 400،000ރ. އާ ދެމެދުގެ ޖޫރިމަނާ ކަނޑައަޅާފައިވެ އެވެ.
