ގެއެެއްގެ ސިޓިން ރޫމު މޭޒުމަތީގައި އޮތް ޗެކެއް ވަގަށް ނަގައިގެން، އެ ޗެކު ބޭނުންކޮށްގެން 5000ރ. ބޭންކުން ނެގި މީހަކު ތިން މަސް ދުވަހަށް ޖަލަށް ލުމަށް ކްރިމިނަލް ކޯޓުން މިއަދު ހުކުމް ކޮށްފި އެވެ.
މި ވައްކަން ކޮށްފައިވަނީ 2018 ވަނަ އަހަރުގެ އޮކްޓޯބަރު މަހުގެ ތެރޭގަ އެވެ. އަދި، މި މައްސަލަ ކްރިމިނަލް ކޯޓަށް ހުށަހަޅައިފައިވަނީ އޭގެ ދެ އަހަރު ފަހުން 2020 ވަނަ އަހަރުގެ އޮކްޓޯބަރު މަހު އެވެ.
މި މައްސަލައިގައި، ވައްކަން ކުރުމުގެ ދައުވާ ލިބުނު މީހާ ވަނީ ކުށަށް އިއުތިރާފު ވެފަ އެވެ. އެހެންކަމުން މި މައްސަލައިގައި އިއްވާފައިވަނީ އަވަސް ނިޔާގެ ހުކުމެކެވެ.
މި ކުށަށް ގާނޫނުގައި ކަނޑައެޅިފައިވާ އަސާސީ އަދަބަކީ ހަތަރު މަހާއި 24 ދުވަހަށް ޖަލަށް ލުމެވެ. ނަމަވެސް ކުށަށް އިއުތިރާފު ވެފައިވާތީ އަދަބުގެ އެއް ދަރަޖަ ދަށްވެ އެވެ.
އެހެންވެ، ވައްކަމުގެ ދައުވާ ސާބިތުވެ އޭނާގެ މައްޗަށް އިއްވާފައިވަނީ ތިން މަހާއި 18 ދުވަހަށް ޖަލަށް ލުމަށެވެ.
