ކުރިއަށް އޮތް 24 ގަޑިއިރު، ރާއްޖޭގެ މޫސުން ގޯސްވާނެ ކަމަށް މޫސުމާބެހޭ އިދާރާ (މެޓް) އިން ލަފާކޮށްފައިވާތީ، ވިއްސާރަވެ ފެންބޮޑުވުމުގެ ސަބަބުން ލިބިދާނެ ގެއްލުން ކުޑަކުރުމަށް ދުރާލާ ފިޔަވަޅު އެޅުމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން އިލްތިމާސްކޮށްފި އެވެ.
ބޯކޮށް ވާރޭ ވެހި ވައިގަދަވެ ކަނޑުތައް ގަދަވާނެ ކަމަށް ލަފާކޮށް މިއަދު މެންދުރު ފަހުން ފެށިގެން ހއ. އަތޮޅުން ތ. އަތޮޅަށް ވަނީ ހުދު ސަމާލު ނެރެފަ އެވެ.
އެކަމާ ގުޅިގެން އެންޑީއެމްއޭއިން މިއަދު ބުނީ ވިއްސާރައިގެ ސަބަބުން އާންމުކޮށް ފެންބޮޑުވާ ރަށްރަށުން ފެންބޮޑުވެގެން ލިބިދާނެ ގެއްލުން ކުޑަކުރުމަށް ދުރާލާ ފިޔަވަޅު އަޅައި ރައްކާތެރިވުން މުހިންމު ކަމަށެވެ.
ކަނޑުތައް ވެސް ގަދަވާނެ ކަމަށް ލަފާކޮށްފައިވާތީ، ކަނޑު މައްޗަށް ނިކުންނަ ނަމަ ސަލާމަތީ އާލާތްތައް ހަމައަށް ހުރިތޯ އާއި މުވާސަލާތީ ނިޒާމް ރަނގަޅަށް މަސައްކަތް ކުރާކަން ކަށަވަރުކުރުމަށް ސަމާލުކަން ދިނުމަށް އެމްޑީއޭއިން ވަނީ އިލްތިމާސްކޮށްފަ އެވެ.
މެޓް އޮފީހުން ލަފާކޮށްފައިވާ ގޮތުގައި މި ސަރަހައްދުތަކަށް ބޯކޮށް ވަރޭވެހުމާއެކު ގުގުރާ، ވައި ގަދަވާނެ އެވެ. އެގޮތުން ގަޑިއަކު 22 މޭލާއި 27 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާކޮށްފައިވެ އެވެ.
