ގދ. ތިނަދޫ ގެއެއްގެ ތެރޭގައި ހުރި މަސް ޓޭންކަކުން ހަތަރު މަސް ވަގަށް ނެގި މީހަކު ހަތަރު މަހަށް ޖަލަށްލުމަށް ކްރިމިނަލް ކޯޓުން ހުކުމްކޮށްފި އެވެ.
މިދިޔަ ހޯމަ ދުވަހު އެ ކޯޓުން ހުކުމް ކުރީ ޖުލައި 29، 2021 ގައި ގދ. ތިނަދޫ ގެއެއްގެ ތެރޭގައި ހުރި މަސް ޓޭންކަކުން ދެ ކެމެޓާއި އެއް ކާބާއި ގްރާމް ނަމަކަށް ކިޔާ ވައްތަރުގެ މަސްތަކެއް ވަގަށް ނެގި މައްސަލައެއްގަ އެވެ.
ދައުލަތުން އެ މައްސަލައިގައި ދައުވާ އުފުލި މީހާ ވަނީ އެ ކުށަށް އިއުތިރާފުވެފަ އެވެ. އެހެންކަމުން އިއުތިރާފާއެކު ޖިނާއީ އިޖުރާއަތުގެ ގާނޫނު ބުނާ ގޮތުން އޭނާއަށް ޝަރީއަތުން ކަނޑައަޅަންޖެހޭނީ ހަތަރު މަހާއި 24 ދުވަހުގެ ޖަލު އަދަބެކެވެ.
ޝަރީއަތުން ކަނޑައަޅަންޖެހޭ ޖަލު އަދަބު ޖޫރިމަނާއަކަށް ބަދަލުކޮށްދިނުމަށް ދައުވާ ލިބުނު ފަރާތުން އެދުނެވެ. އޭނާއަށް ޖޫރިމަނާގެ ފައިސާ ދެއްކޭނެ ގާބިލްކަން ހުރި ނަމަ ޖަލު އަދަބު، ޖޫރިމަނާއަކަށް ބަދަލުކޮށްދިނުމުން މައްސަލައެއް ނެތް ކަމަށް ދައުލަތުން ޝަރީއަތުގައި ބުންޏެވެ.
ދައުވާ ލިބޭ މީހާއަކީ ވަޒީފާއެއްގައި އުޅޭ މީހަކަށް ވާތީ އެ ޖޫރިމަނާ ދެއްކޭނެ ކަމަށް ބުނެ ވަޒީފައި އުޅޭ ކަމުގެ ލިޔުން އޭނާ ޝަރީއަތަށް ހުށަހެޅި އެވެ. އެކަމަކު، ދައުވާ ލިބޭ ފަރާތަކީ މަސްތުވާތަކެއްޗާ ބެހޭ ކޯޓުގެ ހުކުމެއްގެ ދަށުން މިހާރު ވެސް ގޭ ބަންދުގައި ހުރި މީހަކަށްވާތީ އޭނާއަށް ޖޫރިމަނާ ދެއްކުމުގެ ގާބިލްކަން ނެތް ކަމަށް ފަނޑިޔާރު ކަނޑައެޅުއްވި އެވެ.
އެހެންކަމުން މަސް ޓޭންކުން ވައްކަން ކުރި މައްސަލައިގައި ދައުވާ ލިބޭ މީހާ ފުރަތަމަ ހައްޔަރުކޮށް ޖަލުގައި ހޭދަކުރި 16 ދުވަސް އުނިކުރުމަށްފަހު އޭނާގެ އަދަބެއްގެ ގޮތުގައި ޝަރީއަތުން ކަނޑައެޅީ ހަތަރު މަހާއި އަށް ދުވަހަށް ޖަލަށްލުމަށެވެ.
