ބްރޯޑްކާސްޓުކުރުމުގެ ގާނޫނާއި ރީބްރޯޑްކާސްޓުކުރުމުގެ ގަވައިދު އަދި ކޮޕީރައިޓްސް ގާނޫނާ ވެސް ހިލާފަށް، ހޮލިޑޭ އިން ކަނޑޫމާ މޯލްޑިވްސްއިން ބައެއް ޗެނަލްތައް ރީބްރޯޑްކާސްޓުކުރަމުންދާ ކަމަށް ބުނެ އެ މައްސަލަ ސިވިލް ކޯޓަށް ހުށަހަޅައިފި އެވެ.
ސިވިލް ކޯޓުގެ ތާވަލްގައިވާ ގޮތުން މި މައްސަލައިގައި ކަނޑޫމާއާ ދެކޮޅަށް ދައުވާ އުުފުލާފައިވަނީ ރާއްޖޭގައި އެންމެ ފުޅާ ދާއިރާއެއްގައި ކޭބަލް ޓީވީގެ ހިދުމަތް ފޯރުކޮށްދޭ މީޑިއާނެޓުންނެވެ.
ރީބްރޯޑްކާސްޓުކުރުމުގެ ގަވައިދުގެ 18 ވަނަ މާއްދާގައިވާ ގޮތުން އެއްވެސް ފަރާތަކުން ރީބްރޯޑުކާސްޓުކުރުމުގެ ގޮތުން ޗެނަލެއް ދައްކަން ވާނީ، ޗެނަލް ދޭ ފަރާތުން ދޫކުރާ ޗެނަލްތައް ރީބްރޯޑްކާސްޓުކުރުމުގެ ހައްގު ލިބިގެންނެވެ.
އެހެންނަމަވެސް އެނގިފައިވާ ގޮތުގައި ކަނޑޫމާ ރިސޯޓުން އަންނަނީ ރީބްރޯޑްކާސްޓުކުރުމުގެ ހުއްދަ ނެތި އެ ހިދުމަތް ދެމުންނެވެ. އަދި، ކަނޑޫމާއިން ރީބްރޯޑްކާސްޓުކުރަމުން އަންނަ ބައެއް ޗެނަލްތަކަކީ އެ ޗެނަލްތައް ރީބްރޯޑްކާސްޓު ކުރުމުގެ ލައިސަންސް އެ ރިސޯޓަށް ލިބިގެން ނުވާ ޗެނަލްތަކެވެ.
"އަދަދު" އަށް އެނގިފައިވާ ގޮތުގައި މި މައްސަލައިގައި މިހާތަނަށް ކޯޓުގައި ތާވަލްކުރި ހަތަރު އަޑުއެހުމަށް ވެސް ކަނޑޫމާއިން ހާޒިރުވެފައި ނުވެ އެވެ. އަދި، އެންމެ ފަހުން މިދިޔަ ހޯމަ ދުވަހު ތާވަލްކުރި އަޑުއެހުމަށް ހާޒިރުނުވުމުން، ދައުވާ ލިބޭ ފަރާތުގެ ޣައިރު ހާޒިރުގައި މައްސަލަ ކުރިއަށް ގެންދިއުމަށް ދައުވާ ކުރާ ފަރާތުން ވަނީ އެދިފަ އެވެ.
މީގެ ކުރިން ވެސް ރީބްރޯޑްކާސްޓުކުރުމުގެ ހުއްދަ ނެތް 40 ޗެނަލެއް ރީބްރޯޑްކާސްޓުކުރުމުގެ ސަބަބުން ކަނޑޫމާ ރިސޯޓަށް ފިޔަވަޅު އަޅާފައިވެ އެެވެ. އެގޮތުން، 2019 ވަނަ އަހަރުގެ ޖުލައި މަހު އެ ރިސޯޓުން ރީބްރޯޑްކާސްޓު ކުރަމުން ގެންދާ ހުރިހާ ޗެނަލެއް ހުއްޓާލުމަށް ސިވިލް ކޯޓުން ހުކުމްކޮށްފައިވެ އެވެ.
ބްރޯޑްކާސްޓުކުރާ ތަނުގެ ހުއްދަ ނެތި ޗެނަލްތައް ބްރޯޑްކާސްޓުކުރުމަކީ ކޮޕީ ރައިޓްސް ގާނޫނާ ވެސް ހިލާފު ކަމެކެވެ.
