ރާއްޖޭގެ މީޑިއާގައި މަސައްކަތްކުރާ މީހުންގެ ރައްކާތެރިކަން ކަށަވަރުކުރުމަށް ޓަކައި ގާނޫނީ އޮނިގަނޑެއް އެކުލަވާލުން މުހިންމު ކަމަށް އިންޓަނޭޝަނަލް ފެޑަރޭޝަން އޮފް ޖާނަލިސްޓްސް (އައިއެފްޖޭ) އިން ބުނެފި އެވެ.
އައިއެފްޖޭގެ ވަފުދެއް މިދިޔަ ހަފްތާގައި ރާއްޖެއަށް ކުރި ޒިޔާރަތެއްގައި ވަނީ ނޫސްވެެރިންނާއި މީޑިއާގައި މަސައްކަތް ކުރާ ގިނަ ބަޔަކާ ބައްދަލުކޮށް، އެ މީހުންގެ ކަންބޮޑުވުންތައް އޮޅުން ފިލުވާފަ އެވެ.
އެއަށް ފަހު އައިއެފްޖޭއިން ނެރުނު ރިޕޯޓުގައި ބުނެފައިވާ ގޮތުގައި ނޫސްވެރިކަމުގެ މިނިވަންކަމަށް ކުރިއެރުން ލިބި އަދި އެކަމަށް ސަރުކާރުން ގިނަ ވައުދުތަކެއް ވެފައި ވީ ނަމަވެސް ނޫސްވެރިންނަށް އަދިވެސް ރާއްޖޭގައި ގިނަ ހުރަސްތަކެއް އަންނަނީ ކުރިމަތިވަމުންނެވެ.
އައިއެފްޖޭއިން ފާހަގަކޮށްފައިވާ ބައެއް ކަންކަމުގެ ތެރޭގައި ހިމެނެނީ:
- ނޫސްވެރިޔާގެ މައްޗަށް ނުވަތަ މީޑިއާއަކަށް މަސްދަރު ހާމަކުރަން މަޖުބޫރުކުރެވޭ ގޮތަށް ހެއްކާ ބެހޭ ބިލުގައި އޮތުން
- މޯލްޑިވްސް ބްރޯޑްކާސްޓިން ކޮމިޝަނާއި ޕަބްލިކް ސާވިސް މީޑިއާއަށް ސިޔާސީ މީހުން އައްޔަންކުރުމުގެ ސަބަބުން އެ ތަންތަނަށް ސިޔާސީ ނުފޫޒު ފޯރުން
- ނޫސްވެރިންގެ މުސާރައިން އުނިކުރުމުގެ އުސޫލެއް ފުޅާ ދާއިރާއެއްގައި ގެންގުޅުމުގެ ސަބަބުން މަސައްކަތްތެރިކަމުގެ ހައްގުތައް ނިގުޅައިގަތުން
- ނޫސްވެރިންނަށް ޕްރޮފެޝަނަލް ތަމްރީނުގެ ފުރުސަތުތަކާއި މީޑިއާގެ ހައްގުތަކާއި ޒިންމާތަކާ ގުޅޭ ގޮތުން ހޭލުންތެރިކަން އިތުރުކުރުމުގެ ތަމްރީނުގެ ފުރުސަތުތައް ނެތުން
- އެކަށީގެންވާ މުއްދަތެއްގައި މައުލޫމާތު ނުލިބުމާއި ސަރުކާރާއި ދައުލަތުގެ އެކި ޑިޕާޓްމަންޓްތަކުން މައުލޫމާތު ހޯދައި ލިބިގަތުމަށް ދިގު މުއްދަތެއް ހޭދަވުން
އައިއެފްޖޭގެ ރިޕޯޓުގައި ވަނީ ބައިނަލްއަގްވާމީ މިންގަނޑުތަކާ އެއްގޮތްވާ ގޮތުގެ މަތިން މުރާޖައާ ކުރެވިފައިވާ ނޫސްވެރިންގެ ސުލޫކީ މިންގަނޑެއްގެ ބޭނުންތެރިކަން ފާހަގަކޮށްފަ އެވެ.
އަދި، މީޑިއާތަކުގައި މަސައްކަތްކުރާ ފަރާތްތައް ހިމެނޭ ގޮތަށް މަސައްކަތްތެރިންގެ ހައްގުތައް ހިމާޔަތްކުރުމަށް އިންޑަސްޓްރިއަލް ނުވަތަ ގާނޫނީ އޮނިގަނޑެއް ނެތުމުން ގިނަ މައްސަލަތަކާ ކުރިމަތިވާ ކަން ފާހަގަކޮށް، އެ ކަމުގެ މުހިންމު ކަން ވެސް ފާހަގަކޮށްފައިވެ އެވެ.
"ރާއްޖޭގެ މީޑިއާގެ ދާއިރާ އަދިވެސް އޮތީ ވަރަށް ބޮޑަށް ސިޔާސީ ވެފައި، މީޑިއާގެ ހައްގުތަކާއި މީޑިއާގެ މިނިވަންކަން ސިޔާސީ ނުފޫޒުން އެއްކިބާ ވެފައިވާ ކަން ކަށަވަރުކުރުމަށް ޓަކައި މީޑިއާގެ ހައްގުތަކާއި މީޑިއާގެ މިނިވަންކަން ދިފާއު ކުރުމަށް މިއަށް ވުރެ ވެސް ގިނަ މަސައްކަތްތަކެއް ކުރަން ޖެހޭ،" އައިއެފްޖޭގެ ރިޕޯޓު ނިންމާލަމުން ފާހަގަކޮށްފައިވެ އެވެ.
