ރައީސް އޮފީހުގެ ތަރުޖަމާނަކަށް ފޮރިން މިނިސްޓްރީގެ ކުރީގެ ކޮމިއުނިކޭޝަން ޑިރެކްޓަރު މުހައްމަދު މިއުވާން ހަމަޖައްސައިފި އެވެ.
ރައީސް އޮފީހުގެ ތަރުޖަމާނު ކަމަށް އޭނާ ހަމަޖައްސާފައިވާކަން އެ އޮފީހުން ވަނީ "އަދަދު"އަށް ކަށަވަރުކޮށްދީފަ އެވެ.
މިއުވާން އެ މަގާމަށް އައްޔަން ކުރެއްވީ، އެ މަގާމުގައި ކުރިން ހުންނެވި މުހައްމަދު މަބްރޫކް އަޒީޒް އިސްތިއުފާ ދެއްވުމާ ގުޅިގެންނެވެ.
މަބްރޫކް އިސްތިއުފާ ދެއްވުމަށްފަހު ކުރެއްވި ޓްވީޓެއްގައި ވަނީ ތަރުޖަމާނު ކަމުގެ މަގާމުގައި ދައުލަތަށް ހިދުމަތް ކުރެއްވުމުގެ ފުރުސަތު ލިބިވަޑައިގެންނެވުމުން އެކަމަށް އުފާ ކުރައްވާ، އެކުގައި މަސައްކަތް ކުރި އެންމެނަށް ޝުކުރު ދަންނަވާފަ އެވެ.
މަބްރޫކް ވިދާޅުވީ އޭނާ އިސްތިއުފާ ދެއްވުމަށް ނިންމެވިތާ ދެތިން މަސް ވެފައިވާ ކަމަށާއި، އިސްތިއުފާ ދެއްވުމައިގެން ކުރިއަށް ވަޑައިގެންނެވީ ރައީސް ސޯލިހްގެ އެއްބާރުލުމާއެކު ކަމަށެވެ.
މީގެ އިތުރުން މަބްރޫކް ވަނީ ތަރުޖަމާނުގެ މަގާމަށް އަލަށް ވަޑައިގެންނެވި މިއުވާނަށް ތައުރީފު ކުރައްވާފަ އެވެ. އޭނާ ވިދާޅުވީ މިއުވާނަކީ މޮޅު ނޫސްވެރިއެއް ކަމަށާއި، ކާމިޔާބު ސަރުކާރުގެ ކޮމިއުނިކޭޝަން އޮފިޝަލެއް ކަމަށެވެ.
ރައީސް އޮފީހުގެ ތަރުޖަމާނު ކަމަށް މިއުވާން އައްޔަން ކުރެއްވުމުގެ ކުރިން އޭނާ ހުންނެވީ މި ސަރުކާރުގެ ފޮރިން މިނިސްޓްރީގެ ކޮމިއުނިކޭޝަން ޑިރެކްޓަރު ކަމުގެ މަގާމުގަ އެވެ. އޭގެ ކުރިން އޭނާ ވަނީ ރާއްޖެ ޓީވީގައި ނޫސްވެރިއެއްގެ ގޮތުގައި ގިނަ ދުވަހު މަސައްކަތް ކުރައްވާފަ އެވެ.
