ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުކަމުން ސުހެއިލް އަހުމަދު އިސްތިއުފާ ދެއްވައިފި އެވެ.
އޭނާ އެ މަގާމަށް އައްޔަނުކުރީ ރައީސް އިބްރާހިމް މުހައްމަދު ސޯލިހުގެ ވެރިކަން ފެށުނުތަނާ، 2018 ޑިސެމްބަރު 30ގަ އެވެ.
ސުހައިލް އިސްތިއުފާ ދެއްވީ މިދިޔަ ބުރާސްފަތި ދުވަހު ކަން ޔަގީންވެފައިވީ ނަމަވެސް އިސްތިއުފާ ދެއްވި ސަބަބު ސާފެއް ނުވެ އެވެ.
ސުހައިލަކީ އެޗްޑީސީ އުފެދުނީއްސުރެ އެ އިދާރާގައި ވަރަށް ގިނަ ދުވަސްތަކެއް ވަންދެއް މަސައްކަތް ކުރެއްވި ބޭފުޅެކެވެ. އަދި އޭނާ ވަނީ މީގެ ކުރިން 2012 އިން 2015އާ ދެމެދު އެޗްޑީސީގެ މެނޭޖިން ޑިރެކްޓަރުކަން ވެސް ކުރައްވާފަ އެވެ.
އޭނާ އެ މަގާމުން އިސްތިއުފާ ދެއްވީ ރައީސް އަބްދުﷲ ޔާމީންގެ ވެރިކަމުގަ އެވެ. އޭރު އޭނާ އިސްތިއުފާ ދެއްވީ ސިއްހީ ކަންކަން ހުރި ގޮތުން ވަޒީފާގައި ހުރުމަށް އުޒުރުވެރިވާ ކަމަށް ވިދާޅުވެ އެވެ.
ސުހެއިލް އެމްޑީގެ މަގާމުން އިސްތިއުފާ ދެއްވުމުން ހުޅުމާލޭގެ ހުރިހާ ކަމެއް ބަލަހައްޓާ އެޗްޑީސީ ހިންގުމާ މި ވަގުތު ހަވާލުވެ ހުންނެވީ ޑެޕިއުޓީ މެނޭޖިން ޑިރެކްޓަރު އަހުމަދު އާތިފެވެ.
