މިހާރު ކުރިއަށްދާ އެމްޑީޕީ ކޮންގްރެސްއަށް ހުށަހަޅާފައިވާ އިސްލާހުތަކަށް ހާމަކޮށް ވޯޓު ނަގަން ފާސްކޮށްފި އެވެ.
އެމްޑީޕީ ކޮންގްރެސްގެ މިއަދުގެ ދެވަނަ ސެޝަނުގައި މިގޮތަށް ނިންމީ ކޮންގްރެސްގެ ބައިވެރިންގެ މެދުގައި ނެގި ސިއްރު ވޯޓެއްގަ އެވެ. އެގޮތުން ވޯޓުގައި ބައިވެރިވި 1134 މީހުންގެ ތެރެއިން 876 މީހުން ވަނީ ހާމަ ވޯޓެއް ނެގުމަށް ތާއިދުކުރި އެވެ.
ވޯޓުގައި ބައިވެރިވި 876 މީހުން ހާމަ ވޯޓަކަށް އެއްބަސްވިއިރު، ސިއްރު ވޯޓެއް ނެގުމަށް ތާއިދު ކުރީ 258 މީހުންނެވެ.
ހުކުރު ދުވަހުގެ ރޭ ފެށި އެމްޑީޕީ ކޮންގްރެސްގައި އަސާސީ ގަވައިދަށް އިސްލާހުތައް ހުށަހެޅުމާއި، ބަހުސް ކުރުން ކުރިއަށް ގެންދިޔައީ މިއަދުގެ ސެޝަންތަކުގަ އެވެ.
މިއަދު ހެނދުނުގެ ސެޝަންގައި އެމްޑީޕީގެ އަސާސީ ގަވައިދަށް ގިނަ އިސްލާހުތަކެއް ހުށަހަޅާ، ބަހުސް ކުރިއިރު ކޮންގްރެސް ހޫނުވީ، ގަވައިދާ ހިލާފަށް ގޮފިތައް އުފައްދައިގެން އެމްޑީޕީގެ ކޮންގްރެސްގައި މަންދޫބުން ބައިވެރިވެފައިވާ ކަމަށް އެމްޑީޕީގެ ރައީސް މުހައްމަދު ނަޝީދު ތުހުމަތު ކުރެއްވުމުންނެވެ.
ކޮންގްރެސްއަށް ހުށަހަޅާފައިވާ އިސްލާހުތަކަށް ނަގާނީ ހާމަ ވޯޓެއްތޯ ނުވަތަ ސިއްރު ވޯޓެއްތޯ ނިންމުމަށް ޥޯޓު ނަގަމުން ދިޔަ ވަގުތު ޕާޓީގެ އިސް ލީޑަރު އަދި ރައީސް އިބްރާހިމް މުހައްމަދު ސޯލިހާއި ޕާޓީގެ ރައީސް މުހައްމަދު ނަޝީދު ވަނީ ކުއްލި މަޝްވަރާއެއް ކުރައްވައިފަ އެވެ.
ދެ ރައީސުންގެ ދެމެދުގައި ކުރެއްވި މަޝްވަރާތަކަށްފަހު، ދެ ބޭފުޅުންގެ ފެކްޝަނުގެ މެންބަރުންނާއެކު މަޝްވަރާ ކުރައްވާ، ސްޓޭޖަށް ވަޑައިގެން ޗެއާޕާސަން ފައްޔާޒާ މަޝްވަރާ ކުރެއްވުމަށްފަހު ދެ ރައީސުން މަޝްވަރާ ކުރެވުނު ކަމަށް އެއްބަސްވެވުނުކަން ދޭހަވާ ގޮތަށް ވަނީ ސަލާމް ކުރައްވައިފަ އެވެ. އެއާއެކު އެ ވަގުތު ހޯލްގައި ތިބި ގިނަ ކޮންގްރެސްމަނުން ވަނީ އަޑުގަދަކޮށް ތަރުހީބު ދީފަ އެވެ.
އެއަށްފަހު ނަޝީދުގެ ގާތް ބޭފުޅަކު "އަދަދު"އަށް ވިދާޅުވި ގޮތުގައި ރައީސް އިބްރާހިމް މުހައްމަދު ސޯލިހާ އެކު ކޮންގްރެސްގެ ތެރޭން މަޝްވަރާ ކުރައްވާފައިވަނީ އެކުގައި ދެވޭނެ ގޮތެއް ހޯދުމަށެވެ. އަދި, އެކަމަށް ދެ ރައީސުން ވެސް އެއްބަސްވެފައިވާ ކަމަށެވެ. އެގޮތުން، ރާއްޖޭގެ ވެރިކަން ހިންގާ ނިޒާމް ބަދަލުކުރުމަށް ރައްޔިތުންގެ ފެންނަ ނުފެންނަ ވޯޓެއް ނެގުމާ ގުޅޭ ގޮތުން ނަޝީދު, އެ ޕާޓީގެ ކޮންގްރެސްއަށް ހުށަހެޅުއްވި ގަރާރު ނަގަން އެއްބަސްވެފައިވާކަން ވަނީ ކަށަވަރުވެފަ އެވެ.
