ގދ. ނަޑެއްލާގެ އާ އިންޖީނުގޭގެ މަސައްކަތް މި މަހުގެ 14 ގައި ފެނަކަ ކޯޕަރޭޝަނުން ނިންމާލައި، ހިދުމަތް ދޭން ފެށުން ވެގެން ދިޔައީ އެ ރަށުގެ ރައްޔިތުންގެ އެތައް އަހަރެއްގެ ދައްޗަކަށް ހަލެއް ލިބިގެން ދިޔަ ދުވަހަކަށެވެ.
ހިތްގައިމު ބިޔަ އާ އިމާރާތަކަށް ފުޅަދޫގެ ކަރަންޓުގެ ހުރިހާ މަސައްކަތެއް ބަދަލުކޮށް، 538 ކިލޯވޮޓުގެ ޖަނަރޭޓަރެއް ބޭނުންކޮށްގެން އެރަށަށް ކަރަންޓުގެ ހިދުމަތް ފެނަކަ ކޯޕަރޭޝަނުން ދޭން ފެށުމާއެކު، އެ ރަށުގެ ގިނަ ބަޔަކު ތިބީ އެ މަސައްކަތާ ދޭތެެރޭ ހިތްހަމަޖެހިގެންކަމަށް ނަޑެއްލާ ކައުންސިލްގެ ރައީސް މުހައްމަދު އަންޝައު ވިދާޅުވި އެވެ.
"ވަރަށް ދުވަހުގެ ދަތިތަކަކަށް ހައްލެއް މި ލިބިގެންދިޔައީ. އެއީ އެހެން އުޅެފަ ކަރަންޓު ކެނޑި، ހިދުމަތް ނުލިބި، އަގުބޮޑެތި މުދާތަކަށް ގެއްލުން ލިބި އެކަހަލަ ކަންކަން ވެސް ވި. އެހެންވީމަ މިއީ ހަމަ ލިބިގެންދިޔަ ވަރަށް ބޮޑު ފަސޭހައެއް،" އޭނާ ވިދާޅުވި އެވެ.
އެ ރަށުގެ އިންޖޫމުގެ މީގެ ކުރިން ހުރީ ރަށުގެ މެދުގަ އެވެ. މިހާރު އާ އިންޖީނުގެ ރަށު މެދުން ބޭރުގައި ހުރުމުން، އަޑުގެ އުނދަގުލާއި ދުމުގެ އަސަރުން ވެސް ރައްޔިތުންނަށް އިތުރު ދަތިތަކާއި ކުރިމަތިނުވާނެތީ، އެކަމާ ވަރަށް އުފާ ކުރާކަމަށް ވެސް އޭނާ ވިދާޅުވި އެވެ.
"އިންޖީނުގެ ހުންނަ ސަރަހައްދުގަ ދިރިއުޅޭ މީހުން ވާރޭ ފެން ނުނެގިގެންވެސް އުޅޭނެ. ދުމުގެ އަސަރުކުރާތީ. އެކަމަށްވެސް ލިބުނު ހައްލެއް މިއީ."
ފެނަކަ އިން ބުނީ އަލަށް އިމާރާތްކުރެވުނު އިންޖީނުގޭގެ އޮފީސް ބައިގައި މީޓިން ރޫމަކާއި މެނޭޖަރު ރޫމަކާއި ރިސެޕްޝަން އަދި ލޮބީ ހިމެނޭ ކަމަށެވެ. އަދި ޖެނެރަލް އޮފީހަކާއި ގުދަނެއްގެ އިތުރުން 4 ފާހާނަ ހިމެނޭ ކަމަށް ފެނަކައިން ބުނެ އެވެ.
155 ރަށުގައި ފެނަކައިން ހިދުމަތް ދެމުން އަންނައިރު ފެނަކައިން އަންނަނީ މީހުން ދިރިއުޅެމުންދާ ސަރަހައްދާ ދުރުގައި އާ އިންޖީނުގެ އިމާރާތްކޮށް އެތަންތަނަށް ރަށްރަށުގެ އިންޖީނުގެތަށް ބަދަލުކުރުމުގެ މަސައްކަތްތައް ކުރަމުންނެވެ.
