ސައްބީސް އަހަރަށް ފަހު ހއ. އުލިގަމުގައި ފެނަކަ ކޯޕަރޭޝަން ލިމިޓެޑް އިން އާ އިންޖީނުގެއެއް އަޅައި ކަރަންޓުގެ ހިދުމަތް ދޭން ފަށައިފި އެވެ.
އެރަށަށް މިވަގުތު ދިމާވެފައިވާ އެންމެ ބޮޑު އެއް މައްސަލައަކީ ކަރަންޓުގެ މައްސަލަ އެެވެ. މިހާތަނަށް ކަރަންޓްގެ ހިދުމަތް އެރަށުގައި ދެމުން އައީ ރަށުގެ މީހުން ދިރިއުޅޭ ސަރަހައްދުގައި ހުރި ކުޑަކުޑަ ބާ އިންޖީނުގެއަކުންނެވެ.
ޖާގައިގެ ދަތިކަމުގެ އިތުރުން އަޑު ގަދަ ކަމުން ހަމަނިދި ނުލިބޭ އެތައް ބަޔަކު އުޅެ އެވެ. އިންޖީނުގެއިން ދުވާ ތެޔޮވަހުން ވެސް އެތައް ބަޔަކަށް އޭގެ ނޭދެވޭ އަސަރު ކުރެ އެވެ.
މި ހުރިހާ ދައްޗަކާއެކު ދިރިއުޅެމުން އައި އުލިގަމު ރައްޔިތުންނަށް މިހާރު މިވަނީ އެކަމުން އަރައި ގަނެވިފަ އެވެ. އުލިގަމުގެ އިންޖީނުގެ އެކަހެރި ސަރަހައްދަކަށް ބަދަލު ކުރުމުގެ މަޝްރޫއުގެ އަމަލީ މަސައްކަތް ފަށާފައިވަނީ 2019 ވަނަ އަހަރުގެ ނޮވެމްބަރު މަހުގެ 13 ވަނަ ދުވަހު އެވެ.
އުލިގަމުގައި 26 އަހަރުވަންދެން މީހުން ދިރިއުޅޭ ގެތަކުގެ ތެރޭގައި ގެދަބުޅި އަރުވަމުން ދިޔަ ކުރީގެ އިންޖީނުގެ ބަންދު ކުރުމަށް ފަހު އާ އިންޖީނުގެއިން ހިދުމަތް ދޭން ފެށީ މި މަހުގެ 14ގަ އެވެ.
މީހުން ދިރިއުޅޭ ސަރަހައްދާ ދުރުގައި ގާއިމްކޮށްފައިވާ އާ އިންޖީނުގޭގައި ބަހައްޓާފައިވަނީ 458 ކިލޯވޮޓްގެ ކެޕޭސިޓީގެ އިންޖީނެކެވެ. މި އިންޖީނުގެ ފަރުމާ ކޮށްފައިވަނީ 400 ކިލޯވޮޓްގެ ޖެންސެޓް ބެހެއްޓޭ ގޮތަކަށް ކަމަށް ފެނަކައިން ބުނެ އެވެ.
މިހާރު އާ އިންޖީނުގެ މައި އަވަށުން ބޭރުގައި ހުރުމުން، އަޑުގެ އުނދަގުލާއި ދުމުގެ އަސަރުން ވެސް ރައްޔިތުންނަށް އިތުރު ދަތިތަކާއި ކުރިމަތިނުވާނެތީ، އެކަމާ ވަރަށް އުފާ ކުރާކަމަށް ވެސް ހައްސާން ވިދާޅުވި އެވެ.
ފެނަކަ ކުންފުނިން އުލިގަމުގައި ތަރައްގީ ކުރި އާ އިންޖީނުގެއާ އެއްކޮށް ވަނީ އެ ރައްޔިތުންގެ ވޭންދެނިވި ހިތްދަތިކަމަށް ހިނިތުންވުމާ އުފާވެރިކަން އައިސްފަ އެވެ.
ރަށްރަަށުގައި ރައްޔިތުންނަށް އުނދަގޫވާ ގޮތަށް ރަށުތެރޭގައި ހިންގަމުން ދިޔަ އިންޖީނުގެތައް، ރައްޔިތުންނަށް އުނދަގޫ ނުފޯރާ ހިސާބަށް ބަދަލުކުރުމާއި އައު އިންޖީނުގެތައް އެޅުމާއި ކަރަންޓް ނެޓްވޯކް އަޕްގެރޭޑް ކުރުމަކީ މި ސަރުކާރުގެ މުހިންމު ސިޔާސަތެކެވެ.
އެގޮތުން އަތޮޅު ތެރޭގައި ފެނަކައިން ހިދުމަތްދޭ ގިނަ ރަށްރަށުގައި އައު އޮފީސް އިމާރާތްތަކާއި އައު އިންޖީނުގޭ އިމާރާތްކުރުމުގެ ގިނަ މަޝްރޫއުތަކެއް އެކުންފުނިން އަންނަނީ ހިންގަމުންނެވެ.
