ހުޅުމާލޭ ފޭސް ޓޫ ސަރަހައްދުން 74 ބިން ވިއްކަން ނިންމައި، ބީލަމަށް ހުޅުވާލައިފި އެވެ.
އެޗްޑީސީން މިއަދު ކުރި އިއުލާނެއްގައި ބުނީ ދިިރިއުޅުމުގެ ބޭނުމަށް މިފަހަރު ވިއްކަން ނިންމާފައިވަނީ 1095 އަކަފޫޓާއި 2588 އަކަފޫޓާ ދެމެދުގެ ގޯތި ކަމަށެވެ.
ވިއްކަން ނިންމާފައިވަނީ އަތިިރިމައްޗާ ކުރިމަތިން(ބީޗް ފްރޮންޓް) 22 ބިމެވެ. އެ ބިންތަކުގެ ބީލަން ފެށޭ އަގަކީ 6،500ރ. އެވެ. އަދި، އަތިރިމައްޗާ ކައިރިން (ބީޗް ސައިޑް)ގެ 52 ބިންތަކުގެ ބީލަން ފެށޭ އަގަކީ 5.500ރ. އެވެ.
ބިން ދޫކުރުމަށް ނިންމާފައިވާ ސަރަހައްދު--
ބިން ވިއްކުމުގެ އުސޫލުގައިވާ ގޮތުން މީގެ ކުރިން އެޗްޑީސީން ވިއްކި ބިމެއް ގަނެފައިވާ މީހަކަށް ނުގަނެވޭނެ އެވެ. އަދި ކޮންމެ މީހަކަށް ވެސް ގަނެވޭނީ އެއް ބިމެވެ. އަދި ބިން ގަންނަ މީހަކީ މާލެ ސަރަހައްދުން ދިރިއުޅުމުގެ ބޭނުމަށް 600 އަކަފޫޓަށް ވުރެ ބޮޑު ބިމެއް ނުވަތަ ގޯއްޗެއް ރަޖިސްޓްރީކޮށްފައި ނެތް މީހަކަށް ވެސް ވާން ޖެހޭނެ ކަމަށް ބުނެފައިވެ އެވެ.
އަންނަ އާދިއްތަ ދުވަހުން ފެށިގެން އަންނަ މަހުގެ އެއް ވަނަ ދުވަހުގެ ނިޔަލަށް ބީލަމަށް ފޯމު ހުށަހެޅުމުގެ ފުރުސަތު ހުޅުވާލާފައިވާއިރު، ބީލަން ފޯމު ހުށަހެޅުން އޮންނާނީ އަންނަ މަހުގެ 11 އަދި 12 ވަނަ ދުވަހު އެވެ.
އެޗްޑީސީން މި އަހަރުގެ ކުރީކޮޅު ވެސް ފޭސް ދޭއް ސަރަހައްދުން 60 ބިން ވިއްކާފައިވެ އެވެ.
