އުކާލާ ޕްލާސްޓިކް، ރިސައިކަލް ކުރުމަށް ޓަކައި އެއްކުރާނެ ތަނެއް އަޅަން، އެޗްޑީސީން މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) އަށް ހުޅުމާލޭން ބިމެއް ހަމަޖައްސައިދޭން، ހައުސިން ޑިވެލޮޕް ކޯޕަރޭޝަން (އެޗްޑީސީ) އެއްބަސްވެއްޖެ އެވެ.
ރިސައިކަލް ކުރުމަށް ޓަކައި އެއްކުރާ ތަކެތި ރައްކާކުރާނެ ތަނެއް އަޅަން މޯޕާއާ ބިން ހަވާލުކޮށް، އެކަމާ ބެހޭ އެމްއޯޔޫގައި ސޮއިކުރީ އެޗްޑީސީގެ އޮފީހުގައި މިއަދު ބޭއްވި ރަސްމިއްޔާތެއްގަ އެވެ. އެ އެމްއޯޔޫގައި އެޗްޑީސީގެ ފަރާތުން ސޮއިކުރެއްވީ ޑެޕިއުޓީ މެނޭޖިން ޑިރެކްޓަރު އަހުމަދު އާތިފެވެ. މޯޕާގެ ފަރާތުން ސޮއިކުރެއްވީ އެެ ޖަމާއަތުގެ ރައީސް އަދި ކުރީގެ އެންވަޔަރްމެންޓް މިނިސްޓަރު ތޯރިގު އިބްރާހީމެވެ.
މޯޕާއިން ބުނީ ކަނޑުތަކުން ޕްލާސްޓިކް މަދުކުރުމުގައި އެޖަމާއަތާއި އެެޗްޑީސީ ގުޅިގެން މަސައްކަތްކުރަން، މިއަދު ސޮއިކުރި އެމްއޯޔޫއިން މަގުފަހިވާނެ ކަމަށެވެ. އެ އެމްއޯޔޫގެ ދަށުން އެޗްޑީސީން ހަމަޖައްސައިދިން ބިމުގައި މޯޕާއިން ގާއިމްކުރާ ފެސިލިޓީ ވާނީ ޕެޓްފުޅި އެއްކޮށް، ރިސައިކަލް ކުރަން ގެންދިއުމަށްޓަކައި ބަންދުވެސް ކުރާ ތަނަކަށް ކަމަށް ވެސް އެޖަމާއަތުން ބުންޏެވެ.
އެޗްޑީސީއާއެކު ސޮއިކުރި އެމްއޯޔޫގެ ދަށުން މޯޕާއިން ކުރަން ޖެހޭ އެއްކަމަކީ ކަމަކީ ހުޅުމާލާގެ ފޭސް އެެކަކާއި ފޭސް ދޭއްގައި ޖުމްލަ 345 ޑަސްބިން ބަހައްޓައިގެން ޕެޓްފުޅިއާއި އާއްމު އެހެން ކުނި އެއްކުރުމެވެ. ދެވަނަ ކަމަކީ ހުޅުމާލޭގެ ގޮނޑުދޮށުން އެޗްޑީސީން ކަނޑައަޅާ 500 މީޓަރުގެ ސަރަހައްދެއް އަހަރަކު ހަތަރު ފަހަރު ދެމެހެއްޓެވި ގޮތަކަށް ސާފުކުރުމެވެ.
ކުނީގެ ބާވަތްތައް ވަކިކުރުމާއި ރަނގަޅު ގޮތުގައި ކުނި މެނޭޖްކުރުން އަދި ސިންގަލް ޔޫޒް ޕްލާސްޓިކް މަދުކުރުމަށް ޓަކައި ޒުވާނުން ހޭލުންތެރިކުރުވައިގެން އާދަކާދަ ބަދަލުކުރުމުގެ ކެމްޕޭންތައް ހިންގުމަކީ ވެސް މޯޕާއިން ކުރަން އެމްއޯޔޫ ލާޒިމްކުރާ މުހިއްމު މަސައްކަތެކެވެ.
ކަނޑުތަކުން ޕްލާސްޓިކް މަދުކުރަން މޯޕާއިން ކުރާ މަސައްކަތަށް އެޗްޑީސީން ދިިން މި އެއްބާރުލުމަށް ޓަކައި އެެެޖަމާއަތުގެ ރައީސް ތޯރިގު މިއަދު އެެޗްޑީސީގެ މެނޭޖްމަންޓަށާއި މުވައްޒަފުންނަށް ޝުކުރު އަދާކުރެއްވި އެވެ. އެޗްޑީސީގެ ޑީއެމްޑީ ވިދާޅުވީ ސިންގަލް ޔޫޒް ޕްލާސްޓިކް މަދުކުރަން ކުރާ މަސައްކަތަށް އެޗްޑީސީން އެއްބާރުލުން ދޭނެ ކަމުގެ ޔަގީންކަން އަނެއްކާވެސް ދެއްވާ ކަމަށާއި އެކަހަލަ ކޮންމެ މަސައްކަތެއްގައި އެ ކޯޕަރޭޝަނުން ބައިވެރިވާނެ ކަމަށެވެ.
