ޖަރުމަނު ވިލާތުގައި ހުންނަވާ ސަފީރު އާއިޝަތު ޝާން ޝާކިރު، އިތުރު ހަ ގައުމެއްގެ ނޮން-ރެޒިޑެންޓު ސަފީރުކަމަށް އައްޔަން ކުރުމަށް ރައްޔިތުންގެ މަޖިލީހަށް ފޮނުވައިފި އެވެ.
ރައްޔިތުންގެ މަޖިލީހަށް ރައީސް އިބްރާހިމް މުހައްމަދު ސޯލިހު މިއަދު ފޮނުއްވާފައިވާ މައްސަލައިގައި ވަނީ ފޮރިން ސާވިސް ގާނޫނުގެ 14 ވަނަ މާއްދާގެ ދަށުން ހަ ގައުމަކަށް ޝާން އައްޔަން ކުރުމަށެވެ.
މި މައްސަލަ ދިރާސާކުރުމަށް ހާރިޖީ ކޮމިޓީއަށް ވަނީ މިއަދު ފޮނުވާފަ އެވެ.
ޖަރުމަނަށް ރާއްޖޭން ކަނޑައަޅާފައި ހުންނަވާ ސަފީރުކަމަށް އައްޔަންކުރުމުގެ ކުރިން އާއިޝަތު ޝާން ހުންނެވީ ޗީފް އޮފް ޕްރޮޓޮކޯލްގެ މަގާމުގަ އެވެ. އޭނާއަކީ ރާއްޖޭގެ ފުރަތަމަ އަންހެން ޗީފް އޮފް ޕްރޮޓޮކޯލް އެވެ.
އޭނާ ޖަރުމަނު ސަފީރު ކަމަށް އައްޔަން ކުރެއްވީ މިދިޔަ އޭޕްރިލް މަހުގެ ފަހުކޮޅު އެވެ.
