ޖިނާއީ އިޖުރާއަތުގެ ގާނޫނުގައި ހަތް ދުވަހުގެ މުއްދަތުގެ ތެރޭގައި ނިންމަން ޖެހޭ މައްސަލަތަކަށް ކޯޓުގެ ގިނަ ވަގުތުތަކެއް ހޭދަކުރަން ޖެހޭތީ މައުޟޫއީ ގޮތުން ނިންމަން ޖެހޭ މައްސަލަތައް ލަސްވެގެން ދާނެ ކަމަށް ހައި ކޯޓުގެ ފަނޑިޔާރު މުހައްމަދު ނިޔާޒު އިއްޔެ ވިދާޅުވެއްޖެ އެވެ.
ފަނޑިޔާރު ނިޔާޒު އެހެން ވިދާޅުވީ އެ ކޯޓުން ބަލަމުންދާ މަދަނީ މައްސަލައެއްގައި ބޭއްވި އަޑުއެހުމެއްގަ އެވެ. އެއީ ވާދީ ޓްރޭޑާސް ޕްރައިވެޓް ލިމިޓެޑް ކިޔާ ކުންފުންޏަކާ ދެކޮޅަށް ޝަހުދު އިބްރާހީމް މަނިކު ނަމަކަށް ކިޔާ މީހަކު ދައުވާ ކުރާ މައްސަލައެކެވެ.
އެ މައްސަލާގައި ހިމެނޭ އެއް ހަސްމުގެ ދިފާއީ ވަކީލަކު ވަނީ އެ މައްސަލަ ހައި ކޯޓުގައި ލަސްވަމުން ދާތީ ޝަކުވާ ކޮށްފަ އެވެ. މި މައްސަލަ ހައި ކޯޓަށް ހުށަހެޅިތާ އަހަރަކަށް ވުރެ ގިނަ ދުވަސް ވެއްޖެ އެވެ.
އެކަމާ ގުޅިގެން ފަނޑިޔާރު ނިޔާޒު ވިދާޅުވީ، މައުޟޫއީ މައްސަލަތަކަށް ވަގުތު ހުސް ކުރެވޭނީ ހަތް ދުވަހުގެ ތެރޭގައި ނިންމަން ޖެހޭ މައްސަލަތަކަށް ވަގުތު ދިނުމަށް ފަހު ކަމަށެވެ.
"ގާނޫނަކުން ވަކި މައްސަލަތަކަށް މުއްދަތެއް ކަނޑައެޅުމުން އިސްކަން ދެވޭނީ އެ މައްސަލަތަކަށް ނޫންތޯ، ނޫނީ މުއްދަތު ހަމަވެގެން ދާނެ،" ފަނޑިޔާރު ނިޔާޒު ވިދާޅުވި އެވެ.
އޭނާ ވިދާޅުވި ގޮތުގައި، އެ ކަން މެނޭޖު ކުރެވެން އަންނަނީ ފަނޑިޔާރުންނާއި ވަސީލަތްތައް އިތުރުކޮށްގެން ނޫނީ ގާނޫނުގައިވާ މުއްދަތަށް ބަދަލެއް ގެނެސްގެނެވެ.
".. އެ ކަންކަމަކީ އަޅުގަނޑުމެން [ފަނޑިޔާރުންގެ] އަތް މަތީގައި އޮތް ކަމެއް ނޫން،" ފަނޑިޔާރު ވިދާޅުވި އެވެ.
"ހަތް ދުވަހުގެ ތެރޭގައި ނިންމަން ޖެހޭ މައްސަލަތަކަށް ވަގުތު ދީގެން، އެހެން މައްސަލަތަކަށް ވަގުތު ދެވެން އޮތް ވަރު މިއީ،" ފަނޑިޔާރު ނިޔާޒު ވިދާޅުވި އެވެ.
އެ މައުޟޫއަށް ދެން އިތުރަށް ބަހުސް ނުކުރުމަށް ވެސް މައްސަލައިގައި ހިމެނޭ ހަސްމުންގެ ދިފާއީ ވަކީލުންނަށް ފަނޑިޔާރު ނިޔާޒު އެންގެވި އެވެ.
ޝަރީއަތުގެ ކުރިން ހުށަހަޅާ ހުށަހެޅުން ހުށަހެޅުމުގެ މަރުހަލާގައި ކޯޓަކުން ނިންމާފައި ނިންމުމެއް، ގާނޫނު އަސާސީއާ ނުވަތަ ޝަރުއީ އުސޫލަކާ ނުވަތަ ގާނޫނަކާ ހިލާފު ކަމަށް ގަބޫލު ކުރެވިގެން، އެ ކަން ފާހަގަކޮށް، ކަމާ ބެހޭ ފަރާތަކުން އެ ހުކުމެއް އަމުރެއް ނުވަތަ ނިންމުމެއް އިސްތިއުނާފް ކުރެވެ އެވެ. މިފަދަ މައްސަލަތައް ހަތް ދުވަހުގެ ތެރޭގައި ނިންމުމަށް ގާނޫނުގައިވެ އެވެ.
