ރަސްފަންނު ސަރަހައްދުގައި ބާއްވާފައި އޮތް އަތް ދަބަހެއްގެ ތެރޭގައި އޮތް ވޮލެޓަކުން 260ރ. ނެގި މީހަކު ތިން މަހަށް ޖަލަށް ލާން ކްރިމިނަލް ކޯޓުން އިއްޔެ ހުކުމްކޮށްފި އެވެ.
މި ވައްކަން ކޮށްފައި ވަނީ މިދިޔަ އަަހަރުގެ ސެޕްޓެމްބަރު މަހުގެ 21 ގަ އެވެ. އެ މައްސަލައިގައި، ވައްކަން ކުރުމުގެ ދައުވާ ލިބުނު މީހާ ވަނީ ކުށަށް އިއުތިރާފު ވެފަ އެވެ. އަދި މައްސަލަ އަވަހަށް ނިންމައިދިނުމަށް އޭނާ އެދުނެވެ.
މި ކުށަށް ގާނޫނުގައި ކަނޑައެޅިފައިވާ އަސާސީ އަދަބަކީ ހަތަރު މަހާއި 24 ދުވަހަށް ޖަލަށް ލުމެވެ. ނަމަވެސް ކުށަށް އިއުތިރާފު ވެފައިވާތީ އަދަބުގެ އެއް ދަރަޖަ ދަށްވެ އެވެ. އެހެންވެ، ދެން އަންނަ ހުކުމަކީ ތިން މަހާއި 18 ދުވަހަށް ޖަލަށް ލުމެވެ.
ނަމަވެސް އޭނާ ކުރިން ހަ ދުވަސް ބަންދުގައި ހޭދަ ކޮށްފައިވާތީވެ، ކްރިމިނަލް ކޯޓުގެ އިސް ގާޒީ އަހުމަދު ޝަކީލް ކުރެއްވި ހުކުމުގައި ވާނީ މި މައްސަލައިގައި ތުހުމަތުވާ މީހާގެ މައްޗަށް ތަންފީޒު ކުރަން ޖެހޭ ޖަލު އަދަބުގެ މުއްދަތަކީ ތިން މަހާއި 12 ދުވަސް ކަމަށް ކަނޑަޅުއްވާފަ އެވެ.
