މާލޭ ހިތަށްފިނިވާމަގު ރެޑްބީ ފިހާރަ ކައިރީގައި ރޭގެ ވަގުތެއްގައި ހިނގި މާރާމާރީއެއްގައި ދެ މީހަކަށް ހަމަލާދީ ޒަހަމްކޮށްލައިފި އެވެ.
މިކަމާ ގުޅިގެން ފުލުހުން ބުނީ މާރާމާރީއެއް ހިނގިކަމުގެ ރިޕޯޓު ރޭ 21:12 ހާއިރު ލިބިފައިވާ ކަމަށެވެ.
"މި މައްސަލައާ ގުޅިގެން މިހާތަނަށް އެއްވެސް މީހަކު އަދި ހައްޔަރުކޮށްފައެއް ނުވޭ،" ފުލުހުންގެ މީޑިއާ އޮފިޝަލް ވިދާޅުވި އެވެ.
ފުލުހުން ބުނި ގޮތުގައި އަނިޔާވި ދެ މީހުންނަށް ފަރުވާ ދިނުމަށް އޭޑީކޭ ހޮސްޕިޓަލަށް ވަނީ ގެންގޮސްފަ އެވެ.
މި މައްސަލަ އިތުރަށް ތަހުގީގު ކުރަމުން އަންނަ ކަން ފިޔަވައި އިތުރު ތަފްސީލެއް ފުލުހުން ދީފައެއް ނުވެ އެވެ.
މަންޒަރު ދުށް ބައެއްް މީހުން ބުނި ގޮތުގައި އެ މާރާމާރީ ހިންގާފައިވަނީ ސައިކަލުގައި ދިޔަ ބަޔަކު ދެ މީހަކަށް މަރުތޭލުންނާއި ލަކުޑިބުރިން ހަމަލާދީގެންނެވެ.
ސޯޝަލް މީޑިއާގައި ދައުރުވެފައިވާ ވީޑިއޯތަކުން ފެންނަ ގޮތުގައި އެ ސަރަހައްދުގައި ގިނައިން ލޭ އޮހޮރިފައި ހުރިއިރު، ޕާކުކޮށްފައި ހުރި ބައެއް ސައިކަލުތަކަށް ވެސް ގެއްލުން ވެފައިވެ އެވެ.
