މިދިޔަ އަހަރުގެ ޗެމްޕިއަން ކުލަބު ގްރީން ސްޓްރީޓްސް ބަލިކޮށް ގައުމީ ނެޓްބޯޅަ މުބާރާތުގެ ޗެމްޕިއަންކަން ކުޅުދުއްފުށި ޔޫތް ރެކްރިއޭޝަން ކުލަބު (ކޭވައިއާރުސީ) އިން ހޯދައިފި އެވެ.
އެގާރަ ޓީމާ އެކު ގައުމީ ނެޓްބޯޅަ މުބާރާތް ފަށާފައިވަނީ މި މަހުގެ 16 ވަނަ ދުވަހުގަ އެވެ. ދެ ޑިވިޝަނަށް ބަހާލައިގެން ކުޅުނު މުބާރާތުގެ ފުރަތަމަ ޑިވިޝަންގެ ފައިނަލުގައި ވާދަކުރީ ކޭވައިއާރުސީ އަދި އެންމެ ފަހުގެ ޗެމްޕިއަން ގްރީން ސްޓްރީޓްސް އެވެ.
ފައިނަލު މެޗުގެ ކުރިން ލީގު ބުރުގައި ކުޅުނު މެޗުން ގްރީން މޮޅުވި ނަމަވެސް ކޭވައިއާރުސީ ފައިނަލުގެ ފުރަތަމަ ކުއާޓާ އިން ފެށިގެން ތަފާތު ދެއްކި އެވެ. ގްރީނަށް މެޗުގައި ދިމާވި އެންމެ ބޮޑު މައްސަލައަކީ ނިންމަން ލިބުނު ބޯޅަތައް ސްކޯ ނުކުރެވުމެވެ. މިގޮތުން ތަޖުރިބާކާރު ޝޫޓަރު އައިޝަތު ނާޒިމާ އަށް މި މެޗުގައި މާ ބޮޑު ތަފާތެއް ނުދެއްކުނެވެ. ނަތީޖާއެއްގެ ގޮތުން މެޗުގެ ކުރީކޮޅު ކޭވައިއާރުސީ އިން ރަނގަޅު ލީޑެއް ނެގި އެވެ. ފުރަތަމަ ކުއާޓާ ނިމުނުއިރު، 11-17 ގައި ސްކޯ އޮތް ކަމުގައިވިޔަސް ދެ ވަނަ ކުއާޓާގައި ފަރަގު ބޮޑުވި އެވެ. ދެ ވަނަ ކުއާޓާގައި ނެގި ބޮޑު ލީޑާ އެކު ކޭވައިއާރުސީ ފައިނަލް މެޗު ކާމިޔާބުކޮށް ޗެމްޕިއަންކަން ހޯދީ 46-55 އިންނެވެ.
ގްރީން ސްޓްރީޓްސް އާއި ކޭވައިއާރްސީ ކުޅުނު މެޗުގެ ތެރެއިން.--- ފޮޓޯ: ރައީސް އޮފީސް
މެލޭޝިއާގެ ގައުމީ ޓީމްގެ ކުޅުންތެރިޔާ ނޫރް ފަޒްލިޔާނާ ކުޅުނު ގްރީން ކޮޅަށް ސްކޯ ކުރުމުގައި ކޭވައިއާރުސީގެ އައިޝަތު ސަލީމާ ރަނގަޅު ކުޅުމެއް ދެއްކި އެވެ. ފައިނަލު މެޗުގެ އެންމެ ބޮޑު ތަފާތަކަށްވީ މި މެޗުގެ މޮޅު ކުޅުންތެރިޔާގެ މަގާމާއި މުބާރާތުގެ އެންމެ މޮޅު ކުޅުންތެރިޔާގެ މަގާމް ހޯދި މަރިޔަމް ޝިނާއަތެވެ. މުބާރާތުގެ އެންމެ މޮޅު ކުޅުންތެރިންގެ ތެރޭގައިވެސް އޭނާ ހިމެނެ އެވެ.
ފުރަތަމަ ޑިވިޝަންގެ އެންމެ މޮޅު ކުޅުންތެރިންގެ ތެރޭގައި ޝިނާއަތުގެ އިތުރުން ދެން ހިމެނެނީ ކޭވައިއާރުސީގެ ހަމްނާ އަބްދުއްރަހުމާން، މަރިޔަމް ރަނާ، އައިޝަތު ސަލީމާގެ އިތުރުން ގްރީންގެ ފަޒްލިޔާނާ، އާމިނަތު ރީމް ޝާމް އަދި ޝައިނިން ސްޓާގެ އައިޝަތު ޒީކް ޝިހާމް އެވެ.
އެންމެ މޮޅު ކޯޗަކަށް ހޮވުނީ ޗެމްޕިއަން ކޭވައިއާރުސީގެ ކޯޗު ނީޝާ ހަލީމް އެވެ. އެންމެ އުއްމީދީ ކުޅުންތެރިޔަކީ ޝައިނިން ސްޓާގެ އާމިނަތު އައިނީ އެވެ.
މުބާރާތުގެ ދެ ވަނަ ޑިވިޝަންގެ ޗެމްޕިއަންކަން ހޯދީ ޔޫތު ޔުނައިޓެޑް ސްޕޯޓްސް ކުލަބެވެ. ޔޫތު ޔުނައިޓެޑް ޗެމްޕިއަންކަން ހޯދީ ފައިނަލުގައި ވިޔަންސާގެ މައްޗަށް 48-30 އިން ކުރި ހޯދައިގެންނެވެ.
ފައިނަލް މެޗުގެ މޮޅު ކުޅުންތެރިޔާގެ މަގާމް ހޯދީ ޔޫތު ޔުނައިޓެޑްގެ މަރިޔަމް ޝިއުރާ ނާސިހު އެވެ. ދެ ވަނަ ޑިވިޝަންގެ އެންމެ އުއްމީދީ ކުޅުންތެރިޔަކީ ވެސް ޝިއުރާ އެވެ.
ދެ ވަނަ ޑިވިޝަންގެ އެންމެ މޮޅު ކުޅުންތެރިޔާގެ މަގާމް ހޯދީ ޔޫތު ޔުނައިޓެޑްގެ ޖުނައިނާ އަހުމަދު އިޝްހާގު އެވެ. މި ޑިވިޝަންގެ އެންމެ މޮޅު ހަތް ކުޅުންތެރިންނަކީ ޔޫތު ޔުނައިޓެޑްގެ ޖުނައިނާ، މަރިޔަމް ލައިޝާ، އައިޝަތު ސަނާ އިބްރާހިމްގެ އިތުރުން ވިޔަންސާގެ އާމިނަތު ހިބާ އިސްމާއިލް، އައިޝަތު އުސްވަތު، މަރިޔަމް ދީބާ އަހުމަދު އަދި ލޮރެންޒޯ ސްޕޯޓްސް ކުލަބުގެ އަލްމާސް އަލީ އެވެ.
