ވެކްސިން ޖެހުން މެދުކަނޑާލިތާ 12 ދުވަހަށް ފަހު ވިލިމާލެ ހޮސްޕިޓަލުގައި މާދަމާ އިން ފެށިގެން ކުޑަކުދިންނަށް އަލުން ވެކްސިން ދޭން ފަށަން ނިންމައިފި އެވެ.
އެ ހޮސްޕިޓަލުގައި ވެކްސިން ޖެހުން މެދުކަނޑާލީ މުއްދަތު ހަމަވެފައި ހުރި ވެކްސިނެއް ކުޑަކުއްޖަކަށް ޖެހުނު މައްސަލައެއް ފެންމަތިވެގެންނެވެ.
އެ ހޮސްޕިޓަލް ހިންގާ އައިޖީއެމްއެޗުން މިރޭ ނެރުނު ބަޔާނެއްގައި ވަނީ އެފަދަ ކަމެއް ދެވަނަ ފަހަރު ތަކުރާރު ނުވާނެ ކަން ކަށަވަރުކުރަން އަޅަން ޖެހޭ ފިޔަވަޅުތައް މިހާރު އަޅާފައިވާ ކަމަށެވެ.
"ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ އިރުޝާދާ އެއް ގޮތަށް އައިޖީއެމްއެޗްގެ ބެލުމުގެ ދަށުން 8 ޖޫން 2022 (މާދަމާ) އިން ފެށިގެން ވެކްސިން ދިނުން ފަށާނެކަން މައުލޫމާތަށްޓަކައި ދަންނަވަމެވެ." މާލޭގައި ހިންގާ ސަރުކާރު ހޮސްޕިޓަލް އައިޖީއެމްްއެޗްގެ ބަޔާނުގައިވެ އެވެ.
މުއްދަތު ހަމަވެފައި ހުރި ވެކްސިން ޖެހި ކަމަށް ބުނެ ވިލިމާލެ ދާއިރާގެ މެންބަރު އަހުމަދު އުޝާމް އާންމުކުރެއްވި ފޮޓޯއިން ފެންނަ ގޮތުގައި އެ ވެކްސިންގެ މުއްދަތު ހަމަވެފައިވަނީ މިއަހަރުގެ ޖެނުއަރީ މަހު އެވެ.
އޭގެ ކުރިން، 2018 ވަނަ އަހަރު ތެރޭގައި ވެސް ވިލިމާލެ ހޮސްޕިޓަލުން މުއްދަތު ހަމަވެފައި ހުރި ވެކްސިންތަކެއް ޖެހި މައްސަލައެއް، 2019 ވަނަ އަހަރު ތެރޭގައި ފެންމަތިވެފައިވެ އެވެ. އެ މައްސަލައިގައި އެޗްޕީއޭއާ ގުޅިގެން މައްސަލަ ބެލުމަށްފަހު، ފިޔަވަޅު އަޅާފައިވާނެ ކަމަށް އައިޖީއެޗުން އޭރު ބުނެފައިވެ އެވެ.
