މިއަދު ކުރިއަށްދާ ވެރިކަންކުރާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ އެތެރޭގެ އިންތިހާބުތަކާ ގުޅިގެން މިހާތަނަށް ހުށަޙަޅާފައި ވަނީ އެންމެ ޝަކުވާއެއް ކަމަށް އެ އިންތިހާބުތަކުގެ ޝަކުވާ ބެލުމަށް އެކުލަވާލާފައިވާ ކޮމިޓީން ބުނެފި އެވެ.
އެ ކޮމިޓީގެ މުގައްރިރު މުހައްމަދު އިބްރާހިމް މަނިކު "އަދަދު" އަށް ވިދާޅުވީ އިންތިހާބާ ގުޅިގެން މިހާތަނަށް ޖުމްލަ ހަތަރު މައްސަލައެއް އެ ކޮމިޓީއަށް ހުށަހަޅާފައިވާ ކަމަށެވެ. އޭގެ ތެރެއިން ލިޔުމުން ހުށަހަޅާފައިވަނީ އެންމެ މައްސަލައެއް ކަމަށާއި ބާކީ ތިން މައްސަލައަކީ ފޯނުން ހުށަހަޅާފައިވާ ޝަކުވާތައް ކަމަށް މަނިކު ވިދާޅުވި އެވެ.
"މިހާތަނަށް ހުށަހެޅުނު ހުރިހާ މައްސަލައެއް ވެސް ވާނީ ބަލައިފައި، ނަތީޖާއަށް އަސަރު ކުރާ ފަދަ ސީރިއަސް މައްސަލައެއް ނެތް ހުށަހެޅިފައެއް،" މަނިކު ވިދާޅުވި އެވެ.
ޝަކުވާ ކޮމިޓީން މިހެން ބުނެފައިވީ ނަމަވެސް، ޗެއާޕާސަން ކަމަށް ވާދަކުރައްވާ މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި)ގެ ޓީމުން ވަނީ މިހާތަނަށް 16 މައްސަލައެއް ލިޔުމުން ހުށަހަޅައިފައިވާނެ ކަމަށް ބުނެފައެވެ.
އިންތިގެ ތަރުޖަމާނު އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑޭ) ވިދާޅުވީ ގިނަ ޝަކުވާތަކެއް އެ ޓީމަށް ލިބެމުން އަންނަ ކަމަށާއި އޭގެ ތެރެއިން 16 މައްސަލައެއް އެ ޓީމުން ލިޔުމުން އިންތިހާބާ ބެހޭ ކޮމިޓީއަށް ހުށަހަޅާފައި ވާނެ ކަމަށެވެ.
"ގިނަ ޝަކުވާތަކެއް ލިބެމުން އަންނަނީ، ޝަކުވާތައް ބަލައި ވެރިފައި ކުރުމަށްފަހު އިންތިހާބުތަކާ ގުޅޭ ކޮމިޓީއަށް ރަސްމީކޮށް ވާނީ ހުށަހަޅައިފައި،" ވައްޑޭ ވިދާޅުވި އެވެ.
އިންތިގެ ޓީމުން ފެންމަތިކޮށްފައިވާ މައްސަލަތަކުގެ ތެރޭގައި ވޯޓުލާ މަރުކަޒުގެ ތެރޭގައި ވޯޓު ކަރުދާސް ދައްކަން މަޖުބޫރު ކުރާ ކަމަށް ބުނާ މައްސަލައަކާއި ވޯޓު ކަރުދާސް ލިބުނު އިރު ފާހަގަ ޖަހާފައިވާ މައްސަލައެއްގެ އިތުރުން އިންތިގެ އޮބްޒާވަރުންނަށް ވޯޓުލާ މަރުކަޒުތަކުގެ ހުރަސް އަޅަމުން އަންނަ ކަމަށް ބުނާ ޝަކުވާތަކެއް ހިމެނެ އެވެ.
އެމްޑީޕީގެ ޗެއާޕާސަން އިންތިހާބަށް ވަރަށް ވާދަވެރި ކެމްޕޭނެއް ކުރި އިރު މައިގަނޑު ގޮތެއްގައި އެ ކެމްޕޭން ބިނާވެފައި އޮތީ ރައީސް އިބްރާހީމް މުހައްމަދު ސޯލިހަށް ކުރާ ތާއީދާއި ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ކުރާ ތާއީދުގެ މައްޗަށެވެ. އެގޮތުން ދެ ފެކްޝަނެއް އުފެދި މި އިންތިހާބުގެ ކެމްޕޭންގެ ވަރަށް ބޮޑަށް ފޯރިގަދަވި އެވެ.
އިކޮނޮމިކް މިނިސްޓަރު ފައްޔާޒު އިސްމާއިލާއި ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވާދަކުރައްވާ މި އިންތިހާބު ފާހަގަވަނީ އެމްޑީޕީގެ ކުރިމަގު ކަނޑައަޅާ ވޯޓެއްގެ ގޮތުގަ އެވެ.
