މީގެ 73 އަހަރު ކުރިން 1949 ގައި ސަރުކާރުން މާލޭގެ ރައްޔިތުންނަށް ކަރަންޓުގެ ހިދުމަތް ފޯރުކޮށްދޭން ފެށީ އެންމެ 14 ކިލޯވޮޓްގެ ޖަނަރޭޓަރެއް ބޭނުންކޮށްގެންނެވެ. އަހަރުތައް ފާއިތުވަމުންދިޔަ ވަރަކަށް މި ހިދުމަތަށް ވެސް ޒަމާނީ ބަދަލުތައް ސަރުކާރުތަކުން ދިޔައީ ގެންނަމުންނެވެ. އެންމެ ފުރަތަމަ ހިދުމަތް ދިނީ "ޑިޕާޓްމަންޓް އޮފް އިލެކްޓްރިސިޓީ" ގެ ދަށުންނެވެ. އެއަށްފަހު "މޯލްޑިވްސް އިލެކްޓްރިސިޓީ ބޯޑު" ގެ ދަށަށް ބަދަލުކުރި އެވެ.
ސަރުކާރުން ދެމުންދިޔަ ކަރަންޓުގެ ހިދުމަތް ކުންފުންޏެއްގެ ދަށަށް ބަދަލުކޮށް ޖޫން 19، 1997 ގައި "ސްޓޭޓް އިލެކްޓްރިކް ކޮމްޕެނީ ލިމިޓެޑް" އުފެއްދުން ވެގެންދިޔައި އެ ހިދުމަތް ތަފާތު ހަރުފަތަކަށް ގެންދިޔުމަށް އެޅިގެންދިޔަ މުހިންމު ބިންގަލަކަށެވެ.
އެންމެ 50 ކަސްޓަމަރުންނާއެކު ކަރަންޓުގެ ހިދުމަތް ފެށި ސްޓެލްކޯއަކީ މިވަގުތު ރާއްޖޭގައި އޮތް އެންމެ ބޮޑު ޔޫޓިލިޓީ ކުންފުންޏެވެ. ގްރޭޓާ މާލެ ސަރަހައްދުގެ އިތުރުން ރާއްޖޭގެ އެކި ރަށްރަށަށް ވެސް އެ ކުންފުނީގެ ހިދުމަތް މިއަދު ދަނީ ފޯރުކޮށްދެމުންނެވެ. އެންމެ 14 ކިލޯވޮޓުގެ ކަރަންޓު އުފައްދައިގެން ފެށި ހިދުމަތް މިއަދު ވަނީ 95،000 ކިލޯވޮޓް ނުވަތަ 95 މެގަވޮޓް އުފެއްދޭ ހިދުމަތަކަށް ބަދަލުކޮށްފަ އެވެ.
ސްޓެލްކޯގެ ދިގު ތާރީހުގައި އެ ކުންފުންޏަށް ކުރިމަތިވި ގޮންޖެހުންތަކަށް ވުރެ ކުރިއަށް އޮތް ތަނުގައި ކުރިމަތިވާނީ މާ ބޮޑު ބިޔަ ޗެލެންޖުތަކާ އެވެ. މާލެ ސަރަހައްދުގައި ކަރަންޓުގެ ޑިމާންޑު ދުވަހެއް ދުވަހަކަށް އުފުލެމުންދާއިރު ތިމާވެއްޓާއި ރައްޓެހި ގޮތަކަށް މެދުކެނޑުމެއްނެތި ރައްޔިތުންނަށް ބޭނުންވާ އަސާސީ މި ހިދުމަތް ފޯރުކޮށްދިނުމަށް ސްޓެލްކޯއިން ކުރަން ޖެހޭ މަސައްކަތްތައް ބުރަވެފައި ގިނަ އެވެ.
ނަމަވެސް، ސްޓެލްކޯގެ މެނޭޖިން ޑިރެކްޓަރުގެ މަގާމުގައި ހުންނެވި އަހްމަދު ޝަރީފް ހުންނެވީ އެ ޗެލެންޖުތަކާ ކުރިމަތިލައި ސްޓެލްކޯއަށް ކާމިޔާބުކުރެވޭނެ ކަމުގެ ޔަގީންކަމާ އެކު އެވެ. ބޮޑެތި ބަދަލުތަކެއް ކުންފުންޏަށް ގެނެސް ޒަމާނީ ހިދުމަތްތަކެއް ފޯރުކޮށްދޭ ކުންފުންޏަކަށް ސްޓެލްކޯ ހެދުމަށް ޕްލޭންތަކެއް ވަނީ އެކަށައަޅާފަ އެވެ. "އަދަދު" އަށް ދެއްވި ހާއްސަ އިންޓަވިއުއެއްގައި ޝަރީފް ވަނީ އެކަންކަމާ ގުޅޭ ބައެއް މުހިންމު މައުލޫމާތުތައް ހިއްސާކުރައްވާފަ އެވެ.
ޑިމާންޑަށް ސަޕްލައި ކުރުމަށް 70 މެގަވޮޓް އިތުރު ކުރަނީ
ގްރޭޓާ މާލެ ސަރަހައްދުގައި ދުވަހެއް ދުވަހަކަށް ކަރަންޓުގެ ޑިމާންޑު އަންނަނީ އިތުރުވަމުންނެވެ. ސްޓެލްކޯއިން މިހާތަނަށް ފަސް ފިޔަވައްސަކަށް ބަހާލައިގެން އެ ކުންފުނީގެ ކެޕޭސިޓީ އިތުރުކޮށްފައިވާއިރު ފިފްތު ޕަވާ ޕްރޮޖެކްޓުގެ މަސައްކަތް ނިމޭއިރު 2030 އާ ހަމައަށް އިތުރު އިންޖީނުގެޔެއް ނާޅައި މާލެ ސަރަހައްދަށް ކަރަންޓު ދެވޭނެ ކަމުގެ ޔަގީންކަން ސްޓެލްކޯއަށް އެބައޮތެވެ.
މިވަގުތު ވެސް ސްޓެލްކޯ އިން ދަނީ 70 މެގަވޮޓްގެ އިންޖީނުގެޔެއް އެޅުމުގެ ޕްލޭންތައް ކުރަހަމުންނެވެ. މީގެކުރިން އެ ކުންފުނީގެ ކެޕޭސިޓީ އިތުރުކުރަމުންދިޔައީ 50 މެގަވޮޓުންނެވެ. އޭގެ ސަބަބުން އެއް ޕްރޮޖެކްޓު ނިމޭއިރު އޮންނަނީ އަނެއް ޕްރޮޖެކްޓު ފަށަން ޖެހިފަ އެވެ.
"އިންޖިނިއަރުންނާ ވާހަކަ ދައްކައިގެން 2030 އާ ހަމައަށް އިތުރަށް ޕަވާ ޕްރޮޖެކްޓެއް ނުހިންގާ ވާނެ ގޮތަށް 70 މެގަވޮޓަށް ބަދަލުރުކުރީ،" އެ ޕްރޮޖެކްޓަށް 20 މެގަވޮޓް އިތުރުކުރި ސަބަބު ހާމަކުރައްވަމުން ޝަރީފް ވިދާޅުވި އެވެ.
ސްޓެލްކޯއިން ހުޅުމާލޭގައި ގާއިމުކޮށްފައިވާ އިންޖީނުގެ. އިތުރު 70 މެގަވޮޓްގެ އިންޖީނުގެޔެއް އެޅުމުގެ ޕްލޭންތައް ވަނީ އެކުލަވާލާފައި --- ފޮޓޯ: ސްޓެލްކޯ
އަންނަ އަހަރުގެ ފުރަތަމަ ކުއާޓަރުގެ ތެރޭގައި މި އިންޖީނުގޭގެ މަސައްކަތް ފެށުމަށް ކޮންސަލްޓަންޓަކާއެކު ދަނީ މަސައްކަތް ކުރަމުންނެވެ.
ރާއްޖޭގައި މިހާތަނަށް ހިންގާ އެންމެ ބޮޑު އުމުރާނީ ޕްރޮޖެކްޓު ކަމަށްވާ ގްރޭޓާ މާލެ ކަނެކްޓިވިޓީ ޕްރޮޖެކްޓާއެކު ސްޓެލްކޯގެ ހިދުމަތްތައް ވެސް ފުޅާކުރަން ޖެހެ އެވެ.
ތިލަފުއްޓަކީ ރާއްޖޭގެ އިންޑަސްޓްރިއަލް ރަށް ކަމަށްވާއިރު އެތަނުގައި ހިންގާ ހުރިހާ ވިޔަފާރިއަކަށް ފޯރުކޮށްދޭ ވަރަށް ސްޓެލްކޯއަށް މިވަގުތު ކަރަންޓެއް ނުއުފެއްދެ އެވެ. އެކަމަށް މިހާރު އެ ކުންފުނިން ދަނީ ތައްޔާރުވަމުންނެވެ.
"150 މެގަވޮޓްގެ ކަރަންޓު އުފެއްދޭ ޕްލާންޓެއް ތިލަފުށީގައި ގާއިމުކުރުމުގެ ޕްލޭނެއް އެބައޮތް،" ސްޓެލްކޯގެ އެމްޑީ ވިދާޅުވި އެވެ.
ޑީސެލް ނޫން ގޮތެއް ހޯދުން
ސްޓެލްކޯއިން ކަރަންޓު އުފެއްދުމަށް ބޭނުންކުރާ މައިގަނޑު ވަސީލަތަކީ ޑީސަލް އެވެ. ރާއްޖޭގެ ނިސްބަތުން އެންމެ ގިނައިން ޑީސަލް ބޭނުންކުރާ ކުންފުންޏަކީ ވެސް ސްޓެލްކޯ އެވެ.
ޑީސަލްއަކީ ތިމާވެއްޓާ ރައްޓެހި ނޫން އިޔާދަނުކުރެވޭ ހަކަތައެކެވެ. ޑީސަލަށް ކުރާ ހޭދަ ކުޑަކޮށް ޑީސަލް ނޫން ތެލަކުން ކަރަންޓު އުފެއްދުމަށް ސްޓެލްކޯއިން ވަނީ އަމާޒު ހިފާފަ އެވެ.
"އަޅުގަނޑުމެންގެ ސްޓްރެޓެޖިކް ޕްލޭންގެ ތެރޭގައި އެބައޮތް ހަކަތަ އުފެއްދުމަށް ހިނގާ ހަރަދު ކުޑަކޮށްގެންނޭ ރައްޔިތުންނަށް ދޭ ހިދުމަތުގެ އަގު ކުޑަކުރެވޭނީ،" ކުރީ ސަރުކާރުގައި ފެނަކަ ކޯޕަރޭޝަންގެ މެނޭޖިން ޑިރެކްޓަރުގެ މަގާމު ވެސް ފުރުއްވި ޝަރީފް ވިދާޅުވި އެވެ.
ޑީސަލްގެ ބަދަލުގައި އިޔާދަކުރަނިވި ހަކަތައިން ކަރަންޓު އުފެއްދުން ވެގެންދާނީ ރައްޔިތުންނަށް ދޭ ހިދުމަތުގެ އަގު ކުޑަވެގެންދާނެ ކަމަކަށެވެ. އެ މަގަށް ކަންކަން ގެންދިޔުމަށް ސްޓެލްކޯއިން ދަނީ ބަޔޯފިއުލް ނުވަތަ ބަޔޯގޭސް ބޭނުންކޮށްގެން ކަރަންޓު އުފެއްދުމާ ގުޅޭ ދިރާސާތަކެއް ކުރަމުންނެވެ.
ޝަރީފް "އަދަދު"އަށް އިންޓަވިއު ދެއްވަނީ. ސްޓެލްކޯގެ ހިދުމަތްތަކާ ގުޅޭ މުހިންމު މައުލޫމާތުތައް ހިއްސާކުރެއްވި --- ފޮޓޯ: އަބްދުﷲ އިޔާން/އަދަދު
ނަމަވެސް، މިވަގުތަށް އެ ކުންފުނިން ޕައިލެޓް ޕްރޮޖެކްޓެއްގެ ގޮތުގައި ކުރިއަށް ގެންދަނީ އިރުގެ އަވިން ހަކަތަ އުފެއްދުމުގެ މަސައްކަތެވެ. އެ ޕްރޮޖެކްޓް ފުޅާކޮށް މާލޭގެ ގެތަކުގެ ފުރާޅުތައް ސޯލާ ޕެނަލްއިން ފުރާލަން ސްޓެލްކޯގެ ޕްލޭނެއް އެބައޮތެވެ.
"މާލޭގެ އަޅުގަނޑުމެންގެ ކަސްޓަމަރުންގެ ގޭގޭ ފުރާޅުތައް ރެންޓަށް (ކުއްޔަށް) ހިފާނީ. އެއަށްފަހު ފުރާޅުތަކުގައި އަވިން ކަރަންޓު އުފައްދަން ސޯލާ ޕެނަލްތައް ޖަހައިގެން، ދޭ ރެންޓަކީ އެ ގެޔެއްގެ ބިލުން ޑިސްކައުންޓް ކުރެވޭ އެއްޗަކަށް ހަދަން،" ޝަރީފް ވިދާޅުވި އެވެ.
އޭގެއިތުރުން އެ ކުންފުނިން ގާއިމުކުރާ 70 މެގަވޮޓްގެ އިންޖީނުގޭގެ ޕްލޭނިން މަރުހަލާގައިވާ ގޮތުން އެ ތަނުގައި ބޭނުންކުރާނީ ދެ ވައްތަރުގެ ތެޔޮ ވެސް އެންދޭ ގޮތަށް ފަރުމާކޮށްފައިވާ އިންޖީނުތަކެވެ. މިއީ ވެސް،
"ޖެނެރޭޓަރުތައް ސްޓްރަކްޗާ ކުރާނީ ދެ ވައްތަރުގެ ފިއު ލް ބޭނުންކުރެވޭ ގޮތަށް. އެއްގޮތަކީ ޑީސަލް، އަނެއް ގޮތަކީ ބަޔޯފިއުލް،" ޝަރީފް ވިދާޅުވި އެވެ.
އިންޓަ ކަނެކްޓިވިޓީ ގްރިޑުގައި ޑިޒައިން ފޯލްޓެއް
ރާއްޖޭގެ ހަކަތަ އިންޑަސްޓްރީގައި މިހާތަނަށް ހިންގި އެންމެ ބޮޑު އެއް ޕްރޮޖެކްޓަކީ މާލެ އާއި ހުޅެލެ އަދި ހުޅުމާލެ އެއް ވިޔުގައަކުން ގުޅާލުމަށް ގާއިމުކުރި އިންޓަކަނެކްޝަން ގްރިޑެވެ. މި ޕްރޮޖެކްޓު ކާމިޔާބުކަމާއެކު ނިންމާލައި އޭގެއިން ހިދުމަތް ދޭން ފެށުމުން ކަރަންޓު ކެނޑުމުގެ މައްސަލައަށް ހައްލެއް ލިބޭނެ ކަމަށް ސްޓެލްކޯއިން އޭރު ބުންޏެވެ.
އެހެން ނަމަވެސް، މިއަހަރުގެ ތެރޭގައި ވެސް މުޅި ގާތްގަނޑަކަށް މުޅި މާލެ އިން ކަރަންޓު ކެނޑި ރައްޔިތުންގެ ނުރުހުން ސްޓެލްކޯއަށް އަމާޒުވި އެވެ.
އެންމެ ކޭބަލަކަށް ދިމާވި މައްސަލައަކުން މިދިޔަ އެޕްރީލް މަހު ވެސް ކަރަންޓު ކެނޑުނެވެ. އެކަމާ ގުޅިގެން އެ ގްރިޑުގެ ދިރާސާތަކެއް ހެދުމުން އެނގުނީ އޭގެ ޑިޒައިންގައި މައްސަލަތަކެއް އުޅޭ ކަމެވެ.
އިންޓަ ކަނެކްޓިވިޓީ ގްރިޑު ސްޓެލްކޯގެ މުވައްޒަފުން ޓެސްޓު ކުރަނީ. އެ ގްރިޑުގައި އުޅޭ މައްސަލަތައް ހައްލުކުރަން ދަނީ މަސައްކަތްކުރަމުން --- ފޮޓޯ: ސްޓެލްކޯ
"އާތު ލީކަކުން ކަރަންޓު ދާ ކަމަށްވަންޔާ އެ އޭރިއާ އިން އެކަނި. އަޅުގަނޑުމެންނަށް ފާހަގަކުރެވުނު ގޮތުގައި އެ ނެޓްވޯކް ޑިޒައިން ކުރުމުގައި މައްސަލަތަކެއް އެބަހުރި،" ރާއްޖޭގައި މިވަގުތު ގާއިމުކޮށްފައިވާ އެންމެ މުހިންމު ކަރަންޓު ވިޔުގައިގައި މައްސަލަތަކެއް ހުރިކަން ހާމަކުރަމުން ޝަރީފް ވިދާޅުވި އެވެ.
އިންޓަކަނެކްޝަން ގްރިޑުގައި މައްސަލަތަކެއް ހުރިކަން ދެނެގަނެވިފައިވާއިރު އެއީ މިފަހުން މުޅި މާލެއިން ކަރަންޓު ދާން މެދުވެރިވި ސަބަބު ކަމަށް ޝަރީފް ފާހަގަކުރެއްވި އެވެ. ނަމަވެސް، އެއީ ސީދާ ކޮން މައްސަލައެއްކަން ދެނެގަތުމަށް އަދި ދުވަސްތަކެއް ހޭދަވާނެ ކަމަށް އޭނާ ވިދާޅުވި އެވެ.
"އަޅުގަނޑުމެން ޖެހޭނީ ކޮންސަލްޓަންޓެއް ނަގައިގެން ސްޓެޕް ބައި ސްޓެޕް އެކަން ކުރަން. އެ މަސައްކަތް މިހާރު ކުރިއަށް އެބަދޭ،" ޝަރީފް ވިދާޅުވި އެވެ.
އޭނާ އުންމީދުކުރައްވާ ގޮތުގައި ކުރިއަށް އޮތް ހަތަރު މަސް ދުވަހުގެ ތެރޭގައި އެ މައްސަލަ ދެނެގަނެވި ހައްލެއް ހޯދޭނެ އެވެ. އޭރުން، މުޅި މާލެއިން ކަރަންޓު ކެނޑޭ މައްސަލަ ނިމުމަކަށް އަންނާނެ އެވެ.
ދުވާލަކު ކަރަންޓު ބޭނުންކުރާ މިންވަރަށް ފޯނަށް
ބިލު ބޮޑުވުމުގެ ޝަކުވާއަކީ އަބަދުވެސް ރައްޔިތުން ކުރާ ޝަކުވާއެކެވެ. ކަރަންޓު ބޭނުންކުރާ މިންވަރު ދުވަހެއް ދުވަހަކަށް އިތުރުވަމުންދާއިރު ބިލުތައް ބޮޑުވާނެކަން ރައްޔިތުން ވެސް ގަބޫލުކުރަން ޖެހެ އެވެ.
ބޭނުންކުރާ މިންވަރު އިތުރުވުމާއި ރަނގަޅަށް ކަރަންޓު ވަޔަރުކޮށްފައި ނެތުމަކީ ބިލު ބޮޑުވާން މެދުވެރިވާ ސަބަބުތައް ކަމަށް ޝަރީފް ދެކެވަޑައިގަންނަވަ އެވެ. އެހެންވެ، އޭނާ އެދެނީ ކަރަންޓު ގުޅާފައި ހުރީ ރަނގަޅަށްތޯ ބެލުމަށް ސާވޭ ކޮށްލުމަށެވެ.
ބިލު ބޮޑުވުމުގެ ޝަކުވާއަށް އޮތް އެންމެ ބޮޑު ހައްލަކީ ކަރަންޓު ބޭނުންކުރާ މިންވަރު ދުވަހުން ދުވަހަށް ކަސްޓަމަރުންނަށް އަންގައިދިނުމެވެ. އެކަމަށް ސްޓެލްކޯ ތައްޔާރެވެ.
ހިޔާ ފްލެޓުތަކުގައި ސްޓެލްކޯއިން ހަރުކުރީ ސްމާޓު މީޓަރު. އޭގެއިން ކޮންމެ ދުވަހަކު ކަރަންޓު ބޭނުންކުރާ މިންވަރު ދެނެގަނެވޭނެ --- ފޮޓޯ: މުހައްމަދު ޝާބިން/އަދަދު
"ހިޔާ ފްލެޓުތަކުގައި ސްމާޓު މީޓަރު ހަރުކޮށްފައި ހުންނާނީ. އެ ޕްރޮޖެކްޓު ނިމޭއިރު ކޮންމެ ކަސްޓަމަރަކަށް ލިބޭނެ ކަސްޓަމާ ޕްރޮފައިލެއް. އޭގެއިން އިނގޭނެ ކޮންމެ ދުވަހަކު ވެސް އެތަނަކުން ކަރަންޓު ބޭނުންކުރި މިންވަރު،" ޝަރީފް ވިދާޅުވި އެވެ.
ސްޓެލްކޯގެ މޯބައިލް އެޕުން ކޮންމެ ދުވަހަކު ކަރަންޓު ބޭނުންކުރާ މިންވަރު ބަލާލެވުން ވެގެންދާނީ ކަރަންޓު ބިލު ބޮޑުވާ ޝަކުވާތަކަށް ކޮންމެވެސް ވަރެއްގެ ހައްލެއް ލިބިގެންދާނެ ކަމަކަށެވެ. ހިޔާ ފްލެޓުގެ ޕައިލެޓް ޕްރޮޖެކްޓުގެ ނަތީޖާތައް ރަނގަޅެވެ.
މިއަހަރު ފަހުކޮޅު މުޅި ރާއްޖެއަށް ސްޓެލްކޯއިން މި ހިދުމަތް ފުޅާކޮށް ސްމާޓު މީޓަރު ކަސްޓަމަރުންނަށް ލިބޭނެ ގޮތް ހަދާނެ އެވެ.
ސައިބާ ހަމަލާއަކަށް ފުރިހަމައަށް ތައްޔާރުވާނެ
ޓެކްނޮލޮޖީއަށް އެންމެ އަހުލުވެރި އެއް ކުންފުންޏަކީ ސްޓެލްކޯއޭ ބުނުމަކީ ދޮގަކަށް ނުވާނެ އެވެ. އެ ކުންފުނީގެ ގިނަ ހިދުމަތްތަކެއް މިހާރު މޯބައިލްކޮށް ކަސްޓަމަރުންނަށް ލިބެ އެވެ.
ކަރަންޓު ބިލު އަންނަނީ ފޯނަށެވެ. އޮންލައިންކޮށް ބިލަށް ފައިސާ ވެސް ދެއްކެ އެވެ. މިފަދަ ހިދުމަތްތަކުގެ ސަބަބުން ސައިބާ ހަމަލާތައް ވެސް އެ ކުންފުންޏަށް އަމާޒުވެ އެވެ.
ދާދިފަހުން ވެސް ރެންސަމްވެއާ އެޓޭކެއް ކުރިމަތިވެ ސްޓެލްކޯގެ ހިދުމަތްތައް އެއްކޮށް ހުއްޓުމަކަށް އައެވެ. އެ ހަމަލާގެ ކުރިން އެފަދަ ކަމެއް ދިމާނުވާތީ އެއާމެދު އަމަލުކުރާނެ ގޮތްތަކެއް ސްޓެލްކޯގައި ނެތެވެ. ހިދުމަތްތައް ދޭން ޖެހުނީ މެނުއަލްކޮށެވެ.
ސްޓެލްކޯގެ މައި އޮފީސް. ސައިބާ ހަމަލާގައި ހިދުމަތްތައް ދިނީ މެނުއަލްކޮށް --- ފޮޓޯ: މުހައްމަދު ޝާބިން/އަދަދު
"ސްޓެލްކޯ ކަހަލަ ބޮޑު ކުންފުންޏެއްގައި ހުންނަން ޖެހޭ ސައިބާ ސެކިއުރިޓީ ގާއިމުކޮށްފައެއް ނުވޭ،" ކޮންމެ ބަޔަކަށް ކޮންމެ ގަޑިއެއްގައި ވެސް ސައިބާ ހަމަލާއެއް ދެވިދާނެކަން ފާހަގަކުރައްވަމުން ޝަރީފް ވިދާޅުވި އެވެ.
މިފަހުން ކުރި ތަޖުރިބާއަކީ އެފަދަ އެހެން ހަމަލާއަކަށް ތައްޔާރުވާން އެ ކުންފުނިން މަސައްކަތް ފެށި އެއް ސަބަބެވެ. ސްޓެލްކޯގެ އަމާޒު ހުރީ ރާއްޖޭގެ އެހެން ކުންފުނިތަކުގައި ނެތް ފެންވަރަށް ސައިބާ ސެކިއުރިޓީގެ ކަންކަން ތަރައްގީކޮށް މިފަދަ ހަމަލާތަކުން ރައްކާތެރިވުމަށެވެ.
"އަޅުގަނޑު ގަބޫލުކުރަނީ މިއަހަރު ނިމޭއިރު އަޅުގަނޑުމެންގެ ނެޓްވޯކަކީ ރާއްޖޭގެ އެންމެ ވަރުގަދަ ނެޓްވޯކުތަކުގެ ތެރެއިން ނެޓްވޯކަކަށް ވެގެންދާނެ ކަމަށް،" ސައިބާ ސެކިއުރިޓީ ވަރުގަދަ ކުރުމަށް ހާއްސަ އަހަންމިއްޔަތު ކަމެއް ދެއްވާނެ ކަމަށް ހާމަކުރައްވަމުން ޝަރީފް "އަދަދު" އަށް ވިދާޅުވި އެވެ.
