އައިޖީއެމްއެޗްގައި ނަރުހެއްގެ ވަޒީފާ އަދާ ކުރަމުން ދިޔަ ފިލިޕީންސްގެ މޭރީ ގްރޭސް މަރާލުމުގެ ދައުވާ ލިބޭ ހަލީމަތު ލަމްހާ އަބްދުލްރަހްމާންގެ ސިއްހީ ހާލަތު ގޯސް ކަމަށް ބުނާއިރު، އޭނާގެ ބަންދު މުރާޖައާ ކުރުމާ މެދު މިއަދު ކްރިމިނަލް ކޯޓުގައި ބޭއްވި އަޑުއެހުމުގައި ގޮތެއް ނުނިންމައި އަޑުއެހުން ނިންމާލައިފި އެވެ.
ފުރަތަމަ އަމިއްލައަށް މަރުވި ކަމަށް ރިޕޯޓް ކުރި މޭރީ ގްރޭސް މަރާލީ ބޮލަށާއި ކަރަށް ހަމަލާދީ ނޭވާ ހާސްކޮށްލައިގެން އޭނާގެ އޮޓޮޕްސީ ރިޕޯޓުން ދައްކާއިރު، އެ ކަން ކުރީ އޭނާގެ ފިރިމީހާ މާވިން އެސްވައި ވާގަސްއާއި އޭނާގެ ލޯބިވެރިޔާ ލަމްހާ ކަމަށް ދައުލަތުން ދައުވާ ކުރެ އެވެ. ލަމްހާއަށް ކުރަނީ މޭރީ މަރާލުމުގައި ބައިވެރިވި ކަމުގެ ދައުވާ އެވެ.
ޝަރީއަތް ނިމެންދެން ބަންދުގައި ހުރި ލަމްހާގެ ބަންދު މުރާޖައާއަށް ހުށަހެޅީ ދައުލަތުންނެވެ. އެއީ ޖިނާއީ އިޖުރާއަތުގެ ގާނޫނުގައި މިހާރު އޮންނަ ގޮތުން ޝަރީއަތް ނިމެންދެން ބަންދުގައި ހުންނަ މީހަކު ބަންދު ކުރި ސަބަބު ދެމިއޮތްކަން ކޮންމެ 30 ދުވަހަކުން ބަލަން ޖެހޭނެ ކަމަށް އޮންނާތީ އެވެ. ލަމްހާ ބަންދު ކުރީ މުޖުތަމައަށް ނުރައްކާތެރި މީހެއް ކަމުގެ އިހްތިމާލް އޮންނާނެ ކަމަށް ބަލައިގެންނެވެ.
މިއަދުގެ އަޑުއެހުމުގައި ލަމްހާއަށް ފުރުސަތު ދިނުމުން، ކުރީ އަޑުއެހުމުގައި ވެސް ފާހަގަ ކުރި ބައެއް ކަންކަން ތަކުރާރު ކުރި އެވެ. ލަމްހާގެ މައިބަދައިގެ ޑިސްކެއްގައި ރެދެއް ލާފައިވާތީ "ބެޑް ރެސްޓް" ކުރަން ޑޮކްޓަރުން ލަފާ ދީފައިވާ ހާލު، ޖަލުގައި އުޅެން ޖެހެނީ ކުދިކުދި ކަންކަން ވެސް ކޮށްދޭނެ މީހެއްގެ އެހީ ނެތި ކަމަށް ލަމްހާ ބުންޏެވެ. އެހެންވެ ބަންދަށް ލުއެެއް ދޭން އޭނާ އެދުނެވެ.
"އަޅުގަނޑަށް ދިނީ ދެ ފޫޓު ހަމަވާ ވަރުގެ ހޮޅިއެއް، ފެން ބޭނުން ކުރަން ދަތި އެ ހޮޅިން، އަޅުގަނޑަށް ޖަލުގައި މިހާރު ހޮޅިއާ ގުޅުވާފައި ނަންނަމުން ވެސް ގޮވަނީ، ސޯޝަލް މީޑިއާގައި ވާހަކަ އަނބުރާފައި އޮންނަ ގޮތުން އަޅުގަނޑު ސިފަކުރަނީ ވެސް އޭގެ [ގާތިލެއް] މީހެއްގެ ގޮތަށް، ކިހިނެއްތޯ އަޅުގަނޑު އެއިން މީހަކު އެހީވެލަން އަންނާށޭ އަހާނީ ވެސް،" ލަމްހާގެ ޝަކުވާތައް ޝަރީއަތަށް ހިއްސާ ކުރި އެވެ.
މި ކަމުގައި ދައުލަތުން ފާހަގަ ކުރައްވާ ނުކުތާއަކީ ބޭސްފަރުވާގެ ކަންކަމުގައި ފުރާނައަށް ނުރައްކާ ނުވާ ހާލަތެއް ނެތް ނަމަ ބަންދުން ދޫކޮށްލަން ނުޖެހޭނެ ކަމަށް، މަސްތުވާތަކެތީގެ މައްސަލައެއްގައި ދަށު ކޯޓުން ދޫކޮށްލި ބަޔެއްގެ މައްސަލާގައި ހައި ކޯޓުން ނިންމާފައިވާ ނިންމުމެވެ. މީގެ އިތުރުން ލަމްހާއަކީ މުޖުތަމައަށް ނުރައްކާ އޮތް މީހެއް ކަމަށް ބެލެވޭތީ ބަންދު ދަމަހައްޓަން ދައުލަތުން އެދުނެވެ.
މައްސަލައާ ހަވާލުވެ ހުންނެވި ގާޒީ ހުސައިން ފާއިޒް ރަޝީދު ވިދާޅުވީ އެ ކަމާ މެދު އޭނާ ނިންމަވާ ގޮތެއް ހާމަ ކުރައްވާނީ އަންނަ މަހުގެ 10 ވަނަ ދުވަހު އެ މައްސަލާގައި ބާއްވާ ޝަރީއަތުގެ އަޑުއެހުމުގަ އެވެ. އެ ދުވަހާ ހަމައަށް ބަންދު ދަމަހައްޓަން ގާޒީ ނިންމެވި އެވެ.
ލަމްހާއަށް ފާޑުފާޑުގެ ނަންނަމުން ގޮވާ ކަމާއި، ގާތިލެއް ގޮތުގައި ސިފަ ކުރާ ކަމަށް ބުނާއިރު، ދައުލަތުން ގެންދަނީ ކޮންމެ އަޑުއެހުމެއްގައި ހުށަހަޅާފައިވާ ހެކިތަކުގެ ތެރެއިން މޯބައިލް އެނަލިސިސް ރިޕޯޓްގައި ލަމްހާއާއި މާވިންއާ ދެމެދު ދައްކާފައިވާ ވާހަކަތަކާއި މެސެޖްތަކާއި ގޫގަލް ސާޗުކޮށްފައިވާ ކަންކަން ބުނަމުންނެވެ. މި ކަންކަން ދައުލަތުން ބުނަނީ ދައުވާ ސާފުނުވާ ކަމަށް ދިފާއުން ބުނާތީ އެވެ.
މައްސަލައިގެ ފަސްފަހަތް
މޭރީ ގްރޭސް އަކީ އައިޖީއެމްއެޗްގެ ޑައިލެސިސް ޑިޕާޓްމެންޓްގެ ނަރުހެކެވެ. އޭނާގެ ފިރިމީހާ މާވިންއާއި ލަމްހާއަކީ ކެޝުއަލްޓީގައި މަސައްކަތް ކުރާ ނަރުހުންނެވެ. މޭރީގެ ހަށިގަނޑު ޕޯސްޓްމޯޓަމް ހެދި އިރު މޭރީ މަރުވެފައި ވަނީ ބޮލަށް ދީފައިވާ ބޮޑު އަނިޔާއަކުން ކަން ރިޕޯޓުން ވަނީ ދައްކައިފައެވެ.
މިދިޔަ އަހަރުގެ އޮކްޓޯބަރު މަހުގެ 19 ވަނަ ދުވަހު މޭރީ މަރުވެގެން ފުލުހަށް ރިޕޯޓް ކުރީ ވެސް މާވިން އެވެ. މާވިން ރިޕޯޓް ކުރީ މޭރީ ދަންޖެހިގެން މަރުވެފައި ހުއްޓައި ފެނިގެން ކަމުގަ އެވެ. ނަމަވެސް ޝައްކު ކުރެވޭ ބައެއް ކަންކަން ހުރުމާއެކު މައްސަލައިގެ ތަހުގީގު އެ ހިސާބުން ފެށި އެވެ.
ދަންޖެހިގެން މަރުވި ކަމަށް ބުނެ ރިޕޯޓް ކުރިޔަސް ތުހުމަތު ކުރެވޭ ކަންކަން ހުރުމުން ފުލުހުން ތަހުގީގު ހިންގުމަށް ފަހު މާވިން ހައްޔަރު ކުރީ އޮކްޓޯބަރު 27 ގަ އެވެ. އޭގެ ފަހުން ލަމްހާ ހައްޔަރު ކުރީ އޭގެ 50 ދުވަސް ފަހުން ޑިސެމްބަރު 16 ގަ އެވެ.
މާވިންގެ މައްޗަށް މަރުގެ ދައުވާ އުފުލާފައިވާއިރު، ލަމްހާގެ މައްޗަށް މަރުގައި ބައިވެރިވުމުގެ ދައުވާގެ އިތުރަށް އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ދައުވާއާއި ހުއްދަ ނަގައިގެން ކުރަން ޖެހޭ ކަމެއް ހުއްދަ ނުނަގާ ކުރުމުގެ ދައުވާ އުފުލާފައިވެ އެވެ. އެއީ އައިޖީއެމްއެޗުން ހުއްދަ ނުނަގާ، ނުރައްކާތެރި ބައެއް ބޭސްތަކެއް ލަމްހާ ނެގި ކަމަށް ތުހުމަތުކޮށެވެ.
