މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ ޕްރިންޓިން ޕާޓްނަރަކަށް އައިލެންޑް އެޕަރަލްސް ހަމަޖައްސައިފި އެވެ.
އެއް އަހަރުގެ މުއްދަތަށް ވެވުނު މި އެއްބަސްވުމުގައި އެމްބީބީއޭގެ ފަރާތުން ސޮއިކުރެއްވީ ޖެނެރަލް ސެކްރެޓަރީ ހަސަން ރަޝީދު އެވެ. އައިލެންޑް އެޕަރަލްސްގެ ފަރާތުން ސޮއިކުރެއްވީ އޮޕަރޭޝަންސް މެނޭޖަރު އަލީ މުޝްހަދު އެވެ.
މިދިޔަ އަހަރު ރާއްޖޭގައި ބޭއްވި ސާފް ޗެމްޕިއަންޝިޕްގައި ގައުމީ ފުޓްބޯޅަ ޓީމުގެ ކިޓް ޕާޓްނަރަކަށް ހަމަޖެއްސި އައިލެންޑް އެޕަރަލްސް އަކީ ފުޅާ ދާއިރާއެއްގައި އެކި އިވެންޓްތަކަށާއި ޓީމުތަކަށް ޖޯޒީ ޕްރިންޓް ކޮށްދެމުން އަންނަ ފަރާތެކެވެ.
އެމްބީބީއޭ އިން 2022 ވަނަ އަހަރު ބާއްވާ މުބާރާތްތަކުގައި ޕްރިންޓިންއާ ގުޅޭ ކަންކަން ކުރިއަށް ގެންދާނީ އައިލެންޑް އެޕަރަލްސްއާ ގުޅިގެންނެވެ.
މިއީ ބޮޑީބޯޑިންގެ ތާރީހީ އަހަރެކެވެ. ފުރަތަމަ ފަހަރަށް ގައުމީ ބޮޑީބޯޑިން ލީގެއް ތައާރަފްކޮށް، ފަށާފައިވާއިރު، ލީގުގައި ޖުމްލަ އެކު ހަ މުބާރާތް ހިމެނިގެންދާނެ އެވެ. ލީގުގެ ފުރަތަމަ މުބާރާތް ކަމަށްވާ އެމްޓީސީސީ ބުރުނު ޝިކާރު ފެށުމަށް ނިންމާފައިވަނީ މާދަމާ އެވެ. މުބާރާތުގައި ބައިވެރިވާ އެތުލީޓުންނާ އެކު ރޭ ވަނީ ޓެކްނިކަލް ބައްދަލުވުމެއް ބާއްވައިފަ އެވެ.
އެމްބީބީއޭގެ ޑިޖިޓަލް ޕާޓްނަރަކަށް ހަމަޖައްސާފައިވަނީ ދިރާގު އެވެ. އޮންލައިން ލޯކަލް މީޑިއާ ޕާޓްނަރަކީ "އަދަދު" އެވެ.
