މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ ޑިޖިޓަލް ޕާޓްނަރަކަށް ދިރާގު ހަމަޖައްސައިފި އެވެ.
ދިރާގާއި އެމްބީބީއޭގެ ދެމެދުގައި ވެވުނު އެއްބަސްވުމުގައި ސޮއިކުރުމަށް ބޭއްވި އިވެންޓް އޮތީ އިއްޔެ އެވެ. ދިރާގުގެ ފަރާތުން އެއްބަސްވުމުގައި ސޮއިކުރެއްވީ ސީނިއާ މެނޭޖަރު، ބްރޭންޑް އެންޑް މާކެޓިން ކޮމިއުނިކޭޝަން އެވެ. އެމްބީބީއޭގެ ފަރާތުން އެއްބަސްވުމުގައި ސޮއިކުރީ އެމްބީބީއޭގެ ފަރާތުން ސޮއިކުރެއްވީ އެ އެސޯސިއޭޝަންގެ ރައީސް އަބްދުﷲ އަރީފް (ފުކޫ) އެވެ.
މި އެއްބަސްވުމުގެ ދަށުން ދިރާގުން ބޮޑީބޯޑިން ކޮމިއުނިޓީގެ ހަރަކާތްތަކަށް ކޮންޓްރެކްޓްގައިވާ ގޮތުގެ މަތީން އެކިއެކި ފުރުސަތުތައް ފަހިކޮށްދޭނެ އެވެ. އަދި ރާއްޖޭގެ އެކި ކަންކޮޅުތަކުގައި ބޮޑީބޯޑިން ފުޅާކޮށް، އާ ޖީލުތަކެއް މި ކުޅިވަރުގެ ތެރެއިން އުފެދިގެން ދިއުމުގެ ބައިވެރިއެއްގެ ގޮތުގައި ދިރާގު ވާނެ ކަމަށް ވަނީ ބުނެފަ އެވެ.
މިރުޝާން ވިދާޅުވީ ބޮޑީބޯޑިން އެސޯސިއޭޝަނާ ގުޅިގެން ރާއްޖޭގެ ބޮޑީބޯޑިން ޑިވެލޮޕްކުރުމުގައި ބައިވެރިވެވޭތީ އެއީ ވަރަށް ބޮޑު ހިތްހަމަޖެހުމެއް ކަމަށާއި އެސޯސިއޭޝަނުން މި އަހަރަށް ހާއްސަ ހަރަކާތްތަކެއް ރާވާފައިވާއިރު، އެ ކަމުގައި ދިރާގުގެ ފުރިހަމަ އެއްބާރުލުން ލިބިގެންދާނެ ކަމަށެވެ.
އެމްބީބީއޭގެ ފަރާތުން ފުކޫ ވިދާޅުވީ ދިރާގުއާ އެކު ވެވުނު ޕާޓްނަޝިޕްގެ ސަބަބުން އެމްބީބީއޭ އިން ރާވާފައިވާ ޔޫތު ޑިވެލޮޕްމަންޓް ޕްލޭނަށް ފަސޭހަތަކެއް ލިބިގެންދާނެ ކަމަށެވެ. މީގެ ސަބަބުން ބޮޑީބޯޑިން އެހެން ހަރުފަތަކަށް ގެންދަން ކުރާ މަސައްކަތަށް އިތުރު ކުރިއެރުމެއް ލިބިގެންދާނެ ކަމަށް ފުކޫ ވިދާޅުވި އެވެ.
މި އަހަރުގެ ބޮޑީބޯޑިން އިވެންޓް ކަލަންޑަރުގައި ބޮޑީބޯޑިން ލީގެއް ފުރަތަމަ ފަހަރަށް އިއުލާނުކޮށްފައިވާއިރު، ޖުމްލަ ހަ އިވެންޓެއް ވަނީ ހިމަނައިފަ އެވެ. އެއީ މި މަހު 20-30 އަށް އޮތް އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް، މެއި 26 އިން ޖޫން 4 އަށް އޮތް ލަބޭރާ ބޮޑީބޯޑިން ޗެލެންޖް، ޖުލައި 14-23 އަށް ބާއްވާ ގައުމީ ބަނޑުފިލާ ޗެލެންޖް، ސެޕްޓެމްބަރު 10 ގައި އޮންނަ ސުލްޓާން އޮފް ތަނބުރުދޫ، އޮކްޓޫބަރު 6-15 އަށް ބާއްވާ އަދަހުކުރު ގޮންޖެހުން އަދި އޮކްޓޫބަރު 6-15 އަށް ބާއްވާ މުލަ ބޮޑީބޯޑިން ޗެލެންޖް އެވެ. މި އިވެންޓްތައް ރޭވިފައިވާ ގޮތަށް ބަލާއިރު، ފަސް މުބާރާތް އޮންނާނީ މާލޭ ރާޅުގަނޑު ސަރަހައްދުގަ އެވެ. އަދި އެއް އިވެންޓް، ކ.ތަނބުރުދޫގައި ކުރިއަށްދާނެ އެވެ.
މި އަހަރު ފުރަތަމަ ފަހަރަށް ބޮޑީބޯޑިން އިން ޑިޖިޓަލް ސްކޯރިން ސިސްޓަމެއް ބޭނުކުރާއިރު، ދާދި ފަހުން ވަނީ ބޮޑީބޯޑިންގެ ރަސްމީ ވެބްސައިޓް ވެސް ލޯންޗްކޮށްފަ އެވެ.
