މޯލްޑިވްސް ބޮޑީބޯޑިން އެސޯސިއޭޝަން (އެމްބީބީއޭ)ގެ އަހަރީ އާންމު ޖަލްސާ ބާއްވައި އެސޯސިއޭޝަންގެ ލޯގޯ އަށް ގެނައި ބަދަލެއް ފާސްކުރުމުގެ އިތުރުން އެމްބީބީއޭގެ ވެބްސައިޓް ލޯންޗްކޮށް ތާރީހީ ފިޔަވަޅެއް ކުރިއަށް އަޅައިފި އެެވެ.
ހެންވޭރު ބޯޅަގޭގައި ރޭ ބޭއްވި އެމްބީބީއޭގެ އަހަރީ ޖަލްސާގައި ރިޔާސަތު ބެލެހެއްޓީ އެސޯސިއޭޝަންގެ ރައީސް އަބްދުﷲ އަރީފް (ފުކޫ) އެވެ. މީގެ އިތުރުން ޖަމިއްޔާގެ ހިންގާ ކޮމިޓީގައި ހިމެނޭ ސީނިއާ މެމްބަރުން ކަމަށްވާ ނައިބު ރައީސް އަހުމަދު އަފްނާން، ޖެނެރަލް ސެކްރެޓަރީ ހަސަން ރަޝީދު (ރަޝް) އަދި އިވެންޓް ކޯޑިނޭޓަރު އަހުމަދު ޒައީމް ބައިވެރިވެވަޑައިގެންނެވި އެވެ.
ހެންވޭރު ބޯޅަގޭގައި ބޭއްވި އެމްބީބީއޭގެ އަހަރީ އާންމު ޖަލްސާގެ ތެރެއިން.-- ފޮޓޯ: މުހައްމަދު ޝާބިން/ އަދަދު
މި ޖަލްސާގައި އެސޯސިއޭޝަންގެ 25 މެމްބަރުން ބައިވެރިވިއިރު، މިދިޔަ އަހަރުގެ އަހަރީ ރިޕޯޓް އިއްވައި، މި އަހަރުގެ އަހަރީ ކަލަންޑަރުގެ ބަދަލުތައް މެމްބަރުންނަށް ކިޔައިދިނެވެ. އަދި މި އަހަރަށް އަންދާޒާ ކުރާ ބަޖެޓާއި އެމްބީބީއޭގެ ލޯގޯ އަށް ގެނައި ބަދަލާ މެމްބަރުންގެ ތާއީދާ އެކު ފާސްކުރި އެވެ. މީގެ އިތުރުން ހާއްސަ ކަމެއްގެ ގޮތުގައި ނުވަ އަހަރު ވަންދެން މަސައްކަތްކުރަމުން އައި އެމްބީބީއޭގެ ވެބްސައިޓްގެ މަސައްކަތް ނިންމައި، ވަނީ ލޯންޗްކޮށްފަ އެވެ.
"މިއީ ހަގީގަތުގައި އެސޯސިއޭޝަން ފެށިގެން އައި 9 އަހަރު ދުވަހު ބޭނުންވެފައި ހުރި ކަމެއް. މި ވެބްސައިޓާ އެކު އެމްބީބީއޭގެ އިވެންޓްސް ދެން، އެތުލީޓް ޕްރޮފައިލް، ގައުމީ ލީގުގެ ޕޮއިންޓްސް މި ކަހަލަ އެސޯސިއޭޝަނާ ގުޅޭ މުހިންމު ހުރިހާ މައުލޫމާތެއް ކަހަލަ ގޮތަކަށް ފެންނަން ހުންނާނެ. މިއީ ވަރަށް މުހިންމު ކަމެއް، މި ކުރެވުނީ،" ވެބްސައިޓްގެ މަސައްކަތް ނިންމާލެވުމުގެ ހިތްހަމަޖެހުން ރަޝް، "އަދަދު" އަށް ހިއްސާކުރެއްވި އެވެ.
މީގެ އިތުރުން ހުސްވެފައިވާ އެމްބީބީއޭގެ ހަޒާންދާރުގެ މަގާމަށް ކުރިމަތިލި އެއް ކެންޑިޑޭޓް ކަމަށްވާ އަހުމަދު ޝާފިއު ވަނީ ފުރިހަމަ ތާއީދާ އެކު މަގާމަށް އިންތިހާބުކޮށްފަ އެވެ.
އެމްބީބީއޭގެ ކަލަންޑަރަށް ބަލާއިރު، އެންމެ ބޮޑު ބަދަލަކީ ސީޒަނެއްގެ ކުލަޖައްސައި، ފުރަތަމަ ފަހަރަށް ގައުމީ ބޮޑީބޯޑިން ލީގެއް ފަށަން ނިންމުމެވެ. އެ ގޮތުން މި އަހަރުގެ ކަލަންޑަރުގައި ބޮޑީބޯޑިން ލީގެއްގެ ގޮތުގައި ޖުމްލަ ހަ އިވެންޓެއް ވަނީ ހިމަނައިފަ އެވެ. އެއީ މި މަހު ބާއްވާ އެމްޓީސީސީ ބުރުނު ޝިކާރު ބޮޑީބޯޑިން ޗެލެންޖް، މެއި 26 އިން ޖޫން 4 އަށް އޮތް ލަބޭރާ ބޮޑީބޯޑިން ޗެލެންޖް، ޖުލައި 14-23 އަށް ބާއްވާ ގައުމީ ބަނޑުފިލާ ޗެލެންޖް، ސެޕްޓެމްބަރު 10 ގައި އޮންނަ ސުލްޓާން އޮފް ތަނބުރުދޫ، އޮކްޓޫބަރު 6-15 އަށް ބާއްވާ އަދަހުކުރު ގޮންޖެހުން އަދި އޮކްޓޫބަރު 6-15 އަށް ބާއްވާ މުލަ ބޮޑީބޯޑިން ޗެލެންޖް އެވެ.
