ރަޝިޔާ އާއި ޔޫކްރެއިން ހަނގުރާމައާ ގުޅިގެން ތެލުގެ އަގު ދުނިޔޭގެ ބާޒާރުގައި އުފުލުނު ނަމަވެސް، ސްޓެލްކޯއިން ފޯރުކޮށްދޭ ކަރަންޓުގެ އަގަށް އޭގެ އަސަރު ނުކުރާނެ ކަމަށް އެ ކުންފުނިން ބުނެފި އެވެ.
ސްޓެލްކޯ ކުންފުނީގެ މެނޭޖިން ޑިރެކްޓަރަކަށް ދާދިފަހުން އައްޔަންކުރި އަހްމަދު ޝަރީފް ވިދާޅުވީ ދުނިޔޭގެ ބާޒާރުގައި ތެލުގެ އަގު އުފުލުނު ކަމުގައި ވީނަމަވެސް، ކުރިން ތެޔޮ ގަންނަމުން ދިޔަ އަގާ އެއްހަމައެއްގައި އެ ކުންފުންޏަށް ތެޔޮ ފޯރުކޮށްދިނުމުގެ އިންތިޒާމްތައް ސަރުކާރުން ހަމަޖައްސާފައިވާ ކަމަށެވެ.
އެހެންކަމުން ކަރަންޓު ބިލު ބޮޑުވުމުގެ ބިރެއް ނެތްކަން އޭނާ ފާހަގަކުރެއްވި އެވެ.
"ތެލުގެ އަގު ބޮޑުވުމާ ގުޅިގެން ސްޓެލްކޯއިން ދޭ ކަރަންޓު ހިދުމަތުގެ އަގު ބޮޑު ނުކުރާނެ، ފްލެޓް ރޭޓް [އެއް ހަމައެއް] ގައި ސްޓެލްކޯއަށް ތެޔޮ ފޯރުކޮށްދިނުމުގެ އިންތިޒާމްތައް ސަރުކާރުން ވަނީ ހަމަޖައްސާފައި،" މާލޭގެ ހުރިހާ ސަރަހައްދަކަށް ކަރަންޓުގެ ހިދުމަތް ފޯރިކޮށްދެމުންދާ ސަރުކާރުގެ ބޮޑު ހިއްސާއެއް އޮންނަ ސްޓެލްކޯގެ އެމްޑީ ވިދާޅުވި އެވެ.
އެންމެ ގިނައިން ރާއްޖެއަށް ތެޔޮ އެތެރެކުރާ، އެސްޓީއޯގެ ސަބްސިޑިއާރީ ކުންފުނި، ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން މިހާރު ޕެޓްރޯލް ލީޓަރެއް ވިއްކަނީ 14.60ރ. އަށެވެ. ޑީސަލް ލީޓަރެއް އުޅެނީ 14.80ރ. އަށެވެ. މިއީ ޕެޓްރޯލް ލީޓަރަކުން 2.54ރ.، ޑީސަލް ލީޓަރަކުން 2.36ރ. ގެ ބޮޑުވުމެކެވެ.
ކުރިން ޕެޓްރޯލް ލީޓަރެއް 12.06ރ. ވިއްކަމުން ދިޔައިރު، ޑީސަލް ލީޓަރެއް ވިއްކީ 12.44 ރ. އަށެވެ.
ފެބްރުއަރީ 24 ވަނަ ދުވަހުން ފެށިގެން ތެލުގެ އަގުތައް ވަނީ 30 ޕަސެންޓު އުފުލިފަ އެވެ. މި ހަފްތާފައި ސާފުނުކުރާ ތެޔޮ ފީފާއެއްގެ އަގު 139 ޑޮލަރަށް އެރި އެވެ.
ބުދަ ދުވަހު އަގު 106 ޑޮލަރަށް ތިރިވުމަށް ފަހު އަނެއްކާވެސް ބުރާސްފަތި ދުވަހު އަގު އުފުލުފައި ވަނީ 114 ޑޮލަރަށެވެ.
