ހުޅުމާލެ ފޭސްޓޫގައި ހިންގާ މަޝްރޫއަކުން ފްލެޓެއް ލިބެން އޮތް ކަމަށް ބުނެ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ނަމުގައި އޮޅުވާލައިގެން ކޯލްތަކެއް ކުރަމުންދާތީ ސަމާލުވުމަށް އެ ކުންފުނިން އެދިއްޖެ އެވެ.
އޮޅުވާލައިގެން މީހުންނަށް ގުޅަމުން ދަނީ، ފޯނަށް އަންނަ ސެކިއުރިޓީ ކޯޑެއް ހޯދުމަށެވެ.
އެޗްޑީސީން ބުނީ އެ ކުންފުނިން ކަމަށް ބުނެ، އޮޅުވާލައިގެން ފައިސާގެ މުއާމަލާތް ހިންގަން އުޅޭ ކަމުގެ ޝަކުވާތައް ކަސްޓަމަރުންގެ ފަރާތުން ލިބެމުންދާ ކަމަށެވެ. ފްލެޓް ދޭނެ ކަމަށް ބުނެ ފައިސާގެ މުއާމަލާތް ހިންގުމަށް މޯބައިލް ނަމްބަރުތަކުން އެ ކުންފުނިން ނުގުޅާނެ ކަމަށް އެޗްޑީސީން ބުންޏެވެ.
އެފަދަ ކޯލެއް ލިބިއްޖެ ނަމަ، އެޗްޑީސީގެ ކޯލް ސެންޓަރު، 1516 އަށް ގުޅާ އެކަމެއް ސާފުކުރުމަށް ވެސް ވަނީ އެދިފަ އެވެ.
އެ ކޯލް ރެކޯޑިން ޝޯޝަލް މީޑިއާގައި މިހާރު ދައުރުވަމުން ދާއިރު އޭގައި ވާހަކަ ދައްކާ މީހާ ބުނަނީ ހުޅުމާލޭ ދެވަނަ ފިޔަވަހީގައި މި ސަރުކާރުން ހިންގާ ބޯހިޔާވަހިކަމުގެ މަޝްރޫއުން ފްލެޓް ލިިބުމަށް ޝަރުތު ހަމަވާ ކަމަށެވެ.
އިމާރާތްކޮށްފައިވާ ޓަވަރުތަކަކުން ފްލެޓްތައް އަންނަ ނޮވެމްބަރުގައި ނިންމާނެ ކަމަށްވެސް އެ މީހާ ބުނެ އެވެ.
"ފައިސާގެ އެއްވެސް މުއާމަލާތެއް ނުހިނގާނެ. ފްލެޓަށް ފައިސާ ދައްކަން ޖެހޭނީ އެ ތަނަށް ވަންނަތާ ހަ މަސް ފަހުން ކޮންމެ މަހަކަަށް 5،500 ރުފިޔާ،" އެ ކޯލުގައި ވާހަކަ ދައްކާ މީހާ ބުނެ އެވެ.
އެކަމުގެ މައުލޫމާތުދޭން މިރޭ އެޗްޑީސީގައި ބައްދަލުވުމެއް ބާއްވާނެ ކަމަށާއި އެ ބާއްވާ ބައްދަލުވުމުގައި ބައިވެރިވެވޭނީ ރަޖިސްޓްރީވެގެން ކަމަށް ބުނެ ފޯނަށް ރަޖިސްޓްރީ ނަމްބަރެއް ވެސް ފޮނުވަ އެވެ.
އެޗްޑީސީ ނަމުގައި ފޭކް ކޯލްތަކެއް ކުރަމުން އަންނައިރު ބޭންކުގެ ނަމުގައި ފޭރޭ މައްސަލަތަކަކީވެސް ރާއްޖޭގައި އިތުރުވެފައިވާ މައްސަލައެކެވެ. އެކަން ހައްލު ކުރުމަށް އެތައް ގޮތަކުން މަސައްކަތް ކުރި ނަމަވެސް މިކަމަށް ހައްލެއް ނުލިބެ އެވެ.
