ހުޅުމާލޭ ދެވަނަ ފިޔަވަހިން ވިއްކާލަން ނިންމާފައިވާ ބިންތަކުގެ ތެރެއިން އަތިރިމައްޗާ ދިމާލުން (ބީޗު ސައިޑު) ވިއްކާލަން މަސައްކަތް ކުރާ ބިންތަކުގެ ބީލަން މާދަމާ އޮންނާނެކަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.
ހުޅުމާލޭން ބިން ވިއްކަން މަސައްކަތް ކުރާތާ އަހަރެއްހާ ދުވަސް ފަހުން މި ބިންތައް ވިއްކާލަން އެޗްޑީސީން އިއުލާނުކުރީ މިދިޔަ އަހަރުގެ ޑިސެމްބަރު 27 ގަ އެވެ. ޖުމްލަ 60 ބިމެއް ވިއްކާލާއިރު، ބީޗް ފްރޮންޓުން 26 ބިމެއް ފެބްރުއަރީ 9، ގައި ވަނީ ވިއްކާލާފަ އެވެ. މާދަމާ އޮންނާނީ ބީޗް ސައިޑުން ވިއްކާ 34 ބިމުގެ ބީލަމެވެ.
އެޗްޑީސީން އާންމުކޮށްފައިވާ ތާވަލުގައި ބުނާ ގޮތުން ބީލަން ކުރިއަށް ދާނީ ދެ މަރުހަލާއަކަށެވެ. އެއީ ބީލަން ފޯމު ބަލައިގަތުމާ ބީލަން ފޯމު ހުޅުވުމެވެ. ބީލަން ފޯމުތައް ބަލައިގަންނާނީ މާދަމާ ހެނދުނު 9:00 އިން މެންދުރު 12:00 އަށެވެ. އަދި ބީލަން ފޯމުތައް ހުޅުވާނީ މާދަމާ 13:00 ގަ އެވެ.
މިއީ ހުޅުވާލައިގެން ކުރިޔަށް ގެންދާ ބީލަމެކެވެ. އެހެންކަމުން ބީލަން ހުޅުވުން އޮންނާނީ ބީލަން ހުށަހެޅި މީހުންނަށް އާންމުކޮށް ހުޅުވާލައިގެންނެވެ. ބީލަން ހުށަހެޅުމާއި ހުޅުވުމުގެ ކަންކަން ކުރިޔަށްދާނީ ހ. މީރުމާ ދެވަނަ ފަންގިފިލާ (މީރުމާ އިވެންޓްސް) ގަ އެވެ.
ހުޅުމާލެ ދެވަނަ ފިޔަވަހިން ވިއްކާލާ ބިންތައް: ފެހި ކުލައިން ފާހަގަކޮށްފައި ހުރީ ބީޗު ސައިޑުން ވިއްކާ 34 ބިން. -- ފޮޓޯ: އެޗްޑީސީ
އެޗްޑީސީން ބުނި ގޮތުގައި ބީލަން ހުށަހެޅި މީހާ ނޫނީ އެ މީހާގެ ފަރާތުން އެކަކަށް ބީލަމުގައި ބައިވެރިވެވޭނެ އެވެ. އެކަމަކު ބީލަން ހުށަހެޅީ މީހާ ނޫން މީހަކަށް ބީލަމުގައި ބައިވެރިވެވޭނީ ޕަވާ އޮފް އެޓާނީ އޮވެގެން ކަމަށް އެ ކޯޕަރޭޝަނުން ބުންޏެވެ.
ވިއްކާލާ ބީޗު ސައިޑް ބިންތަކުގެ މުހިންމު މައުލޫމާތު
ވިއްކާލާ ބިމުގެ އަދަދު: 34
ބީލަން ފަށާ އަގު: އަކަފޫޓަކަށް 3،500ރ.
ބިޑް ސެކިއުރިޓީ: 320،000ރ.
ވިއްކާލާ ބިންތަކުގެ ސައިޒު: 1،603.07 އަކަފޫޓާއި 2،577.20 އަކަފޫޓާ ދޭތެރޭ
އެޗްޑީސީން ވިއްކަން ނިންމާފައިވާ 34 ބިމުގައި ޖުމްލަ 68502.66 އަކަފޫޓު ހުންނާނެ އެވެ. އެންމެ ކުޑަ އަގުން ބެލި ނަމަވެސް މި 34 ބިން ވިއްކައިގެން އެ ކުންފުންޏަށް 239.7 މިލިއަން ރުފިޔާ ލިބޭނެ އެވެ. ނަމަވެސް ކުރިން ވިއްކާފައި ހުރި ބިންތައް ވިކުނު ރޭޓަށް ބަލާނަމަ، ލަފާކުރެވެނީ މިއަށް ވުރެ ވެސް ބޮޑު އާމްދަނީ ލިބޭނެ ކަމަށެވެ.
އެގޮތުން، އެންމެފަހުން ބީޗް ފްރޮންޓުން ވިއްކި 26 ބިމުން ވެސް އެ ކުންފުންޏަށް 377.4 މިލިއަން ރުފިޔާ ލިބޭނެ ކަމަށް ބެލެވެ އެވެ. މިހެން ހިސާބުތަކުން ދެއްކި ނަމަވެސް ބިންތައް ވިއްކައިގެން ލިބޭ ސީދާ އަދަދު އެނގޭނީ ބިޑު ކާމިޔާބުކުރި މީހުން ހިޔާރު ކުރާ ޕްލޮޓުތައް އެނގުނީމަ އެވެ. ސަބަބަކީ ވިއްކާލާ ޕްލޮޓުތަކުގެ ސައިޒު ތަފާތު ވީމަ އެވެ.
ބިން ވިއްކައިގެން ލިބޭ އާމްދަނީ ބޭނުންކުރާނީ ހުޅުމާލޭގައި ހިންގާ ތަރައްގީގެ އެކިއެކި މަޝްރޫއުތަކަށް ކަމަށް އެޗްޑީސީން ބުންޏެވެ. އޭގެ ތެރޭގައި މިސްކިތްތަކާއި ސްކޫލްތަކާއި ޕާކުތައް ހިމެނޭ ކަމަށް އެ ކޯޕަރޭޝަނުން ބުނެ އެވެ.
އޭގެ ތެރޭގައި، ރައްޔިތުންގެ މަޖިލިހުގެ ރައީސް އަދި ވެރިކަން ކުރާ ކޯލިޝަނުގެ މައި ޕާޓީ އެމްޑީޕީގެ ރައީސް މުހައްމަދު ނަޝީދާއި އިދިކޮޅު ސިޔާސީ މީހުންނާއި އާންމުންގެ ގިނަ ބަޔަކު ހިމެނެ އެވެ. އަދި މާލެ ސިޓީ ކައުންސިލުން ވަނީ މިއީ ގާނޫނާ ހިލާފަަށް ކުރާ ކަމެއް ކަމަށް ވެސް ތުހުމަތުކޮށްފަ އެވެ.
އެ ތުހުމަތަށް ރައްދު ދެމުން އެޗްޑީސީން ބުނީ ހުޅުމާލޭން ބިން ވިއްކައިގެން އާމްދަނީ ހޯދުމަކީ އެ ކުންފުނީގެ ހައްގެއް ކަމަށާއި، ހުޅުމާލޭ ބިމުގެ ރަޖިސްޓްރީ ބާތިލުކުރި މައްސަލައިގައި ސިވިލް ކޯޓުން މާލެ ސިޓީ ކައުންސިލާ ދެކޮޅަށް ނެރުނު ވަގުތީ އަމުރުން އެކަން ސާފުކަމަށެވެ.
