ހައުސިން ޑިވެލޮޕްމަންޓް ކޯޕަރޭޝަނުން ހުޅުމާލެ ފޭސް 2 އިން ވިއްކަން އިއުލާންކުރި 26 ބިމަށް އަކަ ފޫޓެއްގެ ނިސްބަތުން 10 މިލިއަނާއި 6،759 ރުފިޔާ އާ ދެމެދުގެ އަގުތަކެއް ހުށަހަޅައިފި އެވެ.
އެޗްޑީސީން ބީލަން ހުޅުވާލީ މިއަދު ހެނދުނު 10:00 ގަ އެވެ. ބީލަން ހުށަހެޅުން ބަންދުކުރީ 12:00 ގަ އެވެ. ފޯމު ބަލައިގަތުން ބަންދުކުރުމާ ހަމައަށް 211 މީހަކު ބީލަން ހުށަހެޅި އެވެ.
ބީލަންވެރިންނަށް އާންމުކޮށް ހުޅުވާލައިގެން ކުރިޔަށްގެންދިޔަ މި ބީލަމުގައި އެންމެ ބޮޑު އަގެއް ހުށަހެޅީ އިބްރާހިމް މާޖިދު ކިޔާ މީހެކެވެ. އޭނާ ވަނީ އަކަ ފޫޓަކަށް 10 މިލިއަން ރުފިޔާ ހުށަހަޅާފަ އެވެ. އެއީ ވިއްކާލާ އެންމެ ކުޑަ ޕްލޮޓުގެ ސައިޒުން ބެލި ކަމުގައިވީ ނަމަވެސް 16 ބިލިއަން ރުފިޔާ އެވެ.
އެޗްޑީސީގެ އޮފިޝަލުން ވަނީ އޭނާ ހުށަހެޅި އަގަކީ ސައްހަ އަގުތޯ ކަށަވަރު ކުރަން މަސައްކަތް ކޮށްފަ އެވެ. ނަމަވެސް, އެ ވަގުތު މާލަމުގައި އޭނާ ހާޒިރުވެ ނެތުމުން އެކަމެއް ނުވި އެވެ. ނަމަވެސް، ހުރިހާ ޝަރުތަކާއި ލިޔެކިޔުންތައް ހަމަވާތީ އެޗްޑީސީގެ އޮފިޝަލުން ނިންމީ އޭނާގެ ބިޑު ބަލައިގަންނާށެވެ. އަދި ބަލައިގަތީ އަކަފޫޓަކަށް ހުށަހަޅާ އަގުގެ ގޮތުގައި އިނގިރޭސިންނާއި ދިވެހިން ވެސް ލިޔެފައިވާ 10 މިލިއަން ރުފިޔާ އެވެ.
އެންމެ ބޮޑު އަގު އަކަފޫޓެއްގެ ނިސްބަތުން ހުށަހެޅި 26 މީހުން
- އިބްރާހިމް މާޖިދު - 10،000،000ރ.
- އައިޝަތު ޒައިނާ ނާޒިމް - 10،220ރ.
- މަރިޔަމް ޒައްފަ ނާޒިމް - 10،220ރ.
- ހައްވާ ޒާހިރާ - 9،112.99ރ.
- ފާތިމަތު އިޝާ މުހައްމަދު - 9،105.99ރ.
- ޒީނިޔާ އަބްދުލްބާރީ - 8،227.86ރ.
- ހަނާން ހަސަން - 8،227،86ރ.
- އަހްމަދު ހަލީމް - 8،188.88ރ.
- އާމިރު މަންސޫރު - 7،711.99ރ.
- މޫސާ އިބްރާހިމް ދީދީ - 7،615ރ.
- މުހައްމަދު އަނިލް ނަދީމް - 7،555.99ރ.
- އަހްމަދު ޝަމްހީދު - 7،551ރ.
- މުހައްމަދު ހައިކަލް އައްބާސް - 7،509ރ.
- އާސިމާ އަލީ - 7،311.45
- މުހައްމަދު މުންޝިތު އިބްރާހިމް - 7،275.69ރ.
- އިމްރާން ޒާހިރު - 7،170ރ.
- އައްބާސް މުހައްމަދު - 7،157.79ރ.
- ފާތިމަތު ނަސީމާ - 7،111ރ.
- އިބްރާހިމް އާސިމް - 7،081ރ.
- މަރިޔަމް ޝިފާ - 7،080ރ.
- ފާތިމަތު ޒާހިދާ - 7،000ރ.
- މަރިޔަމް އަޒްހާ އިބްރާހިމް - 6،900ރ.
- އަނާރާ ނައީމް - 6،802ރ.
- ޔަމާމާ ނަޝީދު - 6،799ރ.
- މާޖިދާ އިބްރާހިމް - 6،790ރ.
- އިބްރާހިމް މުއާވިން - 6،759.11ރ.
މި ބިޑުތަކަށް ބަލާއިރު އެންމެ ބޮޑު އަގު ހުށަހެޅި ބިޑު ހިމެނޭހެން އަކަފޫޓަކަށް އެވެރެޖުކޮށް ޖެހެނީ 392,276.26ރ. އެވެ. ނަމަވެސް، 10 މިލިއަން ރުފިޔާގެ ބިޑު ނުހިމަނާނަމަ އެވެރުޖުކޮށް ޖެހެނީ އަކަފޫޓަކަށް 7،660.88ރ. އެވެ.
ވިއްކާލާ ބީޗު ފްރަންޓު ބިންތަކުގެ މުހިންމު މައުލޫމާތު
- ވިއްކާލާ ބިމުގެ އަދަދު: 26
- ބީލަން ފަށާ އަގު: އަކަފޫޓަކަށް 3،900ރ.
- ބިންތަކުގެ ސައިޒު: 1،676.05 އަކަފޫޓާއި 2،633.93 އަކަފޫޓާ ދޭތެރޭ
މި ބިންތައް ވިއްކަން ހަމަޖެހިފައިވަނީ އެންމެ ބޮޑު އަގު ހުށަހަޅާ 26 ފަރާތަކަށެވެ. ދެން އެންމެ މަތިން އަގު ހުށަހަޅާ ފަސް މީހަކު ވެއިޓްލިސްޓު ކުރެވޭނެ އެވެ.
މި ބީލަމާ ގުޅިގެން އެޗްޑީސީން ކޮށްފައިވާ އިއުލާނުގައި ބުނާ ގޮތުން އެންމެ ބޮޑު އަގު ހުށަހަޅާ މީހުންނަށް އެ މީހަކު ބޭނުން ބިމެއް ހިޔާރުކުރަން، ހުށަހެޅި އަގުގެ ތަރުތީބުން ފުރުސަތު ލިބޭނެ އެވެ. އެތަނަށް ފައިސާ ދައްކަން އިތުރު 60 ދުވަހުގެ މުއްދަތެއް ލިބެ އެވެ.
މި މުއްދަތުގެ ތެރޭގައި ފައިސާ ނުދައްކައިފިނަމަ ވެއިޓްލިސްޓު ކުރެވިފައިވާ މީހަކަށް ބިން ގަންނަން ފުރުސަތު ދޭނެ އެވެ.
