ހުޅުމާލޭގެ ދެވަނަ ފިޔަވަހީގައި ޕްރީ-ސްކޫލެއް އަޅައިދޭނެ ބަޔަކު ހޯދަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހުޅުވާލައިފި އެވެ.
އެޗްޑީސީން މިއަދު ކުރި އިއުލާނެއްގައި ބުނީ ދެ ވަނަ ފިޔަވަހީގައި ޕްރީ-ސްކޫލެއް އަޅަން ބިޑު ހުށަހެޅޭނީ 100 ޕަސަންޓް ދިވެހި ހިއްސާ އޮންނަ ކުންފުނިތަކަށް އެކަނި ކަމަށެވެ. އެގޮތުން، އެޗްޑީސީގެ ޕޯޓަލްގައި ވެންޑާ ރަޖިސްޓްރީކުރާ ފަރާތްތަކުން އެންމެ ލަސްވެގެން މިމަހުގެ 15 ވަނަ ދުވަހުގެ ހެނދުނު 11:00 ބިޑު ހުށަހަޅަން ޖެހޭނެ ކަމަށް އެޗްޑީސީން ބުންޏެވެ.
އެއް ފަންގިފިލާގެ އެ ސްކޫލް އަޅަނީ، އެޗްޑީސީން ތައްޔާރުކޮށްފައިވާ ޑިޒައިނަށް ގާތްގަނޑަކަށް 22،000 އަކަފޫޓުގެ ސަރަހައްދެއްގަ އެވެ. އެ ސްކޫލް އަޅަން ބިޑު ހުށަހަޅާ ފަރާތްތަކުން ބިޑް ސެކިޔުރިޓީގެ ގޮތުގައި 680،000ރ. ބަހައްޓަންޖެހޭނެކަމަށް ވެސް އެ އިއުލާނުގައި ބުނެފައި ވެއެވެ.
ޕްރީ-ސްކޫލެއްގެ އިތުރުން ހުޅުމާލޭ ދެވަނަ ފިޔަވަހީގައި ދެ ސްކޫލެއް އިމާރާތްކޮށްދޭނެ ބަޔަކު ހޯދަން މިދިޔަ އަހަރުގެ ފަހުކޮޅު ދެ ފަހަރެއްގެ މަތިން ފިނޭންސް މިނިސްޓްރީން ހުޅުވައިލި އެވެ.
ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ 7،000 ޔުނިޓު ހިމެނޭ ހިޔާ ފްލެޓުތަކުގައި މީހުން ދިރިއުޅެން ފަށާފައިވާއިރު، އެތަނުގައި ވަސީލަތްތައް ގާއިމުކުރުން ލަސްވުމުގެ ޝަކުވާ ދަނީ ކުރަމުންނެވެ.
