ކޮވިޑް ވެކްސިން ޖެހުމަށްފަހު ދެ ހަފްތާ ވަންދެން ގަދަޔަށް ކަސްރަތުކުރުން މެދުކަނޑާލުމަކީ އެދެވިގެންވާ ކަމެއް ކަމަށް މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮފް އިމިއުނައިޒޭޝަންގެ ޗެއާޕާސަން އަދި ކުޑަކުދިންގެ ހާއްސަ ޑރ. އަހުމަދު ފައިސަލް ވިދާޅުވެއްޖެ އެވެ.
ވެކްސިނާއި ކަސްރަތާ ގުޅުވައި ވާހަކަތައް ދެކެވެން ފެށީ ރާއްޖޭގެ ޓެކް ދާއިރާގައި މަޝްހޫރު އަހްމަދު ރިޔަޒީ މުހައްމަދު (ޑާޑި) 33، ބޫސްޓާ ޑޯޒް ޖެހިތާ ތިން ގަޑިއިރުގެ ތެރޭގައި ކުއްލި ގޮތަކަށް ނިޔާވުމާއި ގުޅިގެންނެވެ. އޭނާ ނިޔާވީ ވެކްސިން ޖެހުމަށްފަހު މެލޭޝިއާގައި އިއްޔެ ކަސްރަތަށް ނުކުމެ އުޅެނިކޮށެވެ.
މިކަމާއި ގުޅުގެން "އަދަދު" އިން ސުވާލު ކުރުމުން ޑރ. ފައިސަލް ވިދާޅުވީ ވެކްސިން ޖަހައިގެން ދުވެ، ކަސްރަތުކޮށް، ޖިމް ޖެއްސުމަކީ މީހާގެ ފުރާނަ ނުރައްކަލަކަށް ހުށަހެޅުމުގެ ފުރުސަތު އޮތް ކަމެއް ކަމަށެވެ. އަދި އެފަދަ ކޭސްތަކެއް ދުނިޔޭގެ ބައެއް ގައުމުތަކުން މަދުން ނަމަވެސް ރިކޯޑް ކޮށްފައިވާކަން އޭނާ ފާހަގަކުރެއްވި އެވެ.
"ގަދަޔަށް ކުރާ ކަސްރަތު، ދުވުން، ޖޮގިން ކަހަލަ ކަސްރަތުތައް ޖެހޭނެ ދެ ހަފްތާއަށް މަޑުކޮށްލަން. އެއީ އަބަދުުވެސް ކޮވިޑް ވެކްސިންގައި އިންނަ ޕްރިކޯޝަނެއް (ސަލާމަތީ ފިޔަވަޅެއް) އަސްލު." ފައިސަލް ވިދާޅުވި އެވެ.
ޑރ. އަހްމަދު ފައިސަލް--
އޭނާ އިތުރަށް ކިޔައިދިން ގޮތުގައި ވެކްސިން ޖަހައިގެން އެފަދަ ކަސްރަތުތައް ކުރުމުގެ ސަބަބުން ބައެއް މީހުންނަށް ހާޓް އެޓޭކް ޖެހިފައި އެބަހުއްޓެވެ. އެގޮތަށް އެންމެ ގިނައިން ދިމާވެފައި ހުރީ 30 އަހަރުން ދަށުގެ ޒުވާނުންނަށްކަން ޑރ. ފައިސަލް ފާހަގަކުރެއްވި އެވެ.
"ބައެއް ފަހަރު ވަރުބަލިވެގެން ހޮސްޕިޓަލުގައި ބާއްވަން ޖެހިފައިވެސް އެބަހުރި. ބައެއް ފަހަރު އެބަހުރި ނިޔާވެފައިވެސް." ވެކްސިން ޖަހައިގެން ދުވުމުގެ ނުރައްކާ ފައިސަލް ކިޔައިދިނެވެ.
ނަމަވެސް އަދި މިކަހަލަ ކޭސްއެއް ރާއްޖޭގައި ރިޕޯޓްކޮށްފައި ނުވާ ކަމަށް ވިދާޅުވެ، ފައިސަލް ވަނީ އެކަމަށް ސަމާލުވުމަށް ހާއްސަކޮށް ޒުވާނުންނަށް އިލްތިމާސް ކުރައްވާފަ އެވެ.
ކަސްރަތު ކުރުމާއި ދުރަށް ދިއުމަށް އެދުނަކަސް، އާންމު ދިރިއުޅުމުގައި ކުރާ ކަންތައްތައް ކުރުމަށް ހުރަހެއް ނެތް ކަމަށް ވެސް ފައިސަލް ވިދާޅުވި އެވެ.
22 ޖެނުއަރީ 2022 އާއި ހަމައަށް ކޮވިޑް ވެކްސިން ޖެހި މީހުންގެ އަދަދުތައް:
އެއްވަނަ ޑޯޒް: 397،382 މީހުން
ދެވަނަ ޑޯޒް: 369،151 މީހުން
ބޫސްޓާ ޑޯޒް: 49،142 މީހުން
ރާއްޖޭގައި ކޮވިޑް ހާލަތު ގޯސްވަމުންދާއިރު، މިހާރު ދުވާލެއްގެ މައްޗަށް ޕޮޒިޓިވްވާ މީހުންގެ އަދަދު އުޅެނީ 2،400 އިން މަތީގަ އެވެ. 117 ހާހަށް ވުރެ ގިނަ މީހުންނަށް މިހާރު ބަލި ޖެހިފައި ވާއިރު، އޭގެ ތެރެއިން 47 މީހަކަށް ދަނީ އެޑްމިޓްކޮށްގެން ފަރުވާ ދެމުންނެވެ. ހަތަރު މީހަކު އޮތީ ވެންޓިލޭޓަރުގަ އެވެ.
މިހާތަނަށް މި ބަލީގައި ރާއްޖެއިން ޖުމްލަ 270 މީހަކު ވަނީ މަރުވެފަ އެވެ.
