ސުވާލު އުފެދޭ ފަދަ ގޮތަކަށް މަރުވެފައި އޮއްވާ ފެނުނު އައިޖީއެމްއެޗުގެ ފިލިޕީންސް ނަރުސް މޭރީ ގްރޭސް ޕިނޭޑާގެ މަރުގެ މައްސަލައިގައި އޭނާގެ ފިރިމީހާ މާވިން އާއި ފިރިމީހާގެ ލޯބިވެެރިޔާ، ހަލީމަތު ލަމްހާ އަބްދުއްރަހުމާންގެ މައްޗަށް ކުރާ ދައުވާތަކުގެ ޝަރީއަތް ކްރިމިނަލް ކޯޓުގައި މާދަމާ ފަށަން ތައްޔާރުވެއްޖެ އެވެ.
މޭރީގެ މަރުގެ މައްސަލައިގައި އޭނާގެ ފިރިމީހާ ހައްޔަރު ކޮށްފައިވަނީ މިދިޔަ އަހަރުގެ އޮކްޓޯބަރު މަހުގެ 27 ވަނަ ދުވަހު އެވެ. އަދި ލަމްހާ ހައްޔަރުކޮށްފައިވަނީ ޑިސެމްބަރު މަހުގެ 16 ވަނަ ދުވަހު އެވެ.
ކްރިމިނަލް ކޯޓުގައި މޭރީ ގްރޭސްގެ މަރުގެ މައްސަލައިގެ ޝަރީއަތް ކުރިއަށް ގެންދަން ނިންމާފައި ވަނީ ހެނދުނު 10:00 ގަ އެވެ.
ގްރޭސް މަރާލާފައިވަނީ އޭނާ ދިރިއުޅެމުންދިޔަ އުދުހޭކޮކާ ގޭގެ ފުރަތަމަ ފަންގިފިލާގެ ކޮޓަރިއެއްގެ ތެރޭގަ އެވެ.
ކްރިމިނަލް ކޯޓަށް މިހާރު ހުށަހެޅާފައިވާ މައްސަލާގައި މާވިންއަށް ދައުވާ ކުރަނީ ގަސްތުގައި މީހަކު މަރާލުމުގެ ކުށުގެ ދައުވާ އެވެ. ލަމްހާއަށް ކުރަނީ ގްރޭސް މަރާލުމުގައި ބައިވެރިވުމުގެ ކުށުގެ ދައުވާ އެވެ.
މާވިންއަށް ދައުވާ ކުރަނީ ގްރޭސްގެ ބޮލަށާއި ކަރަށް ހަމަލާދީގެންނާއި ނޭވާ ހާސްކޮށްގެން މަރާލާފައިވާ ކަމަށް ތުހުމަތުކޮށެވެ. މި ދައުވާ ސާބިތުވެއްޖެ ނަމަ އޭނާގެ މައްޗަށް 10 އަހަރުގެ ހުކުމެއް އަންނާނެ ކަމަށް ޕީޖީ އޮފީހުން ލަފާ ކުރެއެވެ.
މީގެ އިތުރުން އެހެން މީހެއްގެ މުދަލެއްގެ މައްޗަށް ހުއްދަ ނޫންގޮތެއްގައި ބާރުހިންގުމުގެ ކުށުގެ ދައުވާ އާއި ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގާ ކުރުމުގެ ކުށުގެ ދައުވާ ލަމްހާގެ މައްޗަށް ކުރެ އެވެ. އެއީ އޭނާގެ އަނބިމީހާގެ މަރާއި ގުޅިގެން އެ ގެ ބަލާ ފާސްކުރި އިރު، ހޮސްޕިޓަލުގެ ބޭނުމަށް އެކަނި ދޫކުރާ އިންޖެކްޝަންތަކާއި، އެހެނިހެން ސާމާނުތައްވެސް އެގެއިން ފެނިފައިވުމުންނެވެ.
ގްރޭސް މަރާލަން މަގުފަހިކޮށްދީ، އެ އަމަލު ރޭވުމުގެ ދައުވާ ސާބިތުވެއްޖެ ނަމަ ހަ އަހަރުގެ ހުކުމެއް އޭނާގެ މައްޗަށް އަންނަނެ ކަމަށް ޕީޖީއިން ދެކެ އެވެ. ނަމަވެސް އާންމުކޮށް މަރުގެ މައްސަލަތަކުގައި އަންނަނީ އުމުރު ދުވަހުގެ ހުކުމެކެވެ.
ގްރޭސް އޭނާގެ ފިރިމީހާއާ ކައިވެނިކޮށްފައި ވަނީ މީގެ ފަސް އަހަރު ކުރިން 2016 ވަނަ އަހަރުގެ މެއި މަހުގެ ތެރޭގަ އެވެ. ގްރޭސް ކުރިން މަސައްކަތްކޮށްފައި ވަނީ ފްރެސިނިއަސް މެޑިކަލް ކެއާގަ އެވެ. އެއީ ޑަޔަލަސިސް ހެދުމާއި ކިޑްނީގެ ބަލިތަކަށް ހާއްސަ ފަރުވާދޭ ސެންޓަރެކެވެ.
