ހުޅުމާލޭ ދެ ވަނަ ފޭސްގައި 25 ބުރިއަށް އިމާރާތްކޮށްފައިވާ ހިޔާ ފްލެޓުތަކުގެ ލިފްޓުތައް ކައިރީގައި ތޮއްޖެހޭތީ ލޮބީ އޭރިއާ ބޮޑުކުރުމުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު ފަށައިފި އެވެ.
އެ އޮފީހުން މިއަދު ބުނެފައި ވަނީ ލިފްޓު އަރާ މީހުން ގިނަވެ، ތޮއްޖެހެނީ ޕީކު ގަޑިތަކުގައި ކަމަށެވެ. އޭގެ ތަފްސީލު އެޗްޑީސީން ދީފައި ނެތް ނަމަވެސް ބެލެވޭ ގޮތުގައި އެއީ ފްލެޓުތަކުގައި ދިރިއުޅޭ މީހުން ހެނދުނު މަސައްކަތަށް ދާ ގަޑިތަކާއި ދަރިވަރުން ސްކޫލަށްދާ ގަޑިތަކެވެ.
ހިޔާ މަޝްރޫއުގައި 16 ޓަވަރު ހަދާފައިވާއިރު، ކޮންމެ ފްލޯއެއްގައި، 20 ފްލެޓް ހުރެ އެވެ. އަދި ކޮންމެ ފްލެޓެއްގައި މަދުވެގެން ފަސް މީހުން ދިރިއުޅޭނެ ކަމަށް ހައުސިން ޑެވެލޮޕްމަންޓް ކޯޕަރޭޝަނުން ލަފާކުރެ އެވެ. އެހެންކަމުން އެއީ ފްލޯއެއްގައި 100 މީހުންނެވެ.
އެ އަދަދުން ބަލާ ނަމަ ކޮންމެ ޓަވަރެއްގައި، ގާތްގަނޑަކަށް 2،400 މީހުން ދިރިއުޅުން އެކަށީގެންވެ އެވެ. މުޅި 16 ޓަވަރަށް ބަލާ ނަމަ އެ އަދަދު 40،000 އާ ކައިރިކުރާނެ އެވެ.
ހިޔާ ފްލެޓުތައް ޑިޒައިންކޮށްފައި ވަނީ ސްލަމް އޭރިއާތައް އުފުދޭނެ ގޮތަށް ކަމަށް މީގެ ކުރިން މި ސަރުކާރުން ބުނެފައިވެ އެވެ. ހިޔާ ފްލެޓް ސިފަ ކުރައްވަމުން ރައީސް ސޯލިހު ވިދާޅުވީ އެއީ "މީހުން އުޅެން ހެޔޮވާވަރު ތަނެއް ނޫން" ކަމަށެވެ.
"ބޭރަށް ވަރަށް ރީތި، އެކަމަކު އެއީ މީހުން އުޅެން ހެޔޮވާވަރު ތަނެއް ނޫނޭ އަޅުގަނޑު މިހާރު ވެސް ދަންނަވާނީ،" ޖޫން، 2020 ގައި ބޭއްވި ނޫސްވެރިންގެ ބައްދަލުވުމެއްގައި ރައީސް ވިދާޅުވި އެވެ.
