ދާދި ފަހުން ގައުމީ ޓީމުގެ މެޗުތަކެއްގެ ތެރެއިން އަނިޔާވި ޒުވާން ދެ ފޯވާޑުން ކަމަށްވާ މުހައްމަދު ޖައިލަމް (އޮގީ) އާއި މުހައްމަދު ނާއިމް ދެ އަހަރު ތެރޭ ކަކުލުގެ ދެ އޮޕަރޭޝަނެއް ކޮށްފި އެވެ.
ކ. ގުރައިދޫ އަށް އުފަން އުމުރުން 25 އަހަރުގެ ނާއިމްގެ ކަކުލަށް އެންމެ ފުރަތަމަ އަނިޔާވީ 2019 ވަނަ އަހަރު އޮކްޓޫބަރު މަހު ދިވެހި ޕްރިމިއާ ލީގުގެ ޗެމްޕިއަން މާޒިޔާއާ ދެކޮޅަށް ކުޅުނު މެޗުގަ އެވެ. އުމުުރުން 22 އަހަރުގެ އޮގީގެ ކަކުލަށް އެންމެ ފުރަތަމަ ސީރިއަސް އަނިޔާއެއް ލިބުނީ 2019 ވަނަ އަހަރުގެ ޑިސެމްބަރު މަހު އީގަލްސްއާ ދެކޮޅަށް ކުޅުނު މެޗުގެ ތެރެއިންނެވެ.
ނާއިމް އާއި އޮގީ ވެސް އެންމެ ފުރަތަމަ ކަކުލުގެ އޮޕަރޭޝަނެއް ކުރީ މިދިޔަ އަހަރު ޖެނުއަރީ މަހު އެވެ. ނާއިމް އާއި އޮގީ ދެ ވަނަ އޮޕަރޭޝަން ކުރީ މިއަދު އެވެ.
ކްލަބް އީގަލްސް އަށް ކުޅޭ ނާއިމްގެ ކަކުލަށް މި ފަހަރު އަނިޔާވީ އުރީދޫ ސާފް ޗެމްޕިއަންޝިޕަށް ތައްޔާރުވާން ގަތަރުގައި ކުރިއަށް ދިޔަ ޓްރެއިނިން ކޭމްޕްގެ ތެރެއިން ގަތަރުގެ އާމީ ނެޝަނަލް ޓީމާ ދެކޮޅަށް ކުޅުނު މެޗުގަ އެވެ. ސެޕްޓެމްބަރު 25 ވަނަ ދުވަހު ގަތަރުގެ އާމީ ކްލަބާ 1-1 އިން ރާއްޖެ އެއްވަރުވި މެޗުގެ ދެ ވަނަ ހާފްގައި ބަދަލު ކުޅުންތެރިއެއްގެ ގޮތުގައި ކުޅެން އެރިތާ މާގިނައިރެއް ނުވެ ނާއިމް ކަކުލަށް އަނިޔާވެގެން ބަދަލުކުރަން ޖެހުނެވެ.
ކްލަބް ގްރީން ސްޓްރީޓްސްގެ ކޮންޓްރެކްޓްގައި ހުރި އދ. ހަންޏާމީދު އަށް އުފަން އޮގީ އަށް އަނިޔާވީ 23 އަހަރުން ދަށުގެ ގައުމީ ޓީމާ އެކު އޭޝިއާގެ 23 އަހަރުން ދަށުގެ މުބާރާތުގެ ކޮލިފައިންގައި ވާދަކުރަން ބަހްރޭނުގައި ކުޅެނިކޮށެވެ. ކޮލިފައިން ދެ ވަނަ މެޗުގައި ބަހްރޭނާ ދެކޮޅަށް ރާއްޖެ ކުޅުނު މެޗުގެ ދެ ވަނަ ހާފުގައި ބަދަލެއްގެ ގޮތުގައި ކުޅެން އެރި އޮގީ އަށް މެޗުގެ ފަހު ކޮޅުގައި އަނިޔާވެގެން ބަދަލުކުރަން ޖެހުނީ ސްޓްރެޗަރުގަ އެވެ.
އޮގީ އާއި ނާއިމް ވެސް ފުރަތަމަ ލިބުނު ކަކުލުގެ އަނިޔާ އިން ރަނގަޅުވެ، ކުޅުމަށް އެނބުރި އައީ މިދިޔަ ސީޒަން ފެށުނުއިރު އެވެ. އެހާތަނަށް އާދެވުނީ ކޮވިޑާ ހެދި މިދިޔަ ސީޒަން ފެށީ ހަތް މަހުގެ ބްރޭކަކަށް ފަހު ކަމަށްވާތީ އެވެ. މި ފަހަރު މި ލިބުނު އަނިޔާގެ ރިކަވަރީގެ ސަބަބުން ނާއިމާއި އޮގީ އަށް މި ސީޒަނުގެ ގިނަ މެޗުތަކެއް ގެއްލޭނެ އެވެ.
ޕްރެޒިޑެންޓްސް ކަޕްގެ ފުރަތަމަ މެޗުތަކުގެ ކުރިން ބޭއްވި ނޫސްވެރިންގެ ބައްދަލުވުމުގައި ގްރީން ސްޓްރީޓްސްގެ ކޯޗު އަލީ ނިސްތާރު މުހައްމަދު ބުނީ އުއްމީދުކުރަނީ އޮގީ އަށް އަންނަ ފެބްރުއަރީ މަހު ފަށާ ދިވެހި ޕްރިމިއާ ލީގުގެ ދެ ވަނަ ބުރުގެ ތެރޭގައި ކުޅެވޭނެ ކަމަށް އުއްމީދުކުރާ ކަމަށެވެ.
