ހުޅުމާލެ ފޭސް ދެއަކަށް އުރީދޫގެ ހިދުމަތްތައް ދިނުމަށްޓަކައި، އުރީދޫ މޯލްޑިވްސްއާ ހައުސިން ޑެވެލޮޕްމެންޓް ކޯޕަރޭޝަން (އެޗްޑިސީ)އިން ޕާޓްނާޝިޕް އެގްރިމެންޓެއްގައި ސޮއިކޮށްފި އެވެ.
އެޗްޑީސީގެ މީޑިއާ އޮފިޝަލް އަލީ މަޝާރު ވިދާޅުވީ މިއަދު ސޮއިކުރި އެއްބަސްވުމުގެ ދަށުން ހުޅުމާލެ ފޭސް ދެއެއް ގައި އެޗްޑިސީން ގާއިމުކޮށްފައިވާ އޯޕަން އެކްސެސް ނެޓްވޯކް މެދުވެރިކޮށް އުރީދޫގެ ހުރިހާ ހިދުމަތެއް ވެސް ލިބިގެންދާނެ ކަމަށެވެ.
"އެ ސަރަހައްދުގައި ދިރިއުޅޭ އާންމުންނަށް އުރީދޫގެ ސެލިއުލާ ނުވަތަ ޑާޓާ ހިދުމަތް، ވައިފައި އަދި މޮބައިލް ކަނެކްޝަންގެ ހިދުމަތް ރަނގަޅުވެގެން ދާނެ، ރޭންޖުގެ މައްސަލަތަކަށް ދާންދެން،" މަޝާރު ވިދާޅުވި އެވެ.
މަޝާރު ވިދާޅުވީ އޯޕަން އެކްސެސް ނެޓްވޯކުގެ ދަށުން އުރީދޫގެ ހިދުމަތް ދޭނީ އެޗްޑީސީން ކުރިން ގާއިމުކޮށްފައިވާ އިންފްރާސްޓްރަކްޗާ މެދުވެރިކޮށް ކަމަށެވެ. އަދި ތަފާތަކީ އިތުރު ކޭބަލް އެޅުމާއި ސެލިއުލާ ޓަވަރު އެޅުމުގެ މަސައްކަތް ކުރަން ނުޖެހުމެވެ.
"އެޗްޑީސީގެ ސެލިއުލާ އަދި ފައިބާ ޓަވަރުތައް މެދުވެރިކޮށް އެ ހިދުމަތްތައް ދޭނީ،" އޭނާ ވިދާޅުވި އެވެ.
އެ އޯޕަން އެކްސެސް ނެޓްވޯކަކީ ދިރާގު އަދި މީޑިއާނެޓުގެ ހިދުމަތްތައް ވެސް ފޭސް ދެއަކަށް ދޭން ބޭނުންކުރާ ނެޓްވޯކެވެ.
ހުޅުމާލެ ފޭސް ދެއެއްގައި އަޅާފައިވާ ހިޔާ ފްލެޓްތައް ނިމި، މިހާރު އެ ސަރަހައްދަށް ގިނަ އަދަދެއްގެ ބަޔަކު އަންނަނީ ދިރިއުޅުން ބަދަލުކުރަމުންނެވެ. އެ ސަރަހައްދުގައި އޭގެ ކުރިން ވެސް އަމިއްލަ ބައެއް ގޭގޭގައި މީހުން ދިޔައީ ދިރިއުޅެމުންނެވެ. އޭރު ވެސް އެ ސަރަހައްދުގައި ރޭންޖު އަދި އިންޓަނެޓުގެ މައްސަލަތަކާ ހެދި އާންމުންގެ ޝަކުވާ ބޮޑުވި އެވެ.
