ކުރީގެ ސަރުކާރުން ހުޅުމާލޭގެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓުތަކުގައި ބައެއް އާއިލާތަކުން މިހާރު ދިރިއުޅެން ފަށާފައިވާއިރު، އެ ތަނުން އުފެދޭ ކުނީގެ މައްސަލަ ބޮޑުވެފައިވަނިކޮށް، އެ މައްސަލައަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވަގުތީ ހައްލެއް ގެނެސްފި އެވެ.
އެޗްޑީސީން މިއަދު ކުރި އިއުލާނެއްގައި ބުނީ ހިޔާ ފްލެޓު ލިބިފައިވާ ފަރާތްތަކުގެ ތެރެއިން މިހާރު އެތަނުގައި ދިރިއުޅެމުންދާ ފަރާތްތަކުގެ އިތުރުން، ފްލެޓުތަކުގެ ފިނިޝިން މަސައްކަތް ކުރާ ފަރާތްތަކުގެ ގޭބީސީތަކުން އުފެދޭ ކުނިވާ ޒާތުގެ ކުނި އުކާލުމަށްޓަކައި އެ ހިދުމަތް ވެމްކޯއިން ރަސްމީކޮށް ފެށެންދެން އެތަނުގެ ހަ ސަރަހައްދެއްގައި ޑަސްޓްބިން ބެހެއްޓިފައިވާ ކަމަށެވެ.
"ވީމާ ހިޔާ ފްލެޓު ލިބިފައިވާ ފަރާތްތަކުގެ ތެރެއިން މިހާރު ފްލެޓުގައި ދިރިއުޅެމުންދާ ފަރާތްތަކާއި އަދި ފްލެޓުތަކުގައި މަސައްކަތް ކުރަމުން ގެންދާ ފަރާތްތަކުން، އެ ޓަވަރަކާއި އެންމެ ކައިރީގައިވާ ޑަސްޓްބިނަށް ކުޅި އެޅުމަށް ދެންނެވީމެވެ،" އެ އިއުލާނުގައި ބުންޏެވެ.
އެޗްޑީސީން އިތުރަށް ބުނީ އެތަނުން ކުނި ނެގުމަށް ހަމަޖެހިފައިވަނީ ކޮންމެ ދުވަހެއްގެ ހެނދުނު 8:00 އިން މެންދުރު 12:00 އަށް ކަމަށްވާތީ، އެ ވަގުތުތަކުގެ ކުރިން ޑަސްޓްބިނަށް ކުނި އެޅުމަށް އިލްތިމާސްކުރާ ކަމަށެވެ.
އަދި ހިޔާ ފްލެޓުގެ އިމާރާތުގެ އެއްވެސް ތަނެއްގައި ކުނި ނުބެހެއްޓުމަށް ވެސް އެޗްޑީސީން ވަނީ އިލްތިމާސްކޮށްފަ އެވެ.
