އުއްތަމަ ފަނޑިޔާރު އަހުމަދު މުއުތަސިމް އަދުނާނުގެ ދިރިއުޅުއްވާ ގެކޮޅަށް ބުރާސްފަތި ދުވަހު މީހަކު ވަންނަން އުޅުނު ކަމަށް ބުނާ މައްސަލަ ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ފަރާތުން ކުށްވެރިކޮށްފި އެވެ.
މުއުތަސިމްގެ އެމަނިކުފާނުގެ އާއިލާގެ މެމްބަރުންނާއެކު ދިރިއުޅުއްވާ ގެކޮޅަށް ވަންނަން އުޅުނު ކަމަށް ބެލެވޭ މައްސަލައެއް ފުލުހުންނަށް ހުށަހަޅާފައި ވަނީ އުއްތަމަ ފަނޑިޔާރަށް ސެކިއުރިޓީ ފޯރުކޮށްދޭ ސިފައިންގެ ފަރާތުންނެވެ.
އެކަމާ ގުޅިގެން އެމްޑީޕީން މިއަދު ނެރުނު ބަޔާނެއްގައި ބުނެފައި ވަނީ މުއުތަސިމްގެ ދިރިއުޅުއްވާ ގެކޮޅުގެ "ސީސީޓީވީ ކެމެރާތައް ހަލާކުކޮށްލައި، ސެކިއުރިޓީ ފޫއަޅުވާލައި، އެ ގެކޮޅަށް އިއްޔެ މީހަކު ވަދެގަނެފައިވީހިނދު" އެމަނިކުފާނުގެ ސަލާމަތާމެދު ކަންބޮޑުވާ ކަމަށެވެ.
އުއްތަމަ ފަނޑިޔާރުގެ ގެކޮޅަށް ގެއްލުންދީ، އެ ގެއަށް މީހަކު ވަން ކަމަށް އެމްޑީޕީން ބުނި ނަމަވެސް ފުލުހުން އެކަން ކަށަވަރެއްނުކޮށްދެ އެވެ. ފުލުހުންގެ ބުނީ އެ އިދާރާއަށް ހުށަހަޅާފައި އޮތީ މުއުތަސިމްގެ ގެކޮޅުގައި ހަރުކޮށްފައި ހުރި ސެކިއުރިޓީ ކެމެރާއެއް އޭގެ އަމާޒުން އަނބުރާފައިވާ މައްސަަލައެއް ކަމަށެވެ.
މުއުތަސިމްގެ ގެކޮޅަށް މީހަކު ވަންނަން އުޅުނު ކަމަށް ބެލެވޭ ހާދިސާއެއް ހިނގާފައި މި ވަނީ މިދިޔަ މެއި 6، ގައި ޓެރަރިސްޓު ޖަމާއަތް އައިސިސްއާ ގުޅުން އޮންނަ ބަޔަކު ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލުމަށް ބާރުގަދަ ބޮމެއް ގޮއްވާލައި، އެމަނިކުފާނާއެކު އިތުރު ހަތަރު މީހަކު ޒަހަމްކޮށްލާފައި އޮއްވަ އެވެ.
ނަޝީދަށް ދިން ހަމަލާއާއެކު ދައުލަތުގެ ތިން ބާރުގެ ވެރިންގެ ސަލާމަތީ ކަންކަން ވަރުގަދަ ކުރުމަށް އަންނަނީ މަސައްކަތް ކުރަމުންނެވެ. އެގޮތުން އުއްތަމަ ފަނޑިޔާރާއި މަޖިލީހުގެ ރައީސަށް ހާއްސަ ދެ ގެކޮޅު އެޅުމުގެ މަސައްކަތް މިހާރު ދަނީ ކުރަމުންނެވެ.
