ލިވަޕޫލް (ސެޕްޓެމްބަރު 21) - އެވަޓަން އަށް ކުޅެމުން އަންނަ ކޮލަމްބިއާގެ މިޑްފީލްޑަރު ހަމޭސް ރޮޑްރިގޭޒް ގަތަރުގެ ކްލަބަކަށް ވިއްކާލަން މަޝްވަރާ ކުރަމުން އަންނަ ކަމަށް އިނގިރޭސި މީޑިއާތަކުން ރިޕޯޓްކޮށްފި އެވެ.
މި ސީޒަނުގައި އެވަޓަން ކޯޗުކަމަށް ރަފައެލް ބެނިޓޭޒް ހަވާލުވި ފަހުން މިހާތަނަށް ހަމޭސް އެންމެ މެޗެއް ވެސް ކުޅެފައި ނުވެ އެވެ. ބެނިޓޭޒްގެ ޕްލޭންގައި ހަމޭސް ނުހިމެނޭތީ މި ފަހަރުގެ ޓްރާންސްފާ މާކެޓްގައި އޭނާ ވަނީ އަލުން ޕޯޗުގަލްގެ ޕޯޓޯ އަށް ބަަދަލުވާން ވާހަކަ ދައްކައިފަ އެވެ.
އެ ޓްރާންސްފާ ނުހިނގީ އެވަޓަން އިން ބޭނުންވި ވަރުގެ ޓްރާންސްފާ ފީއެއް ދޭން ޕޯޓޯ އިން ދެކޮޅު ހެދުމުންނެވެ. ހަމޭސް ވަނީ މީގެ ކުރިން ޕޯޓޯ އަށް ކުޅެފަ އެވެ.
މި މަހުގެ ނިޔަލަށް ގަަތަރުގެ ޓްރާންސްފާ މާކެޓް ހުޅުވިފައި އޮތްއިރު، ހަމޭސް އަންނަނީ ގަތަރުގެ ތިން ކްލަބަކާ ވާހަކަ ދައްކަމުންނެވެ. ހަމޭސް ގަތަރުގެ ކްލަބަކާ ގުޅެން ބޭނުންވަނީ އަންނަ އަހަރުގެ ވޯލްޑް ކަޕް ވެސް އޮތީ ގަަތަރުގައި ކަމަށް ވެފައި އެ މާހައުލަށް ހޭނުމުގެ ގޮތުންނެވެ.
ހަމޭސް އާއި އެވަޓަންގެ ސަޕޯޓަރުންނާ މެދު ވެސް ވަނީ މައްސަލަތަކެއް ޖެހިފަ އެވެ. އެއީ ސޯޝަލް މީޑިއާގައި އެވަޓަންއާ ބެހޭގޮތުން ހަމޭސް ދެއްކި ވާހަކަތަކެއްގެ ސަބަބުންނެެވެ. ހަމޭސް ބުނީ އެވަޓަން އަށް އޭނާ އައި ސަބަބަކީ ކުރިން އެ ޓީމުގައި ހުރި ކޯޗު ކާލޯ އަންޗެލޮޓީ ކަމަށެވެ. އަދި ހަމޭސް ވަނީ އެވަޓަން އަކީ ތާރީހެއް އޮތް ކްލަބެއް ކަމެއް ކުރިން އޭނާ އަށް ނޭނގޭ ކަމަށް ބުނެފަ އެވެ.
ބްރެޒިލްގައި 2014 ވަނަ އަހަރު ބޭއްވި ފީފާ ވޯލްޑް ކަޕުގައި އެންމެ ގިނަ ގޯލު ޖަހައިގެން ވިދާލި ހަމޭސް، އެ އަހަރު ވަނީ އަންޗެލޮޓީގެ ކޯޗުކަމުގައި ކުޅުނު ރެއާލް މެޑްރިޑަށް ބަދަލުވެފަ އެވެ. އަންޗެލޮޓީ، 2017 ވަނަ އަހަރު ބަޔާން މިއުނިކްގައި ހުރިއިރު ވެސް ހަމޭސް ގެނެސްފައިވެ އެވެ. ހަމޭސް އެވަޓަން އަށް ގެނައުމުގެ ފަހަތުގައި ވެސް އެންމެ އިސް ރޯލެއް ކުޅުނީ އަންްޗެލޮޓީ އެވެ.
