ދިވެހި ފުޓްބޯޅައިގެ ގިނަ ބަޔަކު އެއްބަސްވާ އެއް ކަމަކީ 2018 ވަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕަަށް ނެގި ސްކޮޑަށް ވުރެ، އަންނަ މަހު 1-16 އަށް މާލޭގައި ކުރިއަށްދާ ސާފަށް ތައްޔާރުވާން ނަގާފައިވާ ޕްރިލިމިނަރީ ސްކޮޑު ވަރުގަދަ ކަމަށެވެ. ގައުމީ ޓީމުގެ މުހިއްމު ކުޅުންތެރިޔާ އިބްރާހިމް ވަހީދު ހަސަން (އިއްބެ) ވެސް ވަނީ އެ ވާހަކަ ތަކުރާރުކޮށްފަ އެވެ.
"އަސްލު މިހާރު މި އޮތް ސްކޮޑަކީ މި ވަގުތު ރާއްޖޭގައި އޮތް އެންމެ ވަރުގަދަ ސްކޮޑޭ ބުނެވޭނީ. 2018 ގައި ކުޅުނު ގިނަ ކުޅުންތެރިން ވެސް އެބަތިބި. ޕްލަސް ހަމަ އެކްސްޕީރިއަންސް (ތަޖުރިބާކާރު) އަހަރުންނަށް ފައިދާ ހިފޭނެ ވަރުގެ މޮޅެތި ކުޅުންތެރިންތަކެއް މި ތިބީ އެޑްވެފައި (އިތުރުވެފައި)،" ގަތަރުގައި މިހާރު ކުރިއަށްދާ ޓްރެއިނިން ކޭމްޕްގެ ތެރެއިން ދިން އިންޓަވިއުގައި އިއްބެ ބުންޏެވެ.
ސާފް ޗެމްޕިއަންޝިިޕްގެ ތަށި 2018 ވަނަ އަހަރު އުފުލާލިއިރު، އެ ފަހަރު އޮތް ގައުމީ ޓީމުގެ އެވްރެޖް އުމުރަކީ 24 އަހަރެވެ. މި ފަހަރު ތަޖުރިބާކާރު ކުޅުންތެރިން ޓީމަށް އިތުރުކޮށްގެން މުބާރާތާ ކުރިމަތިލާއިރު، އިއްބެ ހުރީ ކުރިއެކޭ އެއްގޮތަށް ތަށި ހޯދުމުގެ އަމާޒުގަ އެވެ.
"ހުރިހާ ކަމަކަށް ބަލާއިރު އަމިއްލަ ފަސްގަނޑުގައި މި މުބާރާތް ކުޅޭއިރު މުބާރާތް ކާމިޔާބު ކުރުމަށް އަޅުގަނޑުމެންނަށް ވެސް ލިބޭ ހިތްވަރެއް އެއީ. އެ ކުޅުންތެރިންތަކާ އެކީ ޕްރެކްޓިސް ކޮށްލައި މި ކޭމްޕް ނިމޭއިރު ޓީމު އިންނާނީ އިރާދަކުރެއްވިއްޔާ ތަށި ނެގޭ ވަރަށް ފިޓްވެފައި،" އިއްބެ ބުންޏެވެ.
ގައުމީ ޓީމުން 2018 ވަނަ އަހަރު ފުރުސަތު ހޯދުމަށް ފަހު އިއްބެ އައީ ގަވާއިދުން ޓީމުން ފުރުސަތު ހޯދަމުންނެވެ. އެކަަމަކު، އިއްބެ މި ފަހަރު ގައުމީ ޓީމަށް މި އައީ މެދުކެނޑުމަކަށް ފަހު އެވެ. ޖޫން މަހު ކުޅުނު ވޯލްޑް ކަޕް ކޮލިފައިންގައި ވާދަކުރި ސްކޮޑުގައި އިއްބެ ހިމެނުނު ނަމަވެސް އަމިއްލަ ސަބަބަކާ ހުރެ އޭރު ޓީމާ ވަކިވީ އެވެ.
ގަތަރު ޓްރެއިނިން ކޭމްޕްގެ ތެރެއިން އިއްބ (މ).-- ފޮޓޯ: އަދަދު
ދާދި ފަހުން މާޒިޔާއާ އެކު އޭއެފްސީ ކަޕްގެ ދެކުނު އޭޝިއާގެ ގްރޫޕްގެ މެޗުތައް ކުޅެން ސައުދީ އަރަބިއްޔާ އަށް ޓްރެއިނިން ކޭމްޕަކަށް ގޮސް އިއްބެ ވަނީ މިދިޔަ މަހު އޭއެފްސީ ކަޕްގެ މެޗުތަކުގައި ވާދަކުރި މާޒިޔާ ޓީމުގައި ހިމެނިފަ އެވެ.
އިއްބެ ބުނީ މާޒިޔާގެ ޓްރެއިނިން ކޭމްޕުން ވެސް ރަނގަޅު ކަންތައްތަކެއް ފާހަަގަވި ކަމަށާއި ގައުމީ ޓީމު މިހާރު ގަތަރުގައި ފުރިހަމަ ކުރަމުން އަންނަ ޓްރެއިނިން ކޭމްޕުން ވެސް ގިނަ ޕޮޒިޓިވް ނަތީޖާތަކެއް ނުކުންނާނެ ކަމަށެވެ.
"މިހާރު ދެން އެކި ކްލަބްތަކުގެ ކުޅުންތެރިންނާ އެކު ކޭމްޕް މިހެން ކުރިއަށްދާއިރު އެންމެން މި ހޮޓަލުގެ އެއް ފްލޯއެއްގައި ހުރިހާ ކުޅުންތެރިއަކު މި އުޅެނީ. އެހެންވެ އެއް ކުޅުންތެރިއަކު އަނެއް ކުޅުންތެރިއަކާ އޮންނަ ގުޅުން ވަރުގަދަވެ، ޓްރެއިނިންގައި ވެސް އެ ފެންނަމުން ދަނީ ޓީމު ދުވަހެއް ދުވަހަކަށް ވަރުގަދަވަމުން ދާތަން،" އިއްބެ ބުންޏެވެ.
ފަސް ގައުމުގެ މެދުގައި މި ފަހަރުގެ ސާފް ޗެމްޕިއަންޝިޕް ކުޅޭނީ ފުރަތަމަ ލީގު ބުރެކެވެ. އެއީ އެންމެ ގިނަ ޕޮއިންޓް ހޯދާ ދެ ޓީމެއް ފައިނަލަށް ދާ ގޮތަށެވެ.
މި ފަހަރުގެ ސާފް ޗެމްޕިއަންޝިޕްގައި ރާއްޖެ ކުޅޭ ފުރަތަމަ މެޗުގައި އަންނަ މަހު އެއް ވަަނަ ދުވަހުގެރޭ ކުޅޭނީ ނޭޕާލާ އެެވެ. އެންމެ ފަހުން ސާފް ޗެމްޕިއަންޝިޕްގެ ސެމީ ފައިނަލުން ރާއްޖެ ވަނީ ނޭޕާލާ ވާދަކޮށް 3-0 އިން މޮޅުވެފަ އެވެ. އެ މެޗުގައި އިއްބެ ވަނީ ދެ ގޯލު ޖަހައިފަ އެވެ. އެ ފަހަރުގެ ސާފް ޗެމްޕިއަންޝިޕްގައި ރާއްޖޭން އެންމެ ގިނަ ގޯލު ޖެހީ ވެސް އިއްބެ އެވެ.
ރާއްޖޭގެ ދެ ވަނަ މެޗުގައި އަންނަ މަހު ހަތް ވަަނަ ދުވަހުގެރޭ ނުކުންނާނީ ބަންގްލަދޭޝާ ދެކޮޅަށެވެ. އެ އަށް ފަހު 10 ވަނަ ދުވަހު ހަވީރު ސްރީލަންކާއާ ކުޅުމަށް ފަހު 13 ވަނަ ދުވަހުގެރޭ އިންޑިއާއާ ބައްދަލުކުރާނެ އެވެ. މުބާރާތުގެ ފައިނަލް ކުޅޭނީ އަންނަ މަހުގެ 16 ވަނަ ދުވަހުގެރޭގަ އެެވެ.
