ކަސްޓަމްސްގެ ނޯތު ރީޖަނަލް ހެޑް އޮފީސް ހިމެނޭ ގޮތަށް މޯލްޑިވްސް ކަސްޓަމްސްގެ ދެ އޮފީހެއް އުތުރުގެ ދެ ރަށެއްގައި ހުޅުވައިފި އެވެ.
އެ ދެ އޮފީސް ހުޅުވާފައިވަނީ ކުޅުދުއްފުށި ސިޓީއާއި ހއ. އުލިގަމުގަ އެވެ. އެގޮތުން ކަސްޓަމްސްގެ ނޯތު ރީޖަނަލް ހެޑް އޮފީސް ގާއިމުކުރީ ކުޅުދުއްފުށީގަ އެވެ. ހއ. އުލިގަމުގައި ހުޅުވީ ކަސްޓަމްސްގެ އޮފީހެކެވެ. އެ ދެ އޮފީސް ވެސް ހުޅުވާފައި އިއްޔެ އެވެ.
ދެ އޮފީސް ހުޅުއްވައިދެއްވީ އެކަމަށްޓަކައި އެ ދެ ރަށުގައި ބޭއްވި ހާއްސަ ރަސްމިއްޔާތެއްގައި މިނިސްޓަރު އޮފް ޑިފެންސް މާރިޔާ އަހުމަދު ދީދީ އެވެ.
ކުޅުދުއްފުށީގައި އޮތް ރަސްމިއްޔާތުގައި ކޮމިޝަނާ ޖެނަރަލް އޮފް ކަސްޓަމްސް އަބްދުﷲ ޝަރީފްގެ އިތުރުން ޗީފް އޮފް ޑިފެންސް މޭޖާ ޖެނެރަލް އަބްދުﷲ ޝަމާލް އަދި ކުޅުދުއްފުށި ސިޓީގެ މޭޔަރު މުހައްމަދު އާތިފް ވެސް ބައިވެރިވެވަޑައިގެންނެވި އެވެ.
ކުޅުދުއްފުުށީގައި ކަސްޓަމްސްގެ އުތުރުގެ ހެޑް އޮފީސް ހުޅުއްވައިދެއްވަމުން މިނިސްޓަރު މާރިޔާ ވަނީ ސަރުކާރުގެ ލާމަރުކަޒީ ސިޔާސަތުގެ ދަށުން ގާއިމުކުރެވުނު އެ ހެޑް އޮފީހުގެ ސަބަބުން ސަރަހައްދީ ބަނދަރުތަކުން މުދާ ކްލިއާ ކުރަން ހޭދަވާ ވަގުތު ކުޑަކޮށްދީ، ވިޔަފާރީގެ ހަރަަދުތައް ކުޑަވެގެންދާނެ ކަމަށް ވިދާޅުވެފަ އެވެ.
މިނިސްޓަރު އޮފް ޑިފެންސް މާރިޔާ އަހުމަދު ދީދީ ކަސްޓަމްސްގެ ނޯތު ހެޑް އޮފީސް ހުޅުއްވައިދެއްވަނީ. ފޮޓޯ: ކަސްޓަމްސް
މިނިސްޓަރުގެ ވާހަކަފުޅުގައި މިފަހަކަށް އައިސް ރާއްޖެއަށް އެތެރެކުރާ މަސްތުވާތަކެތި އަތުލައިގަތުމުގައި ކަސްޓަމްސްގެ އޮފިސަރުންގެ ކުޅަދާނަކަމާއި ހުނަރުވެރިކަން ފާހަގަކޮށް އެ މުވައްޒަފުންގެ ހީވާގި މަސައްކަތަށް ޝުކުރު ވެސް އަދާކުރައްވާފަ އެވެ.
އުލިގަމުގައި އޮފީސް ހުޅުވުމަށް ބޭއްވި ރަސްމިއްޔާތުގައި މިނިސްޓަރު މާރިޔާގެ އިތުރުން ބައިވެރިވެވަޑައިގެންނެވީ ކޮމިޝަނާ ޖެނަރަލް އޮފް ކަސްޓަމްސް އަބްދުﷲ ޝަރީފް، ޗީފް އޮފް ޑިފެންސް މޭޖާ ޖެނެރަލް އަބްދުﷲ ޝަމާލްގެ އިތުރުން އުލިގަން ނިސްބަތްވާ ހޯރަފުށި ދާއިރާގެ ރައްޔިތުންގެ މަޖިލީހުގެ މެމްބަރު އަހުމަދު ސަލީމް އަދި އެ ރަށުގެ ކައުންސިލް މެމްބަރުންނެވެ.
އެ ރަސްމިއްޔާތުގައި ވާހަކަދައްކަވަމުން ކޮމިޝަނާ ޖެނެރަލް އޮފް ކަސްޓަމްސް އަބްދުﷲ ޝަރީފް ވިދާޅުވީ އާ އޮފީހުގެ މައިގަނޑު މަސައްކަތަކީ އުލިގަމަށް ބަނދަރުކުރާ ޔޮޓުފަހަރުތަކަށް ލުއި ފަސޭހަ ކަމާއެކު އެކި އެކި ހިދުމަތްތައް ފޯރުކޮށްދިނުމަށެވެ.
އަދި ކުރިޔަށް އޮތް ތަނުގައި އެ ސަރަހައްދުގައި ބޮންޑެޑް ވެއާހައުސްގެ ހިދުމަތެއް ގާއިމުކޮށް އެ ހިދުމަތް އެ ސަރަހައްދުގައި އޮޕަރޭޓްކުރާ ރިސޯޓްތަކަށް ފޯރުކޮށްދީ ފުޅާކުރުމުގެ ވިސްނުމެއް ކަސްޓަމްސްއިން ގެންގުޅޭކަމަށް ޝަރީފް ވިދާޅުވި އެވެ.
އުލިގަމުގައި ގާއިމުކުރި އެ އޮފީހާއެކު އެ ރަށުގައި ތަރައްގީކުރަން ނިންމާފައިވާ ޔޮޓް މެރީނާގެ މަސައްކަތަށްވެސް އިތުރު ކުރިއެރުމެއް ލިބިގެންދާނެކަމަށް ޝަރީފް ވިދާޅުވި އެވެ.
