ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެ ކުންފުނީގެ މުވައްޒަފުންގެ ތަޖުރިބާ ހިއްސާކުރުމަށް ހާއްސަ ޕްލެޓްފޯމެއް ތައާރަފުކޮށްފި އެވެ.
"ނޮލެޖް ހަބް" ގެ ނަމުގައި ތައާރަފުކުރި މި ވާޗުއަލް ޕްލެޓްފޯމް ލޯންޗުކޮށްފައި ވަނީ ސެޕްޓެމްބަރު 14 ވަނަ ދުވަހު އެވެ. ޕްލެޓްފޯމް ލޯންޗުކުރުމަށްފަހު މުވައްޒަފުންގެ ތަޖުރިބާތައް އެންމެ އެކަށޭނެ ގޮތުގައި ހިއްސާކުރާނެގޮތް ދަސްކޮށްދިނުމަށް "ސްކިލްސް ޕްރޯ ޕްރޮގްރާމް" ގެ ނަމުގައި ހާއްސަ ޕްރޮގްރާމެއް ވެސް ވަނީ ފަށައިފަ އެވެ.
ނޮލެޖް ހަބަކީ ކޮބާ؟
ނޮލެޖް ހަބަކީ ކުންފުނީގެ މުވައްޒަފުންގެ މެދުގައި މައުލޫމާތު ހިއްސާކުރުމުގެ އާދަ އަށަގަންނަވައި އެކަމަށް ބާރުއެޅުމުގެ ގޮތުން އިފްތިތާހު ކުރި ވާޗުއަލް ޕްލެޓްފޯމެކެވެ. މި ޕްލެޓްފޯމްގެ ސަބަބުން ކުންފުނީގެ މުވައްޒަފުންގެ މެދުގައި ތަފާތު ޓްރެއިނިން ޕްރޮގްރާމްތައް ހިންގުމުގެ ފުރުސަތު ފަހިވެގެންދާނެ އެވެ.
ތަފާތު މަސައްކަތްތައް ކުރާ ގިނަ އަދަދެއްގެ ކުންފުނި ރާއްޖޭގައި ހަރަކާތްތެރިވަމުންދާ ކަމަށާއި އެޗްޑީސީގެ އަމާޒަކީ ނޮލްޖް ހަބް މެދުވެރިކޮށް އެކުންފުނީގެ ތަޖުރިބާކާރު މުވައްޒަފުންގެ މައުލޫމާތުތައް އެހެން މުވައްޒަފުންނާ ފަސޭހައިން ހިއްސާކުރެވޭނެ މަގުފަހިކޮށްދިނުން ކަމަށް އެކުންފުނިން ބުނެ އެވެ.
ރާއްޖޭގެ އެންމެ ބޮޑު ރިއަލް އެސްޓޭޓް ޑިވެލޮޕްމެންޓް ކުންފުނީގައި ހުނަރުވެރި، ތަޖުރިބާކާރު، ގާބިލް މުވައްޒަފުން ތިބިއިރު އެމުވައްޒަފުންގެ ތަޖުރިބާ އާއި މައުލޫމާތު އެހެން މުވައްޒަފުންނާ ހިއްސާ ކުރެވިގެން ދިއުމަކީ މިފަދަ ޕްލެޓްފޯމެއް އުފެއްދުމުގެ އެންމެ ބޮޑު މަގުސަދު ކަމަށް އެކުންފުނިން ފާހަގަކުރެ އެވެ. މީގެ ސަބަބުން މުވައްޒަފުންގެ ގުޅުން ބަދަހިވެ މަސައްކަތަށް ހުންނަ ޝައުގުވެރިކަން އިތުރުވެގެންދާނެ ކަމަށް އެޗްޑީސީން ބުނެ އެވެ.
ނޮލްޖް ހަބް މެދުވެރިކޮށް ތަފާތު ޓްރެއިނިން ޕްރޮގްރާމްތައް ކުރިއަށްގެންދެވޭ އިރު، މި ޓްރެއިނިން ޕްރޮގްރާމްތައް ނަގައިދިނުމުގެ ހުއްދަ ދެވޭނީ އެމީހެއްގެ ތަޖުރިބާ އާއި ތައުލީމީ ފެންވަރަށް ބެލުމަށްފަހު އެވެ. ޓްރެއިނަރުން ހޮވުމުގެ މަސައްކަތްކުރާނީ އެޗްޑީސީގެ ޓެލެންޓް ޑިވެލޮޕްމެންޓް ސެކްޝަނުންނެވެ.
