ޅ. ފެލިވަރުގައި އިތުރު 4،000 ޓަނުގެ ކޯލްޑް ސްޓޮރޭޖަކާއި ދުވާލެއްގެ މައްޗަށް 100 ޓަނުގެ މަސް ޕްރޮސެސް ކުރެވޭ ވަރުގެ ކާރުހާނާއެއް ގާއިމުކުރުމަށް ހިންގާ މަޝްރޫއުގެ ޕްޜީކޮލިފިކޭޝަން މަރުހަލާ، އެ މަޝްރޫއަށް ހަރަދުކުރާ އިންޑިއާގެ އެގްޒިމް ބޭންކުން ފަށައިފި އެވެ.
އެ މަޝްރޫއުގެ ދަށުން ކޯލްޑް ސްޓޮރޭޖްއަކާއި މަސް ޕްރޮސެސް ކުރާ ކާރުހާނާއަކާއި ބްރައިން ފްރީޒިން ފެސިލިޓީއެއް، ރެފްރިޖަރޭޓަޑް ސީ ވޯޓާ ފެސިިލިޓީއެއް، ފިޝް މީލް ޕްލާންޓެއް، އައިސް ޕްލާންޓެއްގެ އިތުރުން އެހެނިހެން ވަސީލަތްތައް ވެސް ގާއިމުކުރުމަށް ވަނީ ހަމަޖެހިފަ އެވެ.
އަދި ހަމަ އެ މަޝްރޫއުގެ ދަށުން ގއ. ގެމަނަފުށީގައި ވެސް 50 ޓަނުގެ އައިސް ޕްލާންޓެއް ބެހެއްޓުމަށް ވަނީ ހަމަޖެހިފަ އެވެ.
އެ މަޝްރޫއަކީ އިންޑިއާގެ އެގްޒިމް ބޭންކުގެ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން ހަރަދުކޮށްގެން ހިންގާ މަޝްރޫއެކެވެ. އިކޮނޮމިކް މިނިސްޓްރީން ބުނި ގޮތުގައި އެ މަޝްރޫއު ނިމުމުން މިފްކޯގެ މަސް ޕްރޮސެސް ކުރުމުގެ ކެޕޭސިޓީ ދެ ގުނައަށް ވުރެ ބޮޑުތަނުން އިތުރުވެގެންދާނެ އެވެ.
އަދި ބާނާ މަސް ކިރުމުގައި މަސްވެރިންނަށް ކުރިމަތިވާ ގިނަ ދަތިތަކެއްވެސް އެ މަޝްރޫއުގެ ދަށުން ގާއިމުކުރާ ކޯލްޑް ސްޓޮރޭޖާއި ފްރީޒިން ފެސިލިޓީގެ ސަބަބުން ހައްލުވެގެންދާނެކަމަށް ވެސް އެ މިނިސްޓްރީން ބުނެ އެވެ.
މިނިސްޓްރީން އެ މަޝްރޫއާ ގުޅޭގޮތުން ބުނި ގޮތުގައި ރާއްޖޭގެ މަސްވެރިކަމުގެ ސިނާއަތް ފުޅާކޮށް، ޒަމާނީކުރުމަށް ވެސް އެ މަޝްރޫއުގެ ދަށުން ފަސޭހަވެގެން ދާނެ އެވެ. އަދި މަސްވެރިކަމުގެ ސިނާއަތަށާއި، މަސްވެރިންގެ އިތުރުން، މިފްކޯ އަދި މުޅި ގައުމުގެ އިގްތިސޯދަށްވެސް އެ މަޝްރޫއުގެ ސަބަބުން ފައިދާ ކުރާނޭކަމަށް އެ މިނިސްޓްރީއިން ބުނެ އެވެ.
ޅ. ފެލިވަރުގައި ހިންގާ ތަރައްގީގެ މަޝްރޫއުތަކުގެ ރެންޑާކޮށްފައިވާ ފޮޓޯތަކެއް. ފޮޓޯ: އިކޮނޮމިކް މިނިސްޓްރީ
އިންޑިއާގެ އެގްޒިމް ބޭންކުން އެ މަޝްރޫގެ ޕްރީކޮލިފިކޭޝަން މަސައްކަތް މިހާރު ފަށާފައިވާއިރު، އޭގެ ފަހުގެ ތާރީހެއްގައި މަޝްރޫއަށް ކޮންޓްރެކްޓަރެއް ހޯދުމަށް އިއުލާންކުރާނޭކަމަށް ބެލެވެ އެވެ.
ފެލިވަރުގެ ތަރައްގީގެ މަޝްރޫއަކީ އިންޑިއާގެ ލައިން އޮފް ކްރެޑިޓް ދަށުން ސަރުކާރުން ހިންގަން ނިންމި އެންމެ ފުރަތަމަ އެއް މަޝްރޫކަން ފާހަގަކޮށްލެވެ އެވެ.
ފެލިވަރުގައި ބޮޑެތި މަޝްރޫއުތަކެއް ސަރުކާރުން ހިންގަމުންދާއިރު، މަސްދަޅު އުފެއްދުމާއި ރާއްޖެއިން ބޭރަށް މަސްދަޅު އަދި މަހުގެ ޕްރޮޑަކްޓްް އެކްސްޕޯޓުކުރުމުގެ މަސައްކަތް އެ ރަށުގައި ކުރާ ފެލިވަރު ފިޝަރީސް މޯލްޑިވްސް ކުންފުނި އުވާލުމަށް ސަރުކާރުން ވަނީ ދާދި ފަހުން ނިންމައި، އެކަން އިއުލާންކޮށްފަ އެވެ.
އެ ކުންފުނި އުވާލަން ނިންމާފައިވަނީ ކޫއްޑޫ ފިޝަރީޒް މޯލްޑިވްސް ހިމެނޭ ގޮތަށް ސަރުކާރު ހިއްސާވާ އިތުރު ހަތް ކުންފުންޏަކާ އެކުގަ އެވެ.
