ހުޅުމާލެ ދެވަނަ ފިޔަވަހީގައި އިމާރާތްކޮށްފައިވާ ހިޔާ ފްލެޓްތަކަށް ކަރަންޓް ދިނުމުގެ މަސައްކަތް އަލުން ފަށައިފި އެވެ.
ސްޓެލްކޯ އިން ކަރަންޓު ދެމުން ދިޔައީ ދުވާލަކު ދެ ޓަވަރަށެވެ. ކަރަންޓު ދިނުމުގެ މަސައްކަތް މެދުކަނޑާލީ ޓަވަރެއްގެ ލިފްޓްތަކަކަށް ދިމާވި ޓެކްނިކަލް މައްސަލައަކާ ގުޅިގެންނެވެ.
ސްޓެލްކޯއިން މިއަދު ބުނީ ޓަވަރުގެ ލިފްޓް ކޮމިޝަންކޮށް ނިންމައި ކަރަންޓު ދިނުމުގެ މަސައްކަތް ފަށާފައިވާ ކަމަށެވެ. އެ ކުންފުނިން ކަރަންޓު ދެމުން އަންނަނީ އެޗްޑީސީން ހަވާލުކުރާ ޓަވަރު ތަކަށެވެ. އެގޮތު މިއަދު ކަރަންޓު ދޭން ނިންމާފައި ވަނީ 15 އަދި 16 ވަނަ ޓަވަރަށެވެ.
ކަރަންޓު ދިނުމުގެ މަސައްކަތް ކުރިޔަށް ދާނީ ކޮންމެ ދުވަހެއްގެ ހެނދުނު 9:00 އިން ހަވީރު 5:00 އަށެވެ. އަދި މިކަން އަންގަން އެ ކުންފުނިން ފްލެޓުގެ ވެރިފަރާތުން އެޗްޑީސީއަށް ދީފައިވާ ނަމްބަރަށް އެސްއެމްއެސްއެއް ފޮނުވާނެ އެވެ.
އެ އެސްއެމްއެސް ލިބުމުން، ޓަވަރު ކައިރިއަށް ދާން ޖެހެނީ ކަރަންޓުލުމަށްޓަކައި ސްޓެލްކޯއާ އެކު ސޮއެކޮށްފައިވާ މީހާއަށް ދޫކޮށްފައިވާ ސްލިޕް ހިފައިގެންނެވެ. އެ ސްލިޕް ހިފައިގެން ދިޔުމުން ކަރަންޓުދޭނެ ކަމަށް ސްޓެލްކޯއިން ވަނީ ބުނެފަ އެވެ.
އެ މީހަކަށް ހަމަޖައްސާފައިވާ ދުވަހު ހާޒިރުނުވެއްޖެ ނަމަ، ދެން ފުރުސަތު ލިބޭނީ ހުރިހާ ޓަވަރަކަށް ކަރަންޓު ގުޅައި ނިމުމުން ކަމަށް ސްޓެލްކޯ އިން ބުންޏެވެ. މިކަމަށް ސަމާލުވެ، ފްލެޓްތަކުގެ ވެރިފަރާތަށް ހާއްސަކޮށްފައިވާ ދުވަހު ދާން އެ ކުންފުނިން އިލްތިމާސްކުރެ އެވެ.
