ހުޅުމާލޭގެ ފުރަތަމަ ފިޔަވަހީގައި ހަދާ ވޯޓާ ތީމް ޕާކްގެ މަސައްކަތް ހުއްޓިފައިވާތީ، އެ މަޝްރޫއު އަނބުރާ އަތުލުމަށްޓަކައި، އެ މަޝްރޫއުއާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ހިންގަމުންދާ ތަހުގީގު އަވަސްކޮށް ދިނުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެދިއްޖެ އެވެ.
ތީމް ޕާކަކާއެކު ހޮޓަލެއް ވެސް ހިމެނޭ 25 މިލިއަން ޑޮލަރު (ގާތްގަނޑަކަށް 385.5 މިލިއަން ރުފިޔާ) މަޝްރޫއު މެލޭޝިއާގެ މިރި ހައުސިން ޑިވެލޮޕްމަންޓް ކުންފުންޏާ ހަވާލުކުރީ 2017 ވަނަ އަހަރުގެ ތެރޭގަ އެވެ.
ހުޅުމާލޭގެ ދެކުނު ކޮޅުން ބްރިޖަށް އަރަންދާ މަގުގައި އޮންނަ ބޮޑު މަގުގެ އަތިރިމައްޗަށްވާ ގޮތަށް ހަދާ ވޯޓަ ތީމް ޕާކުގައި ފެނުގެ ގިނަ ކުޅިވަރުތައް ކުޅެވޭނެ ވަސީލަތް ގާއިމް ކުރަން ދީފައިވަނީ 35 އަހަރަށެވެ.
އެނގިފައިވާ ގޮތުގައި އެ މަޝްރޫއު މިރި ހައުސިންއާ ހަވާލުކުރުމުގައި ކޮރަޕްޝަންގެ އަމަލެއް ހިންގާފައިވޭތޯ ބެލުމަށް އެޗްޑީސީގެ ފަރާތުން އޭސީސީއަށް ފޮނުވާފައިވަނީ މިދިޔަ އަހަރުގެ ޖޫން މަހުގެ ތެރޭގަ އެވެ.
އަދި އެ މައްސަލަ ބެލުމަށް އޭސީސީން ނިންމައި، އެކަން ވަނީ އެޗްޑީސީއަށް އަންގައިފަ އެވެ.
އެ ޕާކުގެ މަސައްކަތް ކޮންމެވެސް ވަރަކަށް ފެށިފައިވީ ނަމަވެސް، މިހާރު އެ މަޝްރޫއު ހުއްޓިފައި އޮންނަތާ އެތައް ދުވަހެއް ވެއްޖެ އެވެ.
އެނގިފައިވާ ގޮތުގައި، ކޮވިޑުގެ ހާލަތުގެ ދަށުން އެ މަސައްކަތް ފެށުމަށް އެކި ތާރީހުތައް ދިން ނަމަވެސް، އެކަން ކުރިއަށް ނުދާތީ އެ މަޝްރޫއު އަތުލަން އެޗްޑީސީން ދަނީ ވިސްނަމުންނެވެ.
ނަމަވެސް، އޭސީސީގެ ތަހުގީގު ނިންމާފައިނުވާތީ އެ ކަމަށް ހުރަސްއެޅިފައިވާކަމަށް މައުލޫމާތު ލިބިފައި ވެ އެވެ.
އެކަމާ ގުޅިގެން އެޗްޑީސީން އޭސީސީއަށް ފޮނުވި ސިޓީއެއްގައި ބުނެފައިވަނީ ޕާކުގެ މަޝްރޫއު ހުއްޓިފައިވާތީ ކޮންޓްރެކްޓަރާއެކު ޑިސްޕިއުޓް ރިޒޮލިއުޝަންގެ ވާހަކަތައް ފެށިފައިވާ ކަމަށެވެ.
އެގޮތުން، އޭސީސީގެ ނިންމުމަކީ ކޮންޓްރެކްޓަރާމެދު އެޗްޑީސީގެ ނިންމުމަށް ވަރަށް މުހިންމު މައުލޫމާތަކަށްވާތީ، އެ ތަހުގީގު އަވަސްކޮށް ދިނުމަށް ވަނީ އެދިފަ އެވެ.
