ހުޅުމާލޭގެ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ޓަވަރުތަކަށް ސްޓެލްކޯ އިން ކަރަންޓު ދިނުމާ އެކު ފިނިޝިންގެ މަސައްކަތް ފަށައިފި އެވެ.
ކުރީގެ ސަރުކާރުގައި އިމާރާތްކޮށްފައިވާ އެ ފްލެޓްތަކަށް ވަންނަން ޖެހެނީ އަމިއްލަ އަށް ފިނިޝިން ނިންމައިގެންނެވެ. އޭގެތެރޭގައި ދެ ކޮޓަރީގެ އެޕާޓްމެންޓްތަކުގައި ޓައިލްސް ޖެހުމާއި ދެ ކޮޓަރި އާއި ދެ ފާހާނާގައި ވެސް އެތެރޭގެ ދޮރުތަކާއި ކިޗަން ކެބިނެޓާއި އެތެރޭގެ ފާރުތަކުގައި ކުލަ ލުމާއި ބޮކިތަކާއި ފަންކާތައް ހަރުކުރުން ހިމެނެ އެވެ.
ހިޔާގެ ޓަވަރުތަކަށް ކަރަންޓް ދިނުމުގެ މަސައްކަތް ސްޓެލްކޯއިން ފެށީ އޮގަސްޓް 17ގަ އެވެ. ޖުމްލަ 6720 ފްލެޓުގެ ތެރެއިން ކޮންމެ ދުވަހަކު ކަރަންޓްދަނީ ދެ ޓަވަރަށެވެ. އެގޮތުން 17 ވަނަ ދުވަހު ކަރަންޓު ދިނީ H15 އަދި H16 ވަނަ ޓަވަރަށެވެ. އިއްޔެ ކަރަންޓް ދީފައި ވަނީ 11 އަދި 12 ވަނަ ޓަވަރަށެެވެ.
އެޗްޑީސީން ބުނި ގޮތުގައި ފިނިޝިންގެ މަސައްކަތް ނިންމުމަށް ހުޅުވާލުމާ އެކު މިވަގުތު އާއިލާތަކުން މަސައްކަތް ކުރިއަށް އެބަދެ އެވެ. އާއިލާތަކުން ބޭނުންވާ ތަކެތި އުފުލުމަށް ފްލޯއެއްގައި 16 އެޕާޓްމެންޓު ހުންނަ ޓަވަރުން ދެ ލިފްޓް ބޭނުންކުރެވޭނެ ކަމަށް އެޗްޑީސީން ވަނީ ބުނެފަ އެވެ. އަދި ފްލޯއެއްގައި 20 އެޕާޓްމެންޓް ހުންނަ ޓަވަރުން ތިން ލިފްޓު ބޭނުން ކުރެވޭނެ އެވެ.
ފްލެޓްގެ ފިނިޝިން ނިންމަން ދީފައިވާ މުއްދަތުގެ ތެރޭގައި 24 ގަޑިއިރު އެއްވެސް ހުއްޓުމަކާނުލައި، މަސައްކަތްތައް ކުރިޔަށް ގެންދެވޭނެ ކަމަށް އެޗްޑީސީން ވަނީ ބުނެފަ އެވެ.
ފްލެޓުތަކަށް އާއިލާތަކުން ބަދަލުވާން ފަށާފައިވާއިރު، ފްލެޓްތަކުގެ ކުލި އަންނަ ޑިސެމްބަރާ ހަމައަށް ދައްކަން ނުޖެހޭ ގޮތަށް ވަނީ ނިންމާފަ އެވެ.
