ހުޅުމާލޭ ދެވަނަ ފިޔަވަހީގައި އަޅާފައިވާ ހިޔާ ފްލެޓްތަކުގެ ކުލި ކުޑަކޮށްދޭން ގޮވާލައި ފްލެޓުގެ ހައްގުވެރިން އިއްޔެ މުޒާހަރާކޮށްފައިވަނިކޮށް، ކުލި ކުޑަކޮށް ދެވެން ނެތް ކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ބުނެފި އެވެ.
ހިޔާ ފްލެޓް ލިބުނު ގިނަ އަދަދެއްގެ ބަޔަކު އިއްވެ ފްލެޓްތައް ކައިރިއަށް އެއްވެ ގޮވަމުން ދިޔައީ އެ ފްލެޓަށް މަހަކު 8،500ރ. ދައްކަން ޖެހުން ބޮޑު ކަމަށާއި 5،600ރ. އަށް ކުލި ކުޑަކޮށްދިނުމަށެވެ.
އެ މުޒާހަރާއާ ގުޅޭގޮތުން އެޗްޑީސީގެ މެނޭޖިން ޑިރެކްޓާ ސުހައިލް އަހުމަދު "އަދަދު" އަށް ވިދާޅުވީ މިހާތަނަށް ވެސް ހިޔާ ފްލެޓްތަކުގައި އެކަށީގެންވާ ލުއިތަކެއް ދީފައިވާ ކަމަށާއި މިހާރު ކަނޑައަޅާފައިވާ ވަރަށް ވުރެ ކުލި ކުޑަކޮށް ދެވެން ނެތް ކަމަށެވެ.
"ހުރިހާ ކަމެއްގައި ލުއި ނުދެވުނަސް ލުއި ދެވެން ހުރި ކަންކަމުގައި ލުއި ދެމުން މިދަނީ،" ސުހައިލް ވިދާޅުވި އެވެ.
ހިޔާ ފްލެޓްތަކުގެ ކުލި ބޮޑުވެގެން ގިނަ ޝަކުވާތަކެއް ވަނީ ހުށަހަޅައިފަ އެވެ. އެއާއެކު ގިނަ ލުއިތަކެއް ވެސް ވަނީ ދީފަ އެވެ. އެ ފްލެޓްތައް ނިންމަން ތިން މަސް ދޭ ގޮތަށް ފުރަތަމަ ހަމަޖެއްސި ނަމަވެސް މިހާރު ސަރުކާރުން ނިންމާފައިވަނީ ޑިސެމްބަރު މަހާ ހަމައަށް ކުލި ނުނެގުމަށެވެ.
ހިޔާ ފްލެޓުތަކަށް ފައިސާ ދައްކާ ހަލާސްކުރުމަށް ހަމަޖެހިފައިވަނީ 25 އަހަރުގެ މުއްދަތަށް ބަހާލައިގެން، އިންސްޓޯލްމަންޓު އުސޫލުން މަހަކު 7،500ރ ދައްކާ ގޮތަށެވެ. އަދި ފްލެޓުގެ މެނޭޖްމެންޓު ފީގެ ގޮތުގައި ކޮންމެ މަހަކު 1,000ރ. ނަގާ ގޮތަށް ވެސް ވަނީ ހަމަޖެހިފަ އެވެ. އެހެންކަމުން، މިހާރު ސަރުކާރުން ކަނޑައަޅާފައިވާ ގޮތުން، ހިޔާ ފްލެޓަކަށް މަހަކު 8،500ރ. ދައްކަން ޖެހެ އެވެ.
ކުރީ ސަރުކާރުގެ ހައުސިން މިނިސްޓްރީން ބުނެފައި ވަނީ ހިޔާ ޕްރޮޖެކްޓުގެ ތެރެއިން ޔުނިޓަކަށް މަހަކު ދައްކަން ޖެހޭނީ 5،600ރ. ކަމަށެވެ. އެއީ ޕްރޮޖެކްޓުގެ ތެރެއިން ޔުނިޓެއް އިމާރާތްކުރަން ހަރަދުވާ 1.27 މިލިއަން ރުފިޔާއިން ޑައުންޕޭމަންޓަށް 25،000ރ. ކެނޑުމަށް ފަހު މަހަކު ދައްކަން ޖެހޭ އަދަދަށް އަށް ޕަސެންޓުގެ އިންޓްރެސްޓެއް ހިމަނައިގެންނެވެ.
މި ހިސާބު ކުރުމުގައި މައްސަލަތަކެއް ހުރި ކަމަށް މި ސަރުކާރުން އަންނަނީ ބުނަމުންނެވެ.
އެޗްޑީސީން ބުނެފައިވާ ގޮތުގައި އެ އަގު ކަނޑައެޅީ ޔުނިޓެއް އިމާރާތްކުރަން ކުރި ހަަރަދު ބައިކޮށްލުމަށް ފަހު އިންސްޓޯލްމަންޓަށް ޖެހޭ ފައިސާ ނުވަތަ މަހު ކުލިން އިންޓްރެސްޓް ނެގުމަށް ފަހު ކަމަށެވެ. މި ޕްރޮޖެކްޓް ފައިނޭންސް ކުރަން ނެގި ދިގު މުއްދަތުގެ ލޯނުތަކުގެ އިންޓްރެސްޓް ނަގަނީ ލޯނު ފައިސާގެ ތެރެއިން އަނބުރާ ނުދައްކާ އޮތް އަދަދުންނެވެ. މަހަކަށް ޖެހޭ ފައިސާއަކުންނެއް ނޫނެވެ.
ކުރިން ޕްރޮޖެކްޓަށް ހަަރަދުތަކުގެ ތެރޭގައި ހިމަނާފައިވާ ހުރިހާ ހިސާބުތަކާ އެކު އީއެމްއައި ނުވަތަ މަހަކު އިންސްޓޯލްމަންޓަށް ދައްކަން ޖެހޭ އަދަދު އަސްލު ފޯމިއުލާގެ ތެރެއިން ހިސާބު ކުރީމަ ޔުނިޓަކަށް ޖެހޭ މަހު ކުލީ 10،416ރ. އަށް އަރަ އެވެ. މިއީ ޔުނިޓަކަށް ޖެހޭ ވަރު ކަަމަށް ހައުސިން މިނިސްޓްރީން ބުނި އަގަށް ވުރެ 4،710ރ. އިތުރު އަދަދެކެވެ.
