ހިޔާ ފްލެޓްތަކުގެ އެއްބަސްވުމުގައި ސޮއިކޮށް ތަޅުދަނޑި އަލުން ހަވާލުކުރަން ފަށައިފި އެވެ.
މިދިޔަ ހަފުތާގައި އެއްބަސްވުންތަކުގައި ސޮއިކުރުން މެދުކަނޑާލީ ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މުވައްޒަފުންތަކެއް ކޮވިޑަށް ޕޮޒިޓިވްވުމުންނެވެ.
އެކަމަކު މިއަދު އަލުން ފަށައި އެއްބަސްވުންތަކުގައި ސޮއިކުރާނެ ޝެޑިއުލް ވަނީ އާއްމުކޮށްފަ އެވެ.
ހިޔާ ފްލެޓް އެއްބަސްވުމުގައި ސޮއިކުރުމުގެ ކަންކަން ކުރިޔަށް ގެންދަނީ ކޮންމެ ޓަވަރަކަށް ވަކި ދުވަހެއް ކަނޑައަޅައިގެންނެވެ. އެއްބަސްވުންތަކުގައި ސޮއި ކުރުމަށް ވަގުތު ކަނޑައަޅާފައިވަނީ ކޮންމެ ބައިގަޑިއިރަކުން 15 މީހުންނަށް ސޮއިކުރެވޭ ގޮތަށެވެ. ކޮންމެ ދުވަހަކު ވެސް ސޮއިކުރަން ކަނޑައަޅާފައިވާ މީހުންނާއި އެ މީހުން ދާންޖެހޭ ވަގުތު ކުރިން އިއުލާންކުރެ އެވެ.
ކުރީގެ ސަރުކާރުގައި ފެށި ހިޔާ މަޝްރޫއުގައި އެކި ކެޓަގަރީތަކުން 6،720 ފްލެޓް ދީފައިވެ އެވެ. ހަވާލުނުކޮށް ދިގުލައިގެން ގޮސްފައިވާ މި ފްލެޓްތަކުގެ އެއްބަސްވުންތަކުގައި ސޮއިކުރަން ފެށީ މި މިދިޔަ މަހުގެ 14ގަ އެވެ.
އެއްބަސްވުމުގައި ސޮއިކުރާ މުއްދަތުން ފެށިގެން ކުލި ނުނަގާ ގޮތަށް ފްލެޓްތަކުގެ ފިނިޝިންއަށް ތިން މަސް ދޭން ވަނީ ނިންމައިފަ އެވެ. ދެ ކޮޓަރީގެ އެޕާޓްމެންޓްތަކުގައި ޓައިލްސް ޖެހުމާއި ދެ ކޮޓަރި އާއި ދެ ފާހާނާގައި ވެސް އެތެރޭގެ ދޮރުތަކާއި ކިޗަން ކެބިނެޓާއި އެތެރޭގެ ފާރުތަކުގައި ކުލަ ލުމާއި ބޮކިތަކާއި ފަންކާތައް ހަރުކުރަން ޖެހެނީ ފްލެޓުގެ ވެރިފަރާތުންނެވެ.
މި ފްލެޓްތަކުގައި ދިރިއުޅެން އެޗްޑީސީން ލަފާކުރާ ގޮތުގައި ދެ ވަނަ ފިޔަވައްސަށް އެއްފަހަރާ ގާތްގަނޑަކަށް 30,000-35,000 ދެމެދަށް މީހުން ބަދަލުވާނެ އެވެ.
