ފުވައްމުލަކު ހޮސްޕިޓަލުގައި, ބަލި މީހުންނަށް ފަރުވާ ދިނުމުގައި މައްސަލަތަކެއް ދިމާވި އަންހެނުންގެ ބަލިތަކަށް ހާއްސަ ޑޮކްޓަރު ބައެއް މަސްއޫލިއްޔަތުތަކުން އެކަހެރިކޮށް އާ ޑޮކްޓަރަކު އެ ހޮސްޕިޓަލަށް ހަމަޖައްސައިފި އެވެ.
އެ ހޮސްޕިޓަލުން މިއަދު ބުނީ މިދިޔަ ހަފުތާ އިން ފެށިގެން ހިދުމަތް ދެމުން އަންނަނީ ލ. އަތޮޅު ހޮސްޕިޓަލުގައި ކުރިން ފަރުވާ ދެއްވި ޑޮކްޓަރެއް ކަމަށެވެ. އަންހެނުންގެ ބަލިތަކުގެ އޮޕަރޭޝަންތައް ވެސް މިހާރު ކުރިއަށް ގެންދަނީ އޭނާ އެވެ.
ކުރިން އެ ހޮސްޕިޓަލުގައި ހިދުމަތް ދިން ޑޮކްޓަރު މަސައްކަތުން އެކަހެރިކުރީ އޭނާ ކުރި އޮޕަރޭޝަނަކުން ބަލި މީހަކަށް ސީރިއަސް މައްސަލަތަކެއް ދިމާވެފައި ހުރި ކަން އެނގުމުންނެވެ. އޭނާ ބަނޑުގައި ރިއްސާތީ އައިޖީއެމްއެޗަށް ދެއްކުމުން ފެނުނީ ބަނޑު ތެރޭގައި ފޮތިގަނޑެއް އޮއްވަ އެވެ. އޭގެ އިތުރުން ވެސް އެ ޑޮކްޓަރުގެ ފަރާތުން އިހުމާލުގެ މައްސަލަތަކެއް ވަނީ ފެންމަތިވެފަ އެވެ.
މި މައްސަލަތަކާ ހެދި އޭނާ މަސައްކަތުން އެކަހެރިކޮށްދޭން އެދުނީ ފުވައްމުލަކު ހޮސްޕިޓަލުންނެވެ.
ފުވައްމުލަކު ހޮސްޕިޓަލްގެ މެނޭޖަރު އަހުމަދު ސައީދު މިއަދު "އަދަދު" އަށް ވިދާޅުވީ އެ ޑޮކްޓަރުގެ މައްސަލަ ހެލްތު މިނިސްޓްރީން ތަހުގީގުކޮށް އަދިވެސް ނުނިމޭ ކަމަށާއި އެހެންކަމުން އޭނާ އަދިވެސް ބަލި މީހުން ބަލާ ކަމަށެވެ. ނަމަވެސް އޮޕަރޭޝަންތަކާއި ސިޒޭރިއަންތައް ހެދުމުން މިމަހު ކުރީކޮޅު އޭނާ އެކަހެރި ކޮށްފައިވާ އޭނާ ވިދާޅުވި އެވެ.
"އިހުމާލުވި ފަރާތެއް ކަނޑައަޅަނީ އިންވެސްޓިގޭޝަންތައް ނިމުމުން ދެއްތޯ. އެހެންވީމައި އަދި ޑޮކްޓަރު މަސައްކަތަށް ނުކުންނަވާ،" ސައީދު ވިދާޅުވި އެވެ.
